Ru Mungu Niri​—Eri ma Ayuza Azini Ifini

MI MA Biblia ma alea, Zaburu 83:18 la ngoni ya? The New World Translation of the Holy Scriptures ma alea vasi ’di la ’dini: “’Ba yi ma ni ani kini mi’i a’dule, omvele Yehova’iri, mi ovu Uru Tu angu wudrikuru dria ma driliari’i.” Biblia ’bani oja ti ndu ndu si kakau ’diyi laki vini tro tro alu ’dile. Te vini indi, Biblia azi ’bani oja ’diyi ma azi nzeki ru Yehova ’diri te, parinia ’baki lu “Opi” kaniku “Mungu” a’dule. Le afa ’ba ma ayu vasi ’di ma alea ri a’du ni ya? Geri ’bani agu azi omvezu ri i kaniku ru Yehova i ri?

Vasi ’di nze e’yo ru ma dria. Ti ’bani ndra Biblia ma ndeni sizu ’ba Ebrania ’diyi ni risi, ru isi ndu a’dule ’diri ’dia ci. Ti Ebrania nisi ’ba si eri ’dini יהוה (YHWH). Lugbara ti si, ’ba ru nde ri omve “Yehova” i. Ru ’dari lu Biblia ma alea vasi alu ma alea ya? Yo. E’yo Siza ndra Ebrania tisi okori ma alea eri ogogo pale 7000!

Ru Mungu niri ma orodri ngoni ya? Mi ’du nga ecetasi izita ndra Yesu Kristoni imba ri. E’doru ’dini: “Ata amani ovupi ’buari, ru mini ma ovu inzizaru.” (Matayo 6:9) Vutinia, Yesu nga Mungu zi ’dini: “Ata, mi fe mi ru ma ovu dizaru.” Eri omvizu ria, Mungu nga e’yo nze engazu ’bua ’yo kini: “Ma ’ba eri dizaru ’bo, ma nga eri ’ba dizaru dika.” (Yohana 12:28) Adaru, ru Mungu niri orodriru tu. Ka di te ’dini, ’ba Biblia ojapi ’diyi ma azi nzeki ru nde ’diri te, dika ’baki parinia afa azi nduni ki i a’du ma e’yo si ya?

Asisile eyini fe riki iri. Okori, ’ba kakau kini le ’ba ma ayuki ru ’diri ku a’dusikuni geri ’bani eri omvezu kilili ri ’ba azi nini ku. Ti Ebraniani drio ri ndra nukuta a, e, i, o, u ri koko. Ani e’yo ’disi, ’ba azi andrusi ecopi ’yopi adaru kini ’ba ndra o’api ewu Biblia sizo risi ri ma alea ’diyi ki ru YHWH ’diri omve ’dini ni yo. Te, le di ’di ma oga amani ru Munguniri  ayuko si ya? Ewu ndra ’bani Biblia sizo ri ma alea, ru Yesu ’diri ’ba ndra omve Yeshua kaniku Yehoshua—’ba azi aluni econi omve kilili ku. Te andrusi, ’ba wudrikuru drisi dria ki ru Yesu ’diri ayu, azini eyi eri omve ti eyini ri vu si. ’Yekini urisi ru nderi omvezu ku tro eyini ru nde ri ma omveza ndra ngonia’ri nizu ku ra ti. Vini indi ecetasi, mi ka mu suru azi amve ni ma alea geri ’bani mi ru omvezu ti ’dale risi ri eco ovu ndu. Ani e’yo ’disi, ru Munguniri ma omveza ndra oko risi ngoni’ari nizu ku ri ovuni asisile azi muke ’bani eri ayuzu ku ri ku.

Asisile azi irizo ’ba ni ru Munguniri nzezu Biblia ma aleasi te ri eri e’yo azi oku drio a’bi ni ’ba Yahudiru ’diyini ni. E’yo ’di eca tutuni azita azi Biblia ma alea ’bani ifini va onzi ’di ma dria: “Mi co Yehova Mungu mini ma ru toko toko ku; a’dusiku Yehova ngani ’ba eri ru copi tokori ku pirini e’yo kokoru ku.”—Efuza 20:7.

Azita ’di oga Mungu ma ru ayuzu toko toko si. Te oga Mungu ma ru ayuzu inzitasi ri ra ya? Ogani ku. ’Ba Biblia Ebrania tisi (e’yo okuri) sipi ’diyi ndra ’ba asi adaru be azita Munguni ndra anzi Israelini ’diyi ma dri cezu ri ma vuti obipi ’diyi ki. Te, eyi o’du driasi Mungu ma ru ayu. Ecetasi, eyi ’baki eri Zaburi kakau ru ndra o’bi ongulumuru ni ngo inzita ma alea ria indi. Yehova Mungu fe vini azita ’ba i inzipi ’diyi pini ru ini omvezu, ani ’ba a’ita be ’diyi obiki azita ’di ma vuti ra. (Yoeli 2:32; ’Yeta 2:21) Ani e’yo ’disi, Kristiani kukini ru Munguniri ayuzu inzitasi ri ku, ekile Yesu ni ndra ’yele rile.—Yohana 17:26.

Mungu ma ru nzezu te risi, ’ba Biblia ojapi ti ndu ndu si ’diyi edeki ezata angiri ni. Eyi fe Munguni e’da ani’bo ru kaniku ’ba asipi ku ni ru, isu deresi Biblia ni ama a’i “agyi ndepi niri sizu Yehova be.” (Zaburi 25:14, NW) Mi ega nga e’yo agyi mini ndepi niri ma dria. Mini ega risi mi ka agyi mini ndepi niri ma ru ni ku emi o’ata eribe ri nga adri ngoni? Tro tro ’dile, ’ba ka fe ’bani ru Munguni, Yehova i ri ni ku, ecoki di nga eca agyi adari ’bazu Mungu be ngoni ngoni ya? O’bazu ’da ma dria, ’ba ka ki Mungu ma ru ayu ku, cakini ru nde ma ifi ngoni’ari ni ku. Ru nde Munguniri ma ifi di ngoni ya?

 Mungu ma ngulupi ece i ma ru ma ifi ati’bo ini asi adaru be Musa ni ra. Musa ni ndra Mungu ma ru zizu ria, Yehova nga omvi dini: “Ma indi mani ovule indi rile.” (Efuza 3:14) Biblia Rotherham ni oja ri si vasi ’diri ’dini: “Ma nga eca afa ci mani lele ri ru.” Adaru Yehova eco eca afa ci erini lele ri ru ra ecozu e’yo erini leleri ’yezu.

Ecetasi mi ka ta eco eca afa ci ri ru ra mi ta nga a’du afa ’ye? Mi ta nga mi agyika ni a’du afa ’ye? Eyi ma azi aluni ka ta eca azoru onzi onzi, mi eco ta eca dakitari kilili ni ru eri atizu. Alio ka ta azini nde kayi kayi, mi eco ta eca ’ba lonyi be ni ru eri ma alio atizu. Te, e’yo adari ’di, mi econi eca afa ci mini lele ri ru ku. Ama dria vini alu ’dile. Mini mu ria drile Biblia ma oniza be ria, mi nga o’a osuta si nezu kini Yehova eco eca afa ciri ru oyo soza erini ’diyi ki ’yezu. Dika eri o’a ayikosi okpo iniri ayuzu ’ba eri lepi ’diyi ma aza kozu. (2 Suru ma E’yo 16:9) E’yo onyiru Yehova ma dria ’diyi ’ba eri ma ru nipi ku ’diyi nikini ku.

Adaru, ru Yehova ’di le ma ovu ayuzaru Biblia ma alea. Ru nderi nizu azini ayuzu inzita amani ma alea ri nga ama aza ko esizoru ama Ata ’bua ri vu enyia ogogo. *

[E’yo sile eleleru ri]

[E’da peji ma alea ri 195]

Ru Munguni ti Ebraniani si ri