EMU Baibul ai Salamo 83:18 be ede e hahanaia toma? Buka Helaḡa ai una siri na ini e hahanaia toma: “Ba hadibadia, bena bae diba, oi ladamu na Iehova; oi mo sibomu Herea Mikamika, tanobada idoinai daenai.” Baibul haida ai danu unu e hahanaia toma. To, Baibul momo ai ina lada Iehova na e kokia, bona gabunai na ini dagi ladadia “Lohiabada” eiava “Dirava” e atoa. Una siri ai edena baine mia be namo, dagi ladana eiava ina lada Iehova?

Una siri na lada ta e herevalaia. Heberu gado​—Baibul kahana badana e torea gadona​—ai una siri lalonai na lada idau hereana ta mia. Una lada na ini Heberu letadia יהוה (YHWH) ai e tore. Motu gado ai una lada e hahanaia na “Iehova.” Una lada be Baibul siri tamona ai mo e hedinarai, eiava? Lasi. Heberu Toretoredia ginigunadia ai na nega 7,000 bamona e hedinarai!

Dirava ladana be mai anina bada, eiava? Iesu Keriso ese e hahedibalaia ḡuriḡurina mani aita laloa. Ini e hamatamaia toma: “Tamamai e, guba ai o nohomu, oi ladamu baia hahelaḡaia.” (Mataio 6:9) Gabeai, Iesu na Dirava e ḡuriḡuri henia: “Tamagu e, ladamu a heatolaia.” Bena, Dirava ese guba amo e haere henia, eto: “Vada name heatolaia; ma baina heatolaia.” (Ioane 12:28) E hahedinaraia ḡoevaḡoevamu, Dirava ladana na mai anina bada. To, dahaka dainai Baibul e hahanaia taudia haida ese Dirava ladana na e kokia bena gabunai dagi ladadia e ato?

Unu e kara toma badidia na rua. Ginigunana na, momo na e laloamu una lada basita ḡaukaralaia na namo, badina guna e gwauraiava dalana na asi dibada. Idaunegai Heberu gado toretoredia ai, vowels (a, e, i, o, u) na lasi. Una dainai, Baibul negadiai e nohova taudia ese YHWH e gwauraiava dalana hari na ta asi dibana. Anina be Dirava ladana da basita ḡaukaralaia, eiava? Baibul negadiai, Iesu ladana na reana e gwauraiava Yeshua eiava Yehoshua​—igwauraina dalana maorona na ta asi dibana. To hari,  tanobada heḡeḡemadai taunimanima ese Iesu ladana na dala idauidau ai e gwauraiamu, edia gado ai e gwauraiamu dalana heḡereḡerena. Ena be aposetolo edia negai e gwauraiava dalana na asi dibadia, to una lada na dounu e ḡaukaralaiamu. Una heḡereḡerena, bema oi na tano idauna ta ai bo a loaloamu, reana unuseniai ladamu be gwauraiamu dalana na idau. Una dainai, Dirava ladana baita ḡaukaralaia na namo, ena be idaunegai e gwauraiava dalana na asi dibada.

Badi iharuana na, Iuda taudia sibodia ese e atoa taravatuna ta dainai, Baibul amo Dirava ladana e kokia. Idia momo na e laloava Dirava ladana basie gwauraia na namo. Una lalohadai e abia badina ina Baibul taravatuna na e badinaia kerere: “Iehova emu Dirava ladana na basio hatoa kava hatoa kava; badina be Iehova ladana baine hatoa kava tauna na Iehova basineto ia na asi ena kerere.”​—Esodo 20:7.

Una ese Dirava ladana bae gwauraia kava gwauraia kava karana e taravatua. To, mai hematauraida ida una lada baita ḡaukaralaia karana be e taravatua, eiava? Lasi. Heberu Baibul (“Taravatu Gunana”) e torea taudia na abidadama taudia, idia na Dirava ese Israel taudia e henidia Taravatudia e badinava taudia. Idia na hanaihanai Dirava ladana e ḡaukaralaiava. Heḡereḡere, idia ese salamo anedia momo lalodiai Dirava ladana na e torea. Danu Iehova Dirava ese ia e tomadiho heniava taudia na e hadibadia ia ladana bae hahanea, bona abidadama taudia na unu e kara toma. (Ioel 2:32; Kara 2:21) Una dainai, hari ina negai Kristen taudia na mai hematauraidia ida Dirava ladana e ḡaukaralaiamu, Iesu e kara heḡereḡerena.​—Ioane 17:26.

Baibul e hahanaia taudia ese Dirava ladana gabunai dagi ladadia e ato na kerere badana. Vaitani idia na e gwaumu Dirava na ita eda amo na daudau bona se lalodamu, to Baibul ese ita e hagoadadamu ‘Iehova ihetura’ henina karana baita habadaia. (Salamo 25:14) Mani turamu namona ta a laloa. Bema ladana na so dibaia, basio gwau dibamu ia na oi turamu namona, ani? Una heḡereḡerena, taunimanima ese Dirava ladana, Iehova, basie dibaiamu neganai, idia na ia turana namona ai basiela diba. Danu, taunimanima ese Dirava ladana asie ḡaukaralaiamu neganai, una lada anina korikorina danu asie dibamu. Dirava ladana anina be dahaka?

 Dirava sibona ese ia ladana anina na ena abidadama hesiai tauna Mose enai e gwauraia hedinarai. Mose ese Dirava ladana e henanadailaia neganai, Iehova na e haere: “Dahaka ai na uramu baina hahelao na vada baina hahelao.” (Esodo 3:14, NWT) Una dainai Iehova na iena ura ihaḡuḡurudia totona dahaka ai e uramu baine hahelao na baine hahelao diba, bona e havaradia ḡaudia na ena ura heḡereḡerenai baine ḡaukaralaidia diba, iena ura baine haḡuḡurudia totona.

Bema oi na sibomu ḡau idauidau ai ba hahelao diba, oi be turamu daidiai dahaka bo karamu? Bema idia ta na bema gorere, oi na dokta ai boma lao bena ena gorere boma hanamoa. Bema ma ta na moni dalanai bema hekwakwanai, oi na taḡa tauna ai boma lao bena boma durua. To, ita na dia heḡereḡere taunimanima idauidau ai baita hahelao diba. Baibul bo stadilaiamu lalonai, bo hoamu badina Iehova na ḡau idauidau ai baine hahelao diba, ena gwauhamata baine haḡuḡurudia totona. Bona mai moalena ida ia e lalokau heniamu taudia daidiai ena siahu e ḡaukaralaiamu. (2 Sisiga 16:9) Iehova ladana asie dibaia taudia ediai Iena kara namodia na dia hehedinararai.

Eme hedinarai ḡoevaḡoeva, Baibul ai ina lada Iehova baine mia na namo. Una lada anina ta dibamu bona eda tomadiho lalonai baita ḡaukaralaia karana ese baine duruda Tamada Iehova baita raka henia kahi. *