သင့်ကျမ်းစာထဲမှာ ဆာလံ ၈၃:၁၈ ကို ဘယ်လို ဘာသာပြန်ထားသလဲ။ ကမ္ဘာသစ်ဘာသာပြန်ကျမ်းစာမှာ အဲဒီအခန်းငယ်ကို ဒီလို ပြန်ဆိုတယ်– “ယေဟောဝါလို့နာမည်ရှိတဲ့ ကိုယ်တော်တစ်ပါးတည်းသာ မြေကြီးတစ်ပြင်လုံးပေါ်မှာ အမြင့်ဆုံးအရှင်ဖြစ်တယ်ဆိုတာကို လူတွေသိလာကြပါလိမ့်မယ်။” တခြားဘာသာပြန်ကျမ်းများစွာမှာလည်း အဲဒီလိုပဲ ပြန်ဆိုကြတယ်။ ဒါပေမဲ့ ဘာသာပြန်ကျမ်းများစွာမှာ ယေဟောဝါဆိုတဲ့နာမည်ကို ချန်လှပ်ထားကြပြီး အဲဒီနေရာမှာ “သခင်” ဒါမှမဟုတ် “ထာဝရဘုရား” ဆိုတဲ့ ဘွဲ့တွေကို အစားထိုးကြတယ်။ ဒီအခန်းငယ်မှာ ဘာကိုဖော်ပြသင့်သလဲ။ ဘွဲ့တစ်ခုလား၊ ယေဟောဝါဆိုတဲ့ နာမည်လား။

ဒီအခန်းငယ်က နာမည်အကြောင်း ပြောနေတာဖြစ်တယ်။ ကျမ်းစာစောင်အတော်များများ ရေးသားရာမှာအသုံးပြုခဲ့တဲ့ မူရင်း ဟေဗြဲဘာသာစကားမှာ ဒီအခန်းငယ်မှာ ထူးခြားတဲ့နာမည်တစ်ခုကို ဖော်ပြထားတယ်။ ဟေဗြဲအက္ခရာနဲ့ יהוה (ယဟဝဟ) လို့ စာလုံးပေါင်းထားတယ်။ မြန်မာဘာသာနဲ့ အဲဒီနာမည်ကို “ယေဟောဝါ” လို့ပြန်ဆိုကြတယ်။ ဒီနာမည်က အဲဒီကျမ်းချက်တစ်ချက်တည်းမှာပဲ ပါသလား။ မဟုတ်ပါဘူး။ မူရင်းဟေဗြဲကျမ်းမှာ အကြိမ်ပေါင်း ၇,၀၀၀ နီးပါး ပါရှိတယ်။

ဘုရားသခင့်နာမည်က ဘယ်လောက်အရေးပါသလဲ။ ယေရှုခရစ်သင်ပေးခဲ့တဲ့ နမူနာဆုတောင်းချက်ကို သုံးသပ်ကြည့်ပါ။ အဲဒီမှာ “ကောင်းကင်ဘုံရှိ ကျွန်ုပ်တို့အဖ၊ ကိုယ်တော်၏နာမတော် သန့်ရှင်းမြင့်မြတ်ခြင်းရှိပါစေ” လို့အစပြုထားတယ်။ (မဿဲ ၆:၉) နောက်ပိုင်းမှာ ဘုရားသခင်ဆီကို ယေရှုက “အိုအဖ၊ ကိုယ်တော်၏နာမတော်ကို ဘုန်းထင်ရှားစေတော်မူပါ” လို့ဆုတောင်းခဲ့တယ်။ ဘုရားသခင်က ကောင်းကင်ကနေပြီး “ငါဘုန်းထင်ရှားစေခဲ့ပြီ။ တစ်ဖန် ဘုန်းထင်ရှားစေဦးမည်” လို့ တုံ့ပြန်ခဲ့တယ်။ (ယောဟန် ၁၂:၂၈) ရှင်းနေတာက ဘုရားသခင့်နာမည်ဟာ အရေးအကြီးဆုံးဖြစ်တယ်။ ဒါဆိုရင် ဘာသာပြန်သူတချို့က ဘာကြောင့် သူတို့ရဲ့ဘာသာပြန်ကျမ်းတွေမှာ အဲဒီနာမည်ကိုချန်လှပ်ပြီး ဘွဲ့တွေနဲ့ အစားထိုးခဲ့ကြတာလဲ။

အဓိက အကြောင်းရင်းနှစ်ခုကြောင့် ဖြစ်ပုံရတယ်။ ပထမတစ်ခုက အဲဒီနာမည်ရဲ့ မူလအသံထွက်ကို အခု မသိတော့လို့ အသုံးမပြုသင့်ဘူးလို့ လူအများက ပြောကြတယ်။ ရှေးခေတ်ဟေဗြဲဘာသာစကားကို သရမပါဘဲ ရေးသားခဲ့ကြတယ်။ ဒါကြောင့် ယဟဝဟကို ကျမ်းစာခေတ်ကလူတွေ ဘယ်လိုအသံထွက်ကြတယ်ဆိုတာ ဒီနေ့ ဘယ်သူမှ အတိအကျမသိဘူး။ ဒါပေမဲ့ ဒီအကြောင်းရင်းကြောင့် ဘုရားသခင်နာမည်ကို မသုံးဘဲနေသင့်သလား။  ကျမ်းစာခေတ်က ယေရှုဆိုတဲ့နာမည်ကို ယက်ရှဝါ ဒါမှမဟုတ် ယေဟောရှဝါလို့ အသံထွက်ခဲ့ဖွယ်ရှိတယ်။ အဲဒီနာမည်ရဲ့ အသံထွက်အတိအကျကို ဘယ်သူမှမသိဘူး။ ဒါပေမဲ့ ယနေ့ ကမ္ဘာတစ်ဝန်းမှာရှိတဲ့လူတွေက ယေရှုဆိုတဲ့နာမည်ကို သူတို့ဘာသာစကားမှာ အသုံးများတဲ့အတိုင်း အသံထွက်အမျိုးမျိုးနဲ့ ခေါ်ကြတယ်။ ပထမရာစုတုန်းက အဲဒီနာမည်ကို ဘယ်လိုအသံထွက်တယ်ဆိုတာမသိလို့ဆိုပြီး မသုံးဘဲမနေကြဘူး။ အဲဒီလိုပဲ သင်က တခြားနိုင်ငံတစ်ခုကို သွားမယ်ဆိုရင် အဲဒီမှာရှိတဲ့လူတွေက သင့်ရဲ့နာမည်ကို သူတို့ရဲ့ဘာသာစကားနဲ့ အတော်လေးကွဲပြားစွာ အသံထွက်ကြမှာပဲ။ ဒါကြောင့် ဘုရားသခင့်နာမည်ရဲ့ ရှေးခေတ်အသံထွက်ကိုမသိလို့ အဲဒီနာမည်ကို မသုံးဘူးဆိုတာက မှန်ကန်တဲ့အကြောင်းပြချက်မဟုတ်ဘူး။

ဘုရားသခင့်နာမည်ကို သမ္မာကျမ်းစာမှာ ချန်လှပ်ရတဲ့ ဒုတိယအကြောင်းရင်းက ဂျူးတွေရဲ့ ရှေးရိုးစွဲ ထုံးတမ်းစဉ်လာကြောင့်ဖြစ်တယ်။ ဘုရားသခင့်နာမည်ကို အသံထွက်ခေါ်ဖို့မသင့်ဘူးလို့ ဂျူးတွေက ယူဆကြတယ်။ ဒီအယူအဆက သမ္မာကျမ်းစာမှာပါတဲ့ ဒီပညတ်ကို နားလည်မှုလွဲတာဖြစ်တယ်– “သင်၏ဘုရားသခင် ထာဝရဘုရား၏နာမတော်ကို မုသာနှင့်ဆိုင်၍ မမြွက်မဆိုနှင့်။ အကြောင်းမူကား နာမတော်ကို မုသာနှင့်ဆိုင်၍ မြွက်ဆိုသောသူကို အပြစ်မရှိဟု ထာဝရဘုရား မှတ်တော်မမူ။”—ထွက်မြောက်ရာ ၂၀:၇။

ဒီပညတ်မှာ ဘုရားသခင့်နာမည်ကို တလွဲအသုံးမပြုဖို့ တားမြစ်ထားတယ်။ ဒါပေမဲ့ ကိုယ်တော့်နာမည်ကို ရိုသေလေးစားစွာ အသုံးပြုတာကို တားမြစ်တာလား။ မဟုတ်ပါဘူး။ ဟေဗြဲကျမ်း (ဓမ္မဟောင်းကျမ်း) ရေးသူတွေဟာ ရှေးခေတ်အစ္စရေးလူမျိုးကို ဘုရားသခင်ပညတ်ပေးခဲ့ချိန်မှာ အသက်ရှင်ခဲ့ကြတဲ့ သစ္စာရှိသူတွေဖြစ်တယ်။ ဒါပေမဲ့ သူတို့က ဘုရားသခင့်နာမည်ကို အကြိမ်ကြိမ် အသုံးပြုခဲ့ကြတယ်။ ဥပမာ၊ သူတို့တွေဟာ အသံကျယ်ကျယ်နဲ့ အုပ်စုလိုက်သီဆိုကြတဲ့ ဆာလံသီချင်းများစွာမှာ ဘုရားသခင့်နာမည်ကို အသုံးပြုခဲ့ကြတယ်။ ယေဟောဝါဘုရားသခင်က သူ့ရဲ့နာမည်ကိုခေါ်ဖို့တောင် သူ့ကိုဝတ်ပြုသူတွေကို ညွှန်ကြားထားပြီး သစ္စာရှိသူတွေက အဲဒီညွှန်ကြားချက်ကို လိုက်နာခဲ့ကြတယ်။ (ယောလ ၂:၃၂; တမန်တော် ၂:၂၁) ဒါကြောင့် ဒီနေ့ခရစ်ယာန်တွေဟာ ယေရှုလိုပဲ ဘုရားသခင့်နာမည်ကို ရိုသေလေးစားစွာ အသုံးပြုဖို့ မတွန့်ဆုတ်ကြဘူး။—ယောဟန် ၁၇:၂၆။

ကျမ်းစာဘာသာပြန်သူတွေဟာ ဘုရားသခင့်နာမည်နေရာမှာ ဘွဲ့တွေကို အစားထိုးခြင်းဖြင့် ကြီးလေးတဲ့အမှား ပြုလုပ်ခဲ့ကြတယ်။ သူတို့က ဘုရားသခင်ကို စိမ်းကားပြီးရင်းနှီးဖော်ရွေမှုမရှိတဲ့ ပုံစံမျိုးပေါက်အောင် ဖန်တီးခဲ့ကြတယ်။ အမှန်တော့ သမ္မာကျမ်းစာမှာ လူတွေကို ‘ယေဟောဝါနဲ့ ခင်မင်ရင်းနှီး’ မှုရယူဖို့ တိုက်တွန်းထားတယ်။ (ဆာလံ ၂၅:၁၄၊ ကဘ) သင်နဲ့ရင်းနှီးတဲ့မိတ်ဆွေတစ်ယောက်အကြောင်း စဉ်းစားကြည့်ပါ။ သူ့ရဲ့နာမည်ကို မသိဘူးဆိုရင် သင်တို့ ဘယ်လောက်ရင်းနှီးနိုင်မလဲ။ အလားတူပဲ လူတွေက ဘုရားသခင့်နာမည် ယေဟောဝါကိုလျစ်လျူရှုမယ်ဆိုရင် ဘုရားသခင်နဲ့ ဘယ်လိုရင်းနှီးနိုင်မလဲ။ ဒါ့အပြင် ဘုရားသခင့်နာမည်ကို အသုံးမပြုတဲ့အခါ အဲဒီနာမည်ရဲ့ အလွန်ကောင်းမွန်တဲ့အဓိပ္ပာယ်ကိုလည်း သူတို့ သိမှာမဟုတ်ဘူး။ ဘုရားသခင့်နာမည်ရဲ့အဓိပ္ပာယ်က ဘာလဲ။

 ဘုရားသခင်ကိုယ်တိုင်က သူ့နာမည်ရဲ့အဓိပ္ပာယ်ကို သစ္စာရှိကျေးကျွန်ဖြစ်သူမောရှေကို ရှင်းပြခဲ့တယ်။ မောရှေက ဘုရားသခင့်နာမည်အကြောင်းမေးတဲ့အခါ ယေဟောဝါက “ငါဖြစ်သည်အတိုင်း ငါဖြစ်၏” လို့ပြန်ဖြေခဲ့တယ်။ (ထွက်မြောက်ရာ ၃:၁၄) ရော့သဟမ်ဘာသာပြန်ကျမ်းက အဲဒီစကားတွေကို “ငါဖြစ်လိုသမျှအတိုင်း ငါဖြစ်မည်” လို့ပြန်ဆိုတယ်။ ဒါကြောင့် ယေဟောဝါဟာ မိမိရဲ့ရည်ရွယ်ချက်တွေကို ပြည့်စုံစေဖို့ လိုအပ်သလိုဖြစ်လာနိုင်တယ်။

သင်ဟာ သင်ဖြစ်ချင်တဲ့အရာမှန်သမျှ ဖြစ်လာနိုင်တယ်လို့ ဆိုကြပါစို့။ သင့်မိတ်ဆွေတွေအတွက် သင် ဘာလုပ်ပေးမလဲ။ သင့်မိတ်ဆွေတစ်ယောက်က အသည်းအသန်ဖျားနေတယ်ဆိုရင် သင်က ကျွမ်းကျင်တဲ့ဆရာဝန်တစ်ဦးဖြစ်သွားပြီး သူ့ကိုကုသပေးမှာဖြစ်တယ်။ နောက်မိတ်ဆွေတစ်ယောက်က ငွေကြေးဆုံးၡုံးသွားတယ်ဆိုရင် သင်က ချမ်းသာကြွယ်ဝတဲ့ အကျိုးဆောင်တစ်ဦးဖြစ်သွားပြီး သူ့ရဲ့ငွေရေးကြေးရေးပြဿနာကို ဖြေရှင်းပေးမယ်။ ဒါပေမဲ့ လက်တွေ့မှာတော့ သင်ဖြစ်လာနိုင်တဲ့အရာမှာ သင်ဟာ အကန့်အသတ်ရှိတယ်။ ကျွန်ုပ်တို့အားလုံးမှာ ကန့်သတ်ချက်ကိုယ်စီရှိကြတယ်။ သင် သမ္မာကျမ်းစာကိုလေ့လာတဲ့အခါ ယေဟောဝါဟာ မိမိရဲ့ကတိတော်တွေကို ပြည့်စုံစေဖို့ လိုအပ်တဲ့ ဘယ်အရာမဆို ဖြစ်လာနိုင်တယ်ဆိုတာ တအံ့တသြသိရှိရမှာဖြစ်တယ်။ ကိုယ်တော့်ကိုချစ်မြတ်နိုးသူတွေရဲ့ အကျိုးအတွက် မိမိရဲ့တန်ခိုးကို အသုံးပြုရတာကို ကိုယ်တော်ကျေနပ်အားရတယ်။ (၂ ရာဇဝင်ချုပ် ၁၆:၉) ယေဟောဝါရဲ့နာမည်ကို မသိသူတွေကတော့ ကိုယ်တော့်အရည်အသွေးတွေရဲ့ တင့်တယ်လှပတဲ့ ဒီအသွင်အပြင်တွေကို သိမှာမဟုတ်ဘူး။

သမ္မာကျမ်းစာမှာ ယေဟောဝါဆိုတဲ့နာမည် ပါတယ်ဆိုတာ ရှင်းနေပါတယ်။ ဒီနာမည်ရဲ့အဓိပ္ပာယ်ကိုသိရှိပြီး ကျွန်ုပ်တို့ရဲ့ဝတ်ပြုရေးမှာ လွတ်လွတ်လပ်လပ်အသုံးပြုခြင်းက ကျွန်ုပ်တို့ရဲ့ကောင်းကင်ဖခင် ယေဟောဝါနဲ့ ပိုရင်းနှီးစေဖို့ ကူညီပေးပါတယ်။ *