Eiziina rya Ruhanga—Oku Ririkukoresibwa Hamwe n’Amakuru Gaaryo

OMURI Baibuli yaawe, Zaaburi 83:18 rukavunuurwa ruta? Omuri Baibuli erikwetwa New World Translation of the Holy Scriptures, orunyiriri oru nirugira ruti: “Bamanye ngu niiwe wenka orikwetwa Yehova, okira boona kandi ori ahaiguru y’ensi yoona.” Zaabaibuli ezindi enyingi nazo nizivunuura orunyiriri oru zityo. Kwonka beitu, envunuura enyingi niziihamu eiziina Yehova, omu mwanya gwaryo zitamu ebitiinisa nka “Mukama” nari “Otahwaho.” Niki ekishemereire kukoresibwa omu runyiriri oru? N’ekitiinisa nari n’eiziina Yehova?

Orunyiriri oru nirugamba aha iziina. Omu Ruheburaayo orw’okubanza, orurimi oru ebicweka bya Baibuli ebingi byahandiikirwemu, eiziina rya Ruhanga ery’omutaano nirireebekamu. Rikaba nirihandiikwa riti יהוה (YHWH) omu nyuguta z’Oruheburaayo. Omu Runyankore-Rukiga, envunuura y’eiziina eryo erikumanywa ni “Yehova.” Kwonka shi eiziina eryo riri omu runyiriri rumwe rwonka omu Baibuli? Ngaaha. Nirireebeka haihi emirundi nka 7,000 omu Byahandiikirwe eby’Oruheburaayo ebyabandize!

Eiziina rya Ruhanga riine makuru ki? Tekateekateeka aha ky’okureeberaho ky’eshaara ei Yesu Kristo yaataireho. Neetandika eti: “Tataitwe ow’omu iguru, eiziina ryawe ryezibwe.” (Matayo 6:9) Bwanyima, Yesu akashaba Ruhanga ati: “Taata himbisa eiziina ryawe.” Omu kumugarukamu, Ruhanga akeema omu iguru, yaagira ati: “Naarihimbisa, kandi ndyagaruka ndihimbise.” (Yohaana 12:28) Nikireebeka gye ku eiziina rya Ruhanga riri rikuru munonga. Kandi shi ahabw’enki abavunuuzi abamwe baihire eiziina eri omuri Baibuli ezi baavunuire reero omu mwanya gwaryo bakatamu ebitiinisa?

Nikireebeka hariho enshonga ibiri enkuru. Ey’okubanza: Baingi nibagira ngu eiziina rya Ruhanga tirishemereire kukoresibwa ngu ahabw’okuba n’omuringo ogu ryabaire niryaturwamu omukubanza tigurikumanywa n’eri izooba. Oruheburaayo orwa ira rukaba ruhandiikwa rutarimu nyuguta engambisa. Ngu n’ahabw’ekyo, hati buzima tihariho n’omwe orikumanya gye oku abantu abaabaire bariho omu bwire bw’okuhandiikwa kwa Baibuli baabaire baatura enyuguta YHWH. Kwonka shi eki kikaatuzibiire kukoresa eiziina rya Ruhanga? Omu  bwire bw’okuhandiikwa kwa Baibuli, eiziina Yesu niribaasa kuba ryabaire niryaturwa nka Yeshua nari Yehoshua—buzimazima tihariho n’omwe orikumanya. Kwonka nabwe, abantu omu nsi yoona hati nibakoresa eiziina Yesu omu miringo etarikushushana, barikuryatura omu muringo ogurikumanywa omu rurimi rwabo. Tibarikureka kwejunisa eiziina rya Yehova ahabw’okuba ngu tibarikumanya oku ryabaire ryaturwa omu kyasha ky’okubanza. Nikyo kimwe, waaza omu ihanga erindi, noobaasa kushanga ngu eiziina ryawe niryaturwa omu muringo ogundi ogutarikushushana n’oku ririkwaturwa omu rurimi orundi. N’ahabw’ekyo, okutamanya gye oku eiziina rya Ruhanga ryabaire niryaturwa ira tikishemereire kutuzibira kurikoresa.

Enshonga ya kabiri erikukira kuheebwa ahabw’enki eiziina rya Ruhanga niriihwa omu Baibuli eine akakwate n’emigyenzo y’Abayudaaya eya ira. Baingi nibaikiriza ngu eiziina rya Ruhanga tirishemereire kwaturwa. Enyikiriza egi buzima neerugiirira aha kwetegyereza kubi ekiragiro ky’omu Baibuli ekirikugira kiti: “Otarizaanisa eiziina rya Yehova Ruhanga waawe; ahakuba Yehova tarimubara nk’otaine rubanja orikuzaanisa eiziina rye.”—Okuruga 20:7, NW.

Ekiragiro eki nikizibira omuntu okukoresa kubi eiziina rya Ruhanga. Kwonka shi nikizibira okukoresa gye eiziina rye? Ngaaha. Abahandiiki ba Baibuli ey’Oruheburaayo (“Endagano Enkuru”) boona bakaba bari abashaija abeesigwa abaabaire nibakuratira Ekiragiro eki eki Ruhanga yaahaire Abaisraeli aba ira. Kandi obutoosha bakaba bakoresa eiziina rya Ruhanga. Nk’eky’okureeberaho, bakarihandiika omu byeshongoro ebyabaire byeshongorwa abaramya baingi omu maraka garikuhurirwa gye. Kandi Yehova Ruhanga akaragiira abaramya be kutakira eiziina rye, haza abaabaire bari abeesigwa bakamworobera. (Yoeli 2:32; Ebyakozirwe 2:21) N’ahabw’ekyo, Abakristaayo ebiro ebi tibarikureka kukoresa eiziina rya Ruhanga omu muringo gw’ekitiinisa, nk’oku buzima Yesu yaakozire.—Yohaana 17:26.

Omu kukoresa ebitiinisa omu mwanya gw’eiziina rya Ruhanga, abavunuuzi ba Baibuli nibakora enshobe y’amaani. Nibareebekyesa Ruhanga nk’ori hare munonga kandi nk’otari muntu, kwonka Baibuli yo neehiga abantu kugira ‘omukago na Yehova.’ (Zaaburi 25:14) Teekateeka ahari munywani waawe ow’ahamara. Okaagira mukago gwa muringo ki na munywani waawe ku waakuba otarikumanya eiziina rye? Nikyo kimwe, abantu baaba batamanyisiibwe eiziina rya Ruhanga, Yehova, mbwenu buzima bakaabaasa bata kumwirira haihi? Ekindi, abantu baaba batarikukoresa eiziina rya Ruhanga, nibaba batarikumanya amakuru gaaryo ag’omutaano. Eiziina rya Ruhanga Yehova riine makuru ki?

Ruhanga we wenka akashobororera Musa, omuheereza we omwesigwa  amakuru g’eiziina rye. Musa ku yaabuurize aha bikwatiraine n’eiziina rya Ruhanga, Yehova akamugarukamu ati: “Ndi MBAHO; kandi yaagira ati: Oku nikwo origambira Abaisraeli, oti: MBAHO niwe abantumireho.” (Okuruga 3:14) Empindura ya Baibuli eya Rotherham yo ebigambo ebi ebiine eti: “Niinyija Kuhinduka eki ndyenda kuba.” N’ahabw’ekyo, Yehova naabaasa kuhinduka ekirikwetengyesa okubaasa kuhikiiriza ebigyendererwa bye.

Okaabaasa kukora ki ku waakuba noobaasa kuhinduka eki orikwenda kyona? N’enki eki waakukorera banywani baawe? Omwe aharibo yaarwara munonga, noobaasa kuhinduka omushaho otendekirwe gye, omutambire. Kandi ondiijo yaafeerwa sente ze, noobaasa kuhinduka omugaiga, otyo omuhwere omwihe omu buremeezi bwe. Amazima gari ngu, nabwe nooba oine ahu orikugarukira omu bi orikubaasa kuba. Twena twine ahu turikugarukira omu bi turikubaasa kukora. Omu kushoma kwawe kwa Baibuli, noija kutangaara okureeba oku Yehova arikubaasa kuhinduka kyona ekirikwetengyesa okubaasa kuhikiiriza ebi yaaraganiise. Kandi nikimushemeza okukoresa amaani ge okuhwera abo abarikumukunda. (2 Obusingye 16:9) Emitwarize ya Yehova egi emirungi terikwetegyerezibwa abo abatarikumanya eiziina rye.

Eiziina Yehova buzimazima rishemereire kukoresibwa omuri Baibuli. Okumanya amakuru gaaryo n’okurikoresa omu kuramya kwaitu tutaine kutiina kwona n’ekintu kikuru ekirikutuhwera kwirira haihi Yehova, Tataitwe ow’omu iguru. *

[Obugambo obw’Ahansi]

[Ekishushani ekiri aha rupapura 195]

Eiziina rya Ruhanga omu nyuguta z’Oruheburaayo