XTLAPO moBiblia ipan Salmo 83:18 (82:19 ipan okseki Biblias). ¿Tlenon kijtoua? Ipan Traducción del Nuevo Mundo de las Santas Escrituras kijtoua: “Nochimej tlaltikpakchanejkej makimatikan ika tejua, akin motoka Jehová, san tejua tiUeyixtika ipan nochi tlaltikpaktli”. Ipan okseki Biblias noijki ijkon kitlajtolkuepaj. San ika, ipan miyek Biblias xkitlaliaj itoka Jehová, kitlaliaj san ika ken kixmatij “toTeko” noso “toTajtsin”. Kuakon, ¿tlenon noneki uajnestias ompa? ¿Tlen ika kixmatij, noso itoka Jehová?

Ompa nesi se tokayotl. Ika tlajtojli hebreo, tlen ika onoijkuilo miyek amoxtin tlen uajlauej ipan Biblia, uajnestiuj se tokayotl. Yejuin noijkuiloua ika letras hebreas יהוה (YHWH). Niman ika náhuatl tikijtouaj Jehová niman Yavé. ¿San sejpa uajnestiuj ipan Biblia? Ka, pampa uajnestiaya kanaj siete mil ijkuak onoijkuilo ika hebreo.

¿Melak noneki matiktekitiltikan itokayo toTajtsin? Matitlanemilikan itech padrenuestro, teoyotl tlen okijto Jesucristo. Kijtoua: ‘ToTajtsin akin tinemi ne iluikak, ma mitsueyichiua nochi tlakatl’ (Mateo 6:9). Sakin ijkuak yotemachti yejuin teoyotl, Jesús okitlatlaujti toTajtsin: “NoTajtsin, xchiua para ma mitsueyilikan”. Niman toTajtsin okuajnankili ne iluikak: “Yonikchiu para ma nechueyilikan, niman oksejpa nikchiuas para ma nechueyilikan” (Juan 12:28). Nikan nesi ika melak noneki matiktekitiltikan itoka toTajtsin. Kuakon, ¿tleka sekimej akin yokitlajtolkuepkej Biblia xokitlalijkej itoka toTajtsin?

Onka ome tlemach tlen ika xokitlalijkej. Kachtopa, miyekej kijtouaj maka manotekitilti pampa xtikmatij kenon noijtouaya. Pampa ika hebreo xnotekitiltiayaj vocales (a, e, i, o, u), ipan yejuin tonajli xakaj uelis kijtos katlejua kitlaliayaj ijkuak kijtouayaj letras YHWH. ¿Ika yejon xnoneki matiktekitiltikan itoka toTajtsin? Xtlanemili, yeuejkaui, tokayotl Jesús kanaj kakistiya kentla Yeshúa noso Yehoshúa; xakaj ueli kimati. San ika, maski sejneka  noso tlamantik kixmatij itokayo Jesús ipan okseki tlajtoltin, ipan nochiuiyan tlaltikpaktli kixmatij yejuin tokayotl. Maski tlaltikpakchanejkej xkuajli kimatij kenon noijtouaya ipan kachtopa siglo, yejuamej kitekitiltiaj. Noijki ijkon, tla tejua tiaskia ipan okse país, tijkakis ika motoka sejneka noso tlamantik kakisti ipan okseki tlajtoltin. Ika yejon, maski tla xkuajli tikmatij kenon noijtouaya yeuejkaui itoka toTajtsin, yejon xkijtosneki ika maka manotekitilti.

Ika ome, xokitlalijkej itoka toTajtsin ipan Biblias ipampa tlen kineltokayaj judíos. Miyekej kinemiliayaj ika xakaj kipiaya kijtos itoka toTajtsin. Yejuamej ijkon kinemiliayaj pampa xkuajli kasikamatiyaj yejuin tlanauatijli: “Maka san kenon xtekitilti itoka toTajtsin Jehová, pampa toTajtsin xsan ijkon kikauas akin san kenon kitekitiltia itoka” (Éxodo 20:7).

Kema, yejuin tlanauatijli kijtoua maka matiktekitiltikan itoka toTajtsin san kenon. San ika ¿kijtosneki maka matiktekitiltikan tla tiktlakaitaj? Ka. Nochimej akin okijkuilojkej sekimej amoxtin ipan Biblia ika hebreo (“Antiguo Testamento”) yejuamej kitlakamatiyaj tlanauatijli tlen toTajtsin okinmakak israelitas. ¿Tlenon okichiujkej yejuin tlakamej ika itoka toTajtsin? Miyekpa okitekitiltijkej. Xnemili, okitlalijkej ipan miyek salmos tlen chikauak kikuikatiayaj ijkuak kiueyichiuayaj toTajtsin. Jehová noijki okinnauati itekipanojkauan makijtokan itoka, niman yejuamej otetlakamatkej (Joel 2:32; Hechos 2:21). Ijkon, akin kichiuaj ken Cristo ipan yejuin tonaltin kitekitiltiaj itoka toTajtsin ika tlakaitalistli, ijkon ken okichiuj Jesús (Juan 17:26).

Akin okitlajtolkuepkej Biblia, okichiujkej tlen melak xkuajli pampa xokitlalijkej itoka toTajtsin. Kichiuaj matiknemilikan ika xuelis tiknisiuiskej niman ika xmelak nemi. Biblia xijkon temachtia, ompa techijlia ika tinochimej uelis touikaskej iuan Jehová (Salmo 25:14). Xnemili itech se akin iuan timouika. Tla tejua nion xtikmatiskia kenon itoka, ¿tikijtoskia ika kuajli iuan timouika? Noijki ijkon panoua iuan toTajtsin. ¿Kenon uelis iuan touikaskej tla nion xtikmatij ika yejua itoka Jehová? Noijki, tlaltikpakchanejkej akin xkitekitiltiaj yejuin tokayotl, noijki xkimatij tlenon kijtosneki. ¿Tlenon kijtosneki itoka toTajtsin?

ToTajtsin okijli itekipanojkauj Moisés tlenon kijtosneki itoka. Ijkuak yejua okitlajtolti kenon notokayotia, Jehová okinankili:  “Nejua ninochiuas tlen niktlapejpenis ninochiuas” (Éxodo 3:14). Kuakon Jehová ueli kichiua tlen kineki niman ijkon kichiua tlen yokijto, niman yejua uelis kichiuas mapano san tlenon tla noneki itech tlen okichijchiuj niman ijkon manochiua tlen yokijto.

Matiknemilikan ika tejua ueliskia tikchiuas tlen tiknekis. ¿Tlenon tikchiuaskia inpampa akin imiuan timouika? Tla yakaj melak kualo, tejua uelis timochiuas se tlapajtiketl niman tikpajtis. Tla se kipoloskia miyek tomin, tejua uelis timochiuaskia se akin melak kipiya miyek tomin niman tikpaleuis. San ika, tejua ijkon ken tinochimej, xueli tikchiua tlen tiknekiskia. Aman, ijkuak timomachtijtias Biblia, tikitas ika Jehová kichiua nochi tlen poliui niman ijkon kichiua tlen yokijto. Niman kuelita kitekitiltis ikojtilis inpampa tlaltikpakchanejkej akin kitlasojtlaj (2 Crónicas 16:9). Akin xkixmatij itoka toTajtsin xkixmatij ikualneskayouan Jehová tlen melak kualtsitsintin.

Kuajli yotikasikamatkej ika, itoka toTajtsin, noneki nesis ipan Biblia. Ijkuak tikmatij tlenon kijtosneki itoka Jehová niman tiktekitiltiaj ijkuak tikueyichiuaj toTajtsin iluikakchane, techpaleuiya matiknisiuikan. *