XIKITA moBiblia ipan Salmo 83:18 (ipan sekij Biblias Salmo 82:19). ¿Tlake kiijtoua? Ipan Traducción del Nuevo Mundo de las Santas Escrituras kiijtoua: “Ma kimatikaj maseualmej ta motoka Jehová, san ta tlauel tiUeyi ipan nochi Tlaltipaktli”. Onka miak Biblias tlen amo kiijtoua Jehová uan kipatlaj ika “toTeko” o “Dios”. Kej ni kichijtokej ipan Biblia Itlajtol Toteco. Ipan iamayo 1823 kiijtoua nopa tokajyotl Jehová kipatlatokej ika TOTEKO uan DIOS. Uajka, ¿tlake kinamikiskia nesis ipan ni texto? ¿San tlen sekij kiijtouaj, o tokajyotl Jehová?

Ipan Biblia tlen moijkuilok ika tlajtoli hebreo uala se tokajyotl tlen moijkuiloua יהוה (YHWH). Uan ika nauatl tikijtouaj Jehová. ¿Sampatsi nesi ni tokajyotl? Amo, pampa kema kiijkuilojkej Escrituras Hebreas nesiyaya nechka siete mil.

¿Kenke moneki tijtekiuisej toTeotsij itoka? Kema Jesús techmachtik kenijkatsa timomaijtosej, kiijtok: “ToTeko toTata [...]. Nochi tlakamej ma kiueyichiuakaj motoka” (Mateo 6:9). Teipa kiijtok: ‘Nochi tlakamej ma kiueyitlalikaj motoka’. Uan toTeotsij kinankilik: “Nijchijtok para ma nechueyitlalikaj uan sampa nijchiuas” (Juan 12:28). Uajka, tlauel moneki tijtekiuisej toTeotsij itoka. ¿Uan kenke sekij amo kiijkuilojtokej Jehová ipan Biblia uan kipatlatokej ika sekinok tlajtoli?

Miakej kiijtouaj amo ma tijtekiuikaj toTeotsij itoka pampa amo tijmatij kenijkatsa kitenkixtiyayaj. Uejkajkia ika hebreo amo kitekiuiyayaj nopa letras a, e, i, o uan u. Yeka amo aka kimati kenijkatsa kitenkixtiyayaj YHWH. Tojuantij kena tijtekiuiaj, pampa pano kej ika Jesús itoka. Uelis motenkixtiyaya Yeshúa o Yehoshúa. Maske amo tijmatij  kenijkatsa motenkixtiyaya uan mopatla ipan nochi tlajtoli, kena motekiuia. Tlaj tiaskia ipan seyok altepetl, tijkakiskia seyok tlamantli kitenkixtiaj motoka. Uajka, maske amo tijmatij kenijkatsa kitenkixtiyayaj toTeotsij itoka, moneki ma tijtekiuikaj.

Uejkajkia judáeuanij moiljuiyayaj amo kinamikiyaya kitokaxtisej Jehová, yeka amo kitlalijkej itoka ipan Biblias, pampa amo kikuamachilijkej ni tlanauatili: “Amo xikauilmatikaj notoka, niinmoTeko Dios [“Jehová”, TNM], pampa axkinamiki. Temachtli nijtlatsakuiltis tlen san kej ueli kitekiuia notoka” (Éxodo 20:7).

Ni tlanauatili kiijtoua kuali ma tijtekiuikaj toTeotsij itoka. Ni amo kiijtosneki amo uelis tijtekiuisej. Pampa katli kiijkuilojkej Biblia ika hebreo (Nopa Achtoui Tlajtoli) kineltokayayaj tlen toTeotsij kinnauatik israeleuanij. Uan inijuantij miakpa kitekiuijkej toTeotsij itoka. Kiijkuilojkej ipan miak salmos tlen ika kiuikachiuiliyayaj. Kema kinnauatik itekipanojkauaj ma kinojnotsakaj ika itoka, kej nopa kichijkej (Joel 2:32, TNM; Hechos 2:21, TNM). Ipan ni tonali, nojkia tijtekiuiaj toTeotsij itoka kej Jesús kichijki (Juan 17:26, TNM).

Katli kiixpolojkej toTeotsij itoka ipan Biblia, tlauel amo kuali kichijkej, pampa kichiua ma timoiljuikaj toTeotsij amo itstok uan amo uelis tijnechkauisej. Nopa amo nelia, pampa Biblia kiijtoua uelis timouampojchiuasej iuaya (Salmo 25:14). Tlaj tijpiaskia se mouampo uan amo tijmatiskia itoka, amo uelis tikijtoskia kuali timouika iuaya. Uajka, tlaj amo tijmatij toTeotsij itoka yon tlake kiijtosneki, amo uelis kuali timouikasej iuaya. Ma tikitakaj tlake kiijtosneki.

ToTeotsij kiiljuik Moisés tlake kiijtosneki itoka kema kinankilik: “Naja niitstok tlen nochipa niitstok” (Éxodo 3:14). O kej Rotherham kitlajtolkuepki: “Na nimochiuas tlen na nijnekis”. Ni kiijtosneki Jehová uelis mochiuas tlen ya kinekis uan kiampa uelis moaxitis tlen mosentlalijtok. Nojkia kiijtosneki ya uelis kichiuas se tlamantli tlen ya kichijchijtok  ma kichiua o ma mochiua tlen ya kinekis uan kiampa moaxitis tlen mosentlalijtok.

¿Kenijkatsa titepaleuiskia tlaj ueliskia timochiuas tlen tijnekiskia? Tlaj se mouampo kipiaskia se kokolistli, timochiuaskia titepajtijketl uan tijchikauaskia. Uan tlaj seyok kipoloskia miak tomij, timochiuaskia titominpixketl uan tijpaleuiskia. Maske tijnekiskia, amo tiueli, pampa tojuantij amo tiuelij timochiuaj tlen tijnekiskiaj. Ipan Biblia tikitas Jehová kena ueli mochiua nochi uan kichiua tlen ya kineki. Ya kipaktia kinpaleuis katli kiikneliaj (2 Crónicas 16:9). Katli amo kimatij itoka, amo kimatij tlake kuajkuali tlamantli kinextia Jehová.

ToTeotsij itoka moneki nesis ipan Biblia. Uan tlaj tijmatisej tlake kiijtosneki tokajyotl Jehová uan tijtekiuisej kema tijueyichiuasej, techpaleuis ma tijnechkauikaj. *