တၢ်ပိာ်ထွဲ
ကစၢ်ယွၤအမံၤ—တၢ်သူအီၤဒီး အခီပညီ
လၢနလံာ်စီဆှံအပူၤ စံးထီၣ်ပတြၢၤ ၈၃:၁၈ န့ၣ်ဘၣ်တၢ်ကွဲးကျိးအီၤဒ်လဲၣ်. ဟီၣ်ခိၣ်သီ လံာ်စီဆှံကွဲးကျိး န့ၣ်ကွဲးကျိးဝဲအဆၢဖိအံၤ ဒ်အံၤလီၤ– “ဒီးနဲဒၣ်တဂၤဃီလၢ နမံၤမ့ၢ်ယဟိဝၤန့ၣ် မ့ၢ်တၢ်ထီကတၢၢ်တဂၤလၢ ဟီၣ်ခိၣ်ဒီဘ့ၣ်ညါအဖီခိၣ်လီၤ.” လံာ်စီဆှံကွဲးကျိး အဂုၤအဂၤအါမးစ့ၢ်ကီး ကွဲးကျိးဝဲ ဒ်န့ၣ်လီၤ. ဘၣ်ဆၣ် လံာ်ကွဲးကျိးအါမးန့ၣ် ပာ်လီၤတဲာ်ဝဲ မံၤလၢအမ့ၢ် ယဟိဝၤဒီး တၢ်အံၤအလီၢ်န့ၣ် ထဲနုာ်ကဒါက့ၤဝဲ “ကစၢ်” မ့တမ့ၢ် “ယွၤ” န့ၣ်လီၤ. အဆၢဖိအံၤ အပူၤန့ၣ် တၢ်မနုၤကြၢးပာ်ဝဲလဲၣ်. မံၤလၤသၣ်ကပီၤတခါဧါ, ယဟိဝၤအမံၤဧါ.
ကစၢ်ယွၤအမံၤလၢ ဧ့ၤဘြံၤအလံာ်မဲာ်ဖျၢၣ်
အဆၢဖိအံၤန့ၣ် စံးကတိၤဝဲ အမံၤအသၣ်အဂ့ၢ်လီၤ. လံာ်စီဆှံအါဘ့ၣ်လၢ ဘၣ်တၢ်ကွဲးအီၤလၢ ဧ့ၤဘြံၤကျိာ်အခီၣ်ထံး တဖၣ်အပူၤန့ၣ် ပာ်ဖျါဝဲ မံၤစီဆှံဖဲအံၤလီၤ. ဧ့ၤဘြံၤအလံာ်မဲာ်ဖျၢၣ် ကွဲးဝဲလၢ הוהי (ယဟဝဟ) လီၤ. လၢပှၤကညီကျိာ်န့ၣ် ကွဲးကျိးဝဲ မံၤအံၤလၢ “ယဟိဝၤ” လီၤ. မံၤအံၤအိၣ်ထဲဒၣ် လံာ်စီဆှံ အဆၢဖိအံၤလီၤဧါ. တမ့ၢ်ဘၣ်. ဧ့ၤဘြံၤလံာ်စီဆှံ အခီၣ်ထံးအပူၤန့ၣ် ပာ်အဘျီ ၇,၀၀၀ ဃၣ်ဃၣ်လီၤ.
ယွၤအမံၤန့ၣ် အကါဒိၣ်ဆံးဒိၣ်လဲၣ်. ဆိကမိၣ်ကွၢ် ယ့ၣ်ၡူးခရံာ် သိၣ်လိပှၤ တၢ်ထုကဖၣ်အဒိန့ၣ်တက့ၢ်. စးထီၣ်ဝဲဒ်အံၤလီၤ– “အိၣ်လၢမူခိၣ်ပပၢ်ဧၢ, မ်နမံၤဘၣ် တၢ်ပာ်စီဆှံတက့ၢ်.” (မးသဲ ၆:၉) လၢခံ, ယ့ၣ်ၡူးဃ့ထုကဖၣ်လၢ ယွၤအအိၣ်ဒ်အံၤလီၤ– “ပၢ်ဧၢ, ဒုးလၤကပီၤနမံၤတက့ၢ်.” ကစၢ်ယွၤ စံးဆၢကဒါက့ၤအီၤလၢ မူခိၣ်ဒ်အံၤလီၤ– “ယဒုးလၤကပီၤလံ, ဒီးယကဒုး လၤကပီၤကဒီးလီၤ.” (ယိၤဟၣ် ၁၂:၂၇-၂၈) ဖျါတြၢၤကလာ်လၢ ယွၤအမံၤန့ၣ် အကါဒိၣ်ကတၢၢ်လီၤ. မ့မ့ၢ်ဒ်န့ၣ်ဒီး ပှၤကွဲးကျိးလံာ်တနီၤန့ၣ် ဘၣ်မနုၤအဃိ ပာ်လီၤတဲာ်မံၤအံၤလၢ အဝဲသ့ၣ် အလံာ်ကွဲးကျိးအပူၤဒီး ပာ်က့ၤဝဲလၢ မံၤလၤသၣ်ကပီၤတဖၣ်လဲၣ်.
လီၤဂာ်လၢ တၢ်ဂ့ၢ်မိၢ်ပှၢ် ခံမံၤအံၤအဃိလီၤ. တၢတမံၤန့ၣ် ခဲအံၤ တသ့ၣ်ညါလၢၤဝဲ မံၤအံၤ အတၢ်ကတိၤအသီၣ် အခီၣ်ထံးအဃိ ပှၤအါဂၤစံးဝဲလၢ တကြၢးသူအီၤဘၣ်လီၤ. လၢပျၢၤဧ့ၤဘြံၤအကျိာ်န့ၣ် တကွဲးဃုာ်ဝဲဒီး တၢ်သီၣ်မိၢ်ပှၢ်ဘၣ်. လၢတၢ်န့ၣ်အဃိ ပှၤလၢလံာ်စီဆှံအစိၤတဖၣ် မၤသီၣ်ဝဲ ယဟဝဟ ဒ်လဲၣ်န့ၣ်ခဲအံၤ ပှၤတသ့ၣ်ညါလီၤတံၢ် နီတဂၤဘၣ်. ဘၣ်ဆၣ် လၢတၢ်ဂ့ၢ်အံၤအဃိ တကြၢးပသူယွၤအမံၤဘၣ်ဧါ. လၢလံာ်စီဆှံအစိၤန့ၣ် မံၤလၢအမ့ၢ် ယ့ၣ်ၡူးန့ၣ် လီၤဂာ်လၢကသီၣ်လၢ ယဲးၡဝၤ မ့တမ့ၢ် ယဟိၡဝၤလီၤ—န့ၣ်ပှၤတဲလီၤတံၢ် တသ့နီတဂၤဘၣ်. ဘၣ်ဆၣ် မုၢ်မဆါတနံၤအံၤ ပှၤလၢ ဟီၣ်ခိၣ်ချၢတဖၣ်န့ၣ် ကိးဝဲယ့ၣ်ၡူးအမံၤလၢ အဝဲသ့ၣ်အကျိာ် ဒ်ပှၤသူအါအသိး ကိးဝဲလၢတၢ်သီၣ် အကလုာ်ကလုာ်န့ၣ်လီၤ. အဝဲသ့ၣ်တသ့ၣ်ညါ တၢ်ကတိၤအသီၣ်လၢ နံၣ်တၢကယၤအပူၤသနာ်က့ သူဝဲမံၤအံၤလီၤ. ဒ်န့ၣ်အသိးလီၤ, နမ့ၢ်လဲၤဆူ ထံဂၤကီၢ်ဂၤဒီး နကထံၣ်ဘၣ်လၢ နမံၤအသီၣ်လၢ ကျိာ်အဂၤန့ၣ် လီၤဆီဒိၣ်မးလီၤ. လၢတၢ်န့ၣ်အဃိ လၢပျၢၤ ကစၢ်ယွၤအမံၤ အသီၣ်လၢညါခီ တလီၤတံၢ်လီၤဆဲးန့ၣ် တမ့ၢ်တၢ်ဂ့ၢ်လၢ ပတဘၣ်သူအီၤဘၣ်.
တၢ်ဂ့ၢ်ခံမံၤတမံၤလၢ တၢ်ပာ်လီၤတဲာ် ယွၤအမံၤလၢ လံာ်စီဆှံပူၤန့ၣ် မ့ၢ်လၢပှၤယူဒၤဖိ အလုၢ်အလၢ်လၢပျၢၤ တမံၤအဃိလီၤ. ပှၤယူဒၤဖိအါမး နာ်ဝဲလၢ ယွၤအမံၤန့ၣ် တကြၢးပှၤကိးသီၣ်အကလုၢ်ဘၣ်. တၢ်နာ်အံၤန့ၣ် ဖျါလၢ တၢ်နၢ်ပၢၢ်ကမၣ် တၢ်မၤလိာ်အံၤအဃိလီၤ– “ပှ့ၤဘၣ်ယွၤနကစၢ်အမံၤလၢ တၢ်ကလီကလီတဂ့ၤ. အဂ့ၢ်ဒ်အံၤ, ပှၤလၢအပှ့ၤဘၣ် ယွၤအမံၤလၢ တၢ်ကလီကလီန့ၣ် ယွၤတပာ်ဘၣ်အီၤလၢ အတၢ်ဒဲးဘးတအိၣ်ဘၣ်န့ၣ်ဘၣ်.”—၂ မိၤၡ့ ၂၀:၇.
တၢ်မၤလိာ်အံၤ မ့ၢ်ဒၣ်တြီဝဲဒ်သိး ပှၤသုတသူကမၣ် ယွၤအမံၤအဂီၢ်လီၤ. ဘၣ်ဆၣ် မ့ၢ်တြီဝဲတၢ်သူ ကစၢ်အမံၤလၢ တၢ်ယူးယီၣ်ပာ်ကဲန့ၣ်ဧါ. တမ့ၢ်ဘၣ်. ပှၤလၢအကွဲး လံာ်ဧ့ၤဘြံၤ (လံာ်စီဆှံ အလီၢ်လံၤတကတြုၢ်) တဖၣ်န့ၣ် မ့ၢ်ပှၤတီပှၤလိၤလၢ အအိၣ်မူတ့ၢ်ဖဲ ယွၤဟ့ၣ်ပှၤအံၣ်စရ့လးဖိ လၢပျၢၤတဖၣ် တၢ်မၤလိာ် အဆၢကတီၢ်န့ၣ်လီၤ. ဘၣ်ဆၣ် အဝဲသ့ၣ်သူဝဲ ယွၤအမံၤ တဘျုးဘျီလီၤ. အဒိ, ပာ်ဖျါဝဲလၢ ထါစံးထီၣ်ပတြၢၤအပူၤ ပှၤဘူၣ်ထီၣ်ဘါထီၣ်တၢ်တဖၣ် သးဝံၣ်ဝဲဒီကရူၢ်လၢ အကလုၢ်ဖးဒိၣ်န့ၣ်လီၤ. ယဟိဝၤယွၤ နဲၣ်လိပှၤလၢအဘူၣ်ထီၣ် ဘါထီၣ်အီၤတဖၣ်လၢ ကကိးထီၣ် ကစၢ်အမံၤဒီး ပှၤလၢအတီတဖၣ်န့ၣ် စူၢ်ဝဲတၢ်ကလုၢ်အံၤလီၤ. (ယိၤအ့လး ၂:၃၂; မၤတၢ် ၂:၂၁) လၢတၢ်န့ၣ်အဃိ, ခရံာ်ဖိလၢ မုၢ်မဆါတနံၤအံၤတဖၣ်န့ၣ် ဒ်ယ့ၣ်ၡူးသူယွၤအမံၤအသိး အဝဲသ့ၣ်ကသူယွၤအမံၤလၢ တၢ်ယူးယီၣ်ပာ်ကဲအဂီၢ် တပျံၤဝဲဘၣ်.—ယိၤဟၣ် ၁၇:၂၆.
ပှၤကွဲးကျိးလံာ်စီဆှံတဖၣ်န့ၣ် မၤတၢ်ကမၣ်ဖးဒိၣ်ခီဖျိ ပာ်က့ၤမံၤလၤသၣ်ကပီၤလၢ ယွၤအမံၤအလီၢ်န့ၣ်လီၤ. အဝဲသ့ၣ် မၤဝဲလၢ ယွၤန့ၣ်ယံၤဒိၣ်မးဒီး လီၤဂာ်လၢ တမ့ၢ်ကစၢ်တဂၤဘၣ်လီၤ. နီၢ်နီၢ်န့ၣ် လံာ်စီဆှံဆီၣ်ထွဲ ပှၤကညီတဖၣ်လၢ ‘ကရ့လိာ်သးဒီး ယဟိဝၤ’ န့ၣ်လီၤ. (စံးထီၣ်ပတြၢၤ ၂၅:၁၄, ခစ) ဆိကမိၣ်ကွၢ် နတံၤသကိးလၢ ညီနုၢ်ရ့ဒီးနၤတဂၤ အဂ့ၢ်န့ၣ်တက့ၢ်. နမ့ၢ်တသ့ၣ်ညါ နတံၤသကိးအမံၤလ့ၤတက့ၤဘၣ်ဒီး နကဘူးဒီးအီၤ ထဲလဲၣ်. ဒ်န့ၣ်အသိးလီၤ ပှၤကညီတဖၣ် မ့ၢ်ကွၢ်ကပာ်ယွၤအမံၤ, ယဟိဝၤ, န့ၣ်အဝဲသ့ၣ် ဘူးဒီးယွၤကသ့ဒ်လဲၣ်. အါန့ၢ်အန့ၣ်, ဖဲအဝဲသ့ၣ် တသူယွၤအမံၤအခါ ဘၣ်ဒုးလီၤမၣ်ဝဲ တၢ်သ့ၣ်ညါနၢ်ပၢၢ်လၢ ဘၣ်ဃးဒီး မံၤအံၤ အခီပညီလၢပှဲၤန့ၣ်လီၤ. ယွၤအမံၤ အခီပညီမ့ၢ် မနုၤလဲၣ်.
ကစၢ်ယွၤအနီၢ်ကစၢ်ဒၣ်ဝဲ တဲနၢ်ပၢၢ်ဝဲ အခ့အပှၤတီလိၤလၢအမ့ၢ် မိၤၡ့လၢ အမံၤအခီပညီန့ၣ်လီၤ. ဖဲမိၤၡ့ သံကွၢ် ယွၤအမံၤအဂ့ၢ်အခါ ယဟိဝၤ စံးဆၢအီၤဒ်အံၤလီၤ– “ယမ့ၢ်တၢ်လၢ ယမ့ၢ်လီၤ” (၂ မိၤၡ့ ၃:၁၄) ရီးသဟၣ်လံာ်စီဆှံကွဲးကျိးန့ၣ် ကွဲးကျိးဝဲ တၢ်ကတိၤအံၤလၢ– “တၢ်လၢယအဲၣ်ဒိးအသိးန့ၣ် ယကဒုးကဲထီၣ်လီၤ.” လၢတၢ်န့ၣ်အဃိ ယဟိဝၤ အတၢ်တိာ်ပာ် ကလၢပှဲၤထီၣ်အဂီၢ် တၢ်လၢအလိၣ်န့ၣ် မၤဝဲသ့လီၤ.
ပစံးဒၣ်ကလိာ်လၢ ကယဲၢ်တၢ်လၢနအဲၣ်ဒိး ဒုးကဲထီၣ်န့ၣ် နဒုးကဲထီၣ်အီၤမ့ၢ်သ့ဒီး လၢနတံၤသကိးတဖၣ်အဂီၢ် နကမၤတၢ်မနုၤလဲၣ်. နသကိးတဂၤ မ့ၢ်ဆါနးနးကလဲာ်ဒီး နကကဲထီၣ်ကသံၣ်သရၣ် စဲၣ်နီၤတဂၤဒီး နကမၤဘျါအီၤလီၤ. တံၤသကိးအဂၤတဂၤ ကျိၣ်စ့မ့ၢ်လီၤမၣ်ဒီး နကဲထီၣ်သ့ ပှၤမၤစၢၤတၢ်လၢ အထူးတီၤတဂၤဒီး နကသုးကျဲၤန့ၢ် အတၢ်ကီတၢ်ခဲ တဖၣ်န့ၣ်လီၤ. ဘၣ်ဆၣ် နီၢ်နီၢ်န့ၣ် နအိၣ်ဒီးတၢ်တလၢပှဲၤလၢ တၢ်လၢနဒုးကဲထီၣ်သ့အပူၤန့ၣ်လီၤ. ပဝဲသ့ၣ်ခဲလၢာ် ပတလၢပှဲၤဘၣ်. ဖဲနမၤလိ လံာ်စီဆှံအခါ နကကမၢကမၣ်ဒီး သ့ၣ်ညါဘၣ်လၢ ယဟိဝၤ အတၢ်စံးပာ်တဖၣ် ကလၢပှဲၤအဂီၢ် ကယဲၢ်တၢ်လၢအလိၣ်န့ၣ် ကစၢ်မၤကဲထီၣ်ဝဲသ့လီၤ. ကစၢ်ဘၣ်အသးလၢ သူဝဲအစိကမီၤလၢ ပှၤလၢအဲၣ်အီၤတဖၣ် အဘျုးအဂီၢ်န့ၣ်လီၤ. (၂ ကွဲးနီၣ်တၢ် ၁၆:၉) မ့မ့ၢ်ပှၤလၢ တသ့ၣ်ညါ ယဟိဝၤအမံၤတဖၣ်န့ၣ် တသ့ၣ်ညါဘၣ်ဝဲ ကစၢ်အတၢ်ဂ့ၤတၢ်ဝါလၢ အဃံလၤတဖၣ်ဘၣ်.
ဖျါတြၢၤကလာ်လၢ ယဟိဝၤအမံၤန့ၣ် အိၣ်လၢလံာ်စီဆှံပူၤလီၤ. တၢ်သ့ၣ်ညါ မံၤအံၤအခီပညီဒီး တၢ်သူမံၤအံၤလၢ တၢ်ဘူၣ်ထီၣ်ဘါထီၣ်အပူၤလၢ တၢ်သဘျ့န့ၣ် ကဲထီၣ်တၢ်မၤစၢၤလၢ ပကဘူးအါထီၣ်ဒီး ပပၢ်အိၣ်လၢမူခိၣ်, ယဟိဝၤန့ၣ်လီၤ. *
^ လံာ်အဆၢ. 3 နမ့ၢ်အဲၣ်ဒိး သ့ၣ်ညါအါထီၣ် တၢ်ဂ့ၢ်ဘၣ်ဃးဒီး ယွၤအမံၤ, တၢ်အံၤအခီပညီ, ဒီးပကြၢးသူမံၤအံၤလၢ တၢ်ဘူၣ်ထီၣ် ဘါထီၣ်အပူၤန့ၣ် ကွၢ်ဘရိၣ်ခၠၣ်လၢ ယဟိဝၤ အပှၤအုၣ်အသးတဖၣ် ထုးထီၣ်ဝဲလၢအမ့ၢ် မံၤစီဆှံလၢ ကအိၣ်လီၤထူလီၤယိာ် န့ၣ်တက့ၢ်.
တၢ်ဂ့ၤအဂၤလၢ နကဘၣ်သး
လံာ်စီဆှံ အတၢ်သိၣ်လိလၢ အရ့ဒိၣ်တဖၣ်
ကစၢ်ယွၤန့ၣ် အမံၤအိၣ်ဧါ
ကစၢ်ယွၤအိၣ်ဒီး အမံၤလၤသၣ်ကပီၤဒီဒူၣ်ညါ. အဒိ သ့တၢ်လၢာ်ကစၢ်, တၢ်ဘၣ်တ့ကစၢ်, ဒီးကစၢ်လီၤ. ဘၣ်ဆၣ် ကစၢ်ယွၤအမံၤနီၢ်ကီၢ်န့ၣ် အိၣ်ဝဲလၢ လံာ်စီဆှံအပူၤ အဘျီ ၇,၀၀၀ ဃၣ်ဃၣ်န့ၣ်လီၤ.
