I LOTO he lagaki haau he Tohi Tapu, kua fakaliliu fēfē e Salamo 83:18? Ne tohi pehē he Tohi Tapu e kupu ia: “Ti iloa ai e lautolu a koe, ko e hāu a higoa ko Iehova, hoko koe ni kua Mua ue atu ke he lalolagi oti.” Kua talahau pihia foki he falu fakaliliuaga he Tohi Tapu. Pete ia, kua loga e fakaliliuaga ne nakai fakaaoga e higoa Iehova, ti hukui aki e tau mataulu tuga e “Iki” po ke “Tukulagi.” Ko e heigoa kua lata ke fakaaoga he kupu nei? Ko e mataulu po ke higoa Iehova?

Ne tala e kupu nei hagaao ke he higoa. He vagahau Heperu fakamua ne tohi aki e laulahi he Tohi Tapu, kua tū he kupu nei e higoa kehe ue atu. Kua tohia pehē nei יהוה (YHWH) he tau matatohi Heperu. He vagahau Niue, ko e fakaliliuaga ne fa mahani ma e higoa ia ko “Iehova.” Kua taha ni kia e kupu he Tohi Tapu ne tū ai e higoa ia? Nakai. Kua kitia ai i loto he tau Tohiaga Tapu Heperu fakamua ke teitei laga 7,000!

Kua aoga fēfē e higoa he Atua? Kia kikite ke he liogi fakatai ne foaki e Iesu Keriso. Kua kamata pehē: “Ha mautolu a Matua na e, ha ha he lagi, kia tapu hau a higoa.” (Mataio 6:9) Fakamui, ne liogi a Iesu ke he Atua: “Ma matua na e, fakaheke a ke he hau a higoa.” He tali, ne vagahau mai e Atua he lagi: “Kua fakaheke au ki ai, ato liu foki fakaheke au ki ai.” (Ioane 12:28) Maali ai, kua mua ue atu e aoga he higoa he Atua. Ko e ha mogoia, ne nakai fakaaoga he falu tagata fakaliliu e higoa nei he tau fakaliliuaga ha lautolu he Tohi Tapu mo e hukui aki e tau mataulu?

Kua tuga ha ha ai ua e matapatu kakano. Fakamua, tokologa ne talahau kua nakai lata ke fakaaoga e higoa ia ha ko e puhala ne fakaleo ai he vahā fakamua kua nakai iloa he vahā nei. Kua tohia e vagahau Heperu tuai mo e nakai fai vouela. Ko e mena ia, nakai fai tagata he vahā nei kua iloa mooli e puhala tonu ne fakaleo he tau tagata he tau vahā Tohi Tapu e YHWH. Pete ia, kua lata kia he mena nei ke taofi mai a tautolu he fakaaoga e higoa he Atua? He tau vahā Tohi Tapu, ko e higoa Iesu kua liga fakaleo Yeshua  po ke Yehoshua—kua nakai fai tagata ne iloa mooli. Ka e, ko e tau tagata he lalolagi katoa kua fakaaoga e tau fakaliliuaga kehekehe he higoa Iesu, ti fakaleo ai ke he puhala kua mahani he vagahau ha lautolu. Kua nakai fakauaua a lautolu ke fakaaoga e higoa pete kua nakai iloa a lautolu ke fakaleo ai he senetenari fakamua. Tatai foki, kaeke fenoga atu a koe ke he motu kehe, liga mailoga e koe e kehe he fakaleo he higoa haau he vagahau ia. Ko e mena ia, ke fakauaua hagaao ke he fakaleo tuai he higoa he Atua kua nakai ko e kakano a ia ke nakai fakaaoga e higoa ia.

Ko e kakano ke uaaki ke utakehe e higoa he Atua mai he Tohi Tapu ha kua lauia e aga fakamotu kua leva tigahau he tau Iutaia. Tokologa ia lautolu ne talitonu ko e higoa he Atua kua nakai lata ke fakaleo. Kua fakavē mooli e taofiaga nei ke he nakai maama e fakatufono he Tohi Tapu ne talahau: “Aua neke totoku teao e higoa a Iehova hau a Atua; ha kua nakai toka noa e Iehova a ia kua totoku teao hana higoa.”—Esoto 20:7.

Kua fakatapu he fakatufono nei e fakaaoga hehē he higoa he Atua. Ka kua fakatapu kia e fakaaoga fakalilifu he higoa haana? Nakai pihia. Ko e tau tagata tohia he Tohi Tapu Heperu (ko e “Maveheaga Tuai”) ko e tau tagata taane tua fakamooli oti ne momoui ke he Fakatufono ne foaki he Atua ke he tau Isaraela i tuai. Pete ia, ne fakaaoga tumau e lautolu e higoa he Atua. Ke tuga anei, ne fakaaoga e lautolu i loto he loga he tau salamo ne lologo fakaleo lahi he moto tagata tapuaki. Ne fakaako foki e Iehova ko e Atua e tau tagata tapuaki haana ke ui ke he haana higoa, ti omaoma a lautolu ne tua fakamooli ki ai. (Ioelu 2:32; Gahua 2:21) Ti, ko e tau Kerisiano he vahā nei kua nakai fakauaua ke fakaaoga fakalilifu e higoa he Atua, tuga ne taute mooli e Iesu.—Ioane 17:26.

He hukui e higoa he Atua aki e tau mataulu, kua hehē lahi e mena ne taute he tau tagata fakaliliu he Tohi Tapu. Ne taute e lautolu e Atua ke tuga kua mamao ligo mo e nakai manamanatu ke he tau tagata, ka kua fakamalolō he Tohi Tapu e tau tagata ke ‘fakafetui mo Iehova.’ (Salamo 25:14) Manamanatu la ke he kapitiga tata lahi haau. Kua liga lahi fēfē e fetataaki ha mua kaeke ke nakai iloa e koe e higoa he kapitiga haau? Tatai foki, ka nakai iloa he tau tagata e higoa he Atua, ko Iehova, maeke fēfē ia lautolu ke fakatata mooli atu ke he Atua? Lafi ki ai, ka nakai fakaaoga he tau tagata e higoa he Atua, kua nakai iloa foki e lautolu e kakano homo ue atu he higoa ia. Ko e heigoa e kakano he higoa faka-Atua?

 Ne fakamaama he Atua e kakano he higoa haana ke he fekafekau tua fakamooli haana ko Mose. He magaaho ne hūhū a Mose hagaao ke he higoa he Atua, ne tala age a Iehova: “To fakamoli ai au ke he mena ia ti to fakamoli ni au ki ai.” (Esoto 3:14, NW) Ne fakaliliu pehē he fakaliliuaga ha Rotherham: “To Eke Ni Au mo ha mena kua fiafia au ki ai.” Ti kua maeke ia Iehova ke eke mo ha mena ni ne kua lata ke fakamooli aki e tau finagalo haana, mo e maeke ia Ia ke fakatupu mai ha mena ne kua loto a Ia ki ai ke lata mo e tufugatiaaga haana mo e fakamooliaga he finagalo haana.

Liga kua maeke ia koe ke eke mo ha mena ni ne manako ki ai. Ko e heigoa ka taute e koe ma e tau kapitiga haau? Kaeke gagao lahi taha ia lautolu, maeke ia koe ke eke mo toketā pulotu mo e taute e tuluiaga. Kaeke matematekelea taha ke he puhala fakatupe, maeke ia koe ke eke mo tagata muhukoloa ka lagomatai a ia. Ka ko e kupu mooli hanei, kua fakakaupā a koe ke he tau mena ne manako e koe. Kua pihia oti a tautolu. He fakaako e koe e Tohi Tapu, to ofoofogia a koe he kitia e tau puhala ne eke a Iehova mo ha mena ni ne kua lata ke fakamooli aki e tau finagalo haana. Ti kua fiafia a ia ke fakaaoga e malolō haana ma lautolu ne fakaalofa ki a ia. (2 Nofoaga he Tau Patuiki 16:9) Ko e tau vala fulufuluola nei he aga ha Iehova kua galo ki a lautolu ne nakai iloa e higoa haana.

Maali ai, ko e higoa Iehova kua lata ke tū i loto he Tohi Tapu. He iloa e kakano mo e fakaaoga tumau he tapuakiaga ha tautolu ko e tau lagomatai malolō a ia ke fakatata fakalahi atu ke he Matua ha tautolu he lagi, ko Iehova. *