MOBIBELI zoge, ngapi omu va toroka Episarome 83:18? New World Translation of the Holy Scriptures kuuyunga movelise ezi asi: “Yipo vantu ngava dive asi nyove, gedina Jehova, ove nyovelike Munene-nene pevhu nalinye.” Matoroko gamwe goBibeli kuuyunga yokulifana. Nampili ngoso, matoroko gomanzi kapi aga ruganesa edina Jehova. Bibeli zoRukwangali azo kwa pinganesera po situmbwisiso “HOMPA.” Ngano yinke va ruganesa movelise ezi? Situmbwisiso ndi edina Jehova?

Velise ezi kuuyunga kuhamena edina. MoRuhebeli rwene omu sinzi soBibeli va zi tjangere, edina lyokulikerera kwa moneka mo. Alyo kwa li tjanga ngesi יהוה (YHWH) monondanda doRuhebeli. MoRukwangali kuruganesa edina “Jehova.” Olyo edina kwa moneka tupu movelise zimwe zoBibeli ndi? Hawe. Kwa moneka moMatjangwa gomuhowo goRuhebeli yikando konyara 7 000!

Ngapi omu lya kara nomulyo edina lyaKarunga? Tarurura ekanderero lyosihonena eli ga geve Jesus Kristusa. Alyo kutameka ngesi: “Guhyetu gemeguru. Edina lyoge ava li pongore.” (Mateusa 6:9) Konyima, Jesus ga ya kanderere kwaKarunga asi: “Tate, yererepeka edina lyoge!” Melimbururo, Karunga ga uyungire kutundilira meguru, asi: “Na li yererepeka, nye ngani li yererepeka hena.” (Johanesa 12:28) Ya zera, edina lyaKarunga alyo mulyo unene-nene. Morwasinke nye vatoroki vamwe va gusa mo edina eli momatoroko gawo goBibeli ntani nokutura po yitumbwisiso?

Kumoneka ngwendi pwa kara nokonda mbali dononene. Zomuhowo, wovanzi kuuyunga asi edina ngano kapisi va li ruganese morwa kapi vana diva asi ngapi omu ngava li tumbura mosiruwo sanare. Ruhebeli rwanare kwa ru tjenge pwa hana nondandazwi. Yipo nye, kwato gumwe naina ga diva nawa-nawa omu vantu moyiruwo yoBibeli ngava tumbura YHWH. Nampili ngoso, eyi ngano yi tu kondere nye mokuruganesa edina lyaKarunga  ndi? Moyiruwo yoBibeli, edina Jesus pamwe ngava li tumbura asi Yesua ndi Yehosua—kwato gumwe na vhura kukara nousili. Nye, vantu mouzuni naunye naina kuruganesa marupe gokulisiga gedina Jesus, kulitumbura monkedi ezi za divikwa momaraka gawo. Awo kapi ava singanyeke kuruganesa edina morwa yeeyi tupu kapi va diva omu ngava li tumbura mouye wokuhova. Mokulifana, nsene to zi kosirongo sapake, kuvhura o ka gwane asi edina lyoge kuzuvhika mwapeke meraka lyawo. Yipo nye, kudira kudiva nawa yitumbwisiso yanare yedina lyaKarunga kapisi yizo konda zokudira kuliruganesa.

Konda zauvali ava gava mokugusa mo edina lyaKarunga moBibeli kwa kara mo mpo zanare zoVajuda. Wovanzi kwa pura asi edina lyaKarunga ngano narumwe si kulitumbura. Epuliro eli kwa tunda mediro kukwata egano veta zoBibeli ezi za tanta asi: “Walye o tumbagura edina lyaHOMPA Karunga goge mawoko-woko, yeeyi HOMPA kuhandukira ogu a tumbagura edina lyendi mawoko-woko.”—Exodus 20:7.

Veta ezi kusilika eruganeso lyedina lyaKarunga mawoko-woko. Nye azo kusilika kuruganesa edina lyendi mefumadeko ndi? Hawe. Vatjangi woBibeli zoRuhebeli (“Etestamende lyEkurukuru”) navenye kwa kere vagara wokulimburukwa ava va parukire moVeta ezi ga geve Karunga koVaisraeli vanare. Nye, ngava ruganesa nkenye apa edina lyaKarunga. Pasihonena, awo va li tulire mo momapisarome gomanzi aga za dimbire mbunga zovakareli mokuziguruka. Jehova Karunga kwa pangerere vakareli vendi mokuzigida edina lyendi, ntani wovalimburukwi va yi rugene. (Yirugana 2:21) Vakriste naina kapi vana kusinganyeka mokuruganesa edina lyaKarunga mefumadeko, ngamoomu tupu ga yi rugene Jesus.—Johanesa 17:26.

Mokupinganesera edina lyaKarunga noyitumbwisiso, vatoroki woBibeli kwa tulire epuko lyenene. Awo kuninka Karunga a moneke ngwendi ure ntani kapisi muntu, siruwo oso Bibeli kutumangeda vantu ‘mokulikwata ukwawo’ naJehova. (Episarome 25:14) Gazadara malikwatakano nakaume koge. Ngapi ngano omu ngomu likara sili pepi nsene kapi wa lironga edina lyakaume koge? Mokulifana, vantu nsene kuvahorekera edina lyaKarunga, Jehova, ngapi omu nava vhura kukara pepi naKarunga nawa-nawa? Kugwederera ko, apa ava dili kuruganesa vantu edina  lyaKarunga, awo kapi hena va diva ntanto zalyo zongwa. Yinke ali tanta edina lyaKarunga?

Karunga mwene ga fatwilire ntanto zedina lyendi komukareli gwendi gokulimburukwa Mosesa. Apa ga pulire Mosesa kuhamena edina lyaKarunga, Jehova ga limbwilire asi: “Ngani kara eyi ngani kara.” (Exodus 3:14, NW) Etoroko lyaRotherham kuruganesa nonkango odo asi: “Ame ngani kara nkenye eyi na hara.” Kutanta asi Jehova kuvhura kukara nkenye eyi ya hepa po mokusikisa mo sitambo sendi.

Tu ninke nye asi ove ngano kuvhura kukara nkenye eyi ono hara. Yinke ngano ngo ruganena vakaume woge? Nsene gumwe gwawo a vera unene, ove ngano kuvhura kukara ndokotora nokumuverura. Nsene gwapeke ta hepa kezumbaneso yimaliwa, ngano ove kuvhura kukara ngawo nokumuvatera. Nye, usili wou asi, ove kwa kara nesiliko mokukara nkenye eyi o hara kukara. Natuvenye kwa kara nesiliko. Moomu tupu no lironga Bibeli, ngo ya tetuka mokumona omu Jehova ga kara nkenye eyi ya hepa po mokuvhura kusikisa mo matumbwidiro gendi. Ntani age kumuhafesa mokuruganesa nonkondo dendi kowo va mu hara. (2 Histoli 16:9) Yikara eyi yoyiwa yountu waJehova ya zumbana kowo va dira kudiva edina lyendi.

Ya zera, edina lyaJehova lya kona kuliruganesa moBibeli. Kudiva ntanto zalyo ntani kuliruganesa memanguruko moukereli wetu, ago mavatero gononkondo mokuhedera pepi kwaGuhyetu gemeguru, Jehova. *