Mokanwo
Nyamenle Duma—Kɛzi Bɛva Bɛli Gyima nee Mɔɔ Ɔkile
KƐZI bɛhile Edwɛndolɛ 83:18 abo wɔ wɔ Baebolo ne anu ɛ? New World Translation of the Holy Scriptures ne kile ngyɛnu ɛhye abo kɛ: “Maa bɛnwu kɛ ɛdawɔ ɛ ngomekye, mɔɔ wɔ duma a le Gyihova la a ɛle Anwuma Anwumanli wɔ azɛlɛ ye amuala azo a.” Baebolo ngilebɛbo gyɛne dɔɔnwo ka edwɛkɛ ko ne ala. Noko akee, ngilebɛbo bie mɔ mɔɔ le kɛ Nzema Baebolo ne la, ɛnva duma Gyihova ne ɛnli gyima. Bɛva amodinli mɔɔ le kɛ “Awulae” anzɛɛ “Ɛdɛnkɛma” la a bɛzie ɔ gyakɛ anu a. Duzu a ɔwɔ kɛ bɛfa bɛdi gyima wɔ ngyɛnu ɛhye anu a? Amodinli anzɛɛ duma Gyihova?
Nyamenle duma ne mɔɔ bɛva Hibulu ngɛlɛleramgbɔkɛ bɛhɛlɛ
Ngyɛnu ɛhye ka duma nwo edwɛkɛ. Wɔ Hibulu aneɛ ne mɔɔ bɛlumua bɛvale bɛhɛlɛle Baebolo ne dɔɔnwo la anu, duma kpɔtee a finde ɛke a. Bɛvale Hibulu ngɛlɛleramgbɔkɛ יהוה (YHWH) a bɛhɛlɛle a. Wɔ Nzema nu, yɛbahɛlɛ ye “Gyihova.” Asoo Baebolo ngyɛnu ko ala anu a zɔhane duma ne finde a? Kyɛkyɛ. Duma Gyihova ne finde Hibulu Ngɛlɛlera ne mɔɔ bɛlumua bɛhɛlɛle la anu fane kɛyɛ 7,000!
Kɛzi Nyamenle duma ne anwo hyia ɛ? Suzu asɔneyɛlɛ nwo neazo ne mɔɔ Gyisɛse Kelaese vale manle la anwo. Ɔbɔ ɔ bo kɛ: “Yɛ Ze mɔɔ wɔ anwuma; Wɔ duma nwo ɛde.” (Mateyu 6:9) Amozii, Gyisɛse zɛlɛle Nyamenle kɛ: “Egya, maa anyunlunyia ɛha wɔ duma ne.” Nyamenle yele ɔ nloa, vile anwuma, kɛ: “Mewula ye anyunlunyia dɛba, na mebawula ye bieko.” (Dwɔn 12:28) Ɔda ali wienyi kɛ, Nyamenle duma ne anwo hyia kpole kpalɛ. Ɛnee akee, duzu ati a, menli mɔɔ kile Baebolo bo la bie mɔ ɛye duma ɛhye ɛvi bɛ ngilebɛbo ne mɔ anu na bɛva amodinli bɛzie ɔ bo zo ɛ?
Ɔbayɛ kɛ ndelebɛbo titile nwiɔ bie ati ɔ. Mɔɔ lumua la, menli dɔɔnwo kile kɛ ɔnle kɛ bɛfa duma ne bɛdi gyima, ɔboalekɛ ɛnɛ bɛnze kɛzi ɛnee bɛbɔ ye mɔlebɛbo ne la. Bɛanva vawolo a, e, ɛ, i, o nee u bɛangɛlɛ tete Hibulu. Ɛhye ati, awie biala ɛnle ɛkɛ ne ɛnɛ mɔɔ bahola aha kɛzi menli mɔɔ ɛnee de aze wɔ Baebolo mekɛ zo bɔle YHWH ne kpɔtee a. Noko akee, asoo ɔwɔ kɛ ɛhye si yɛ adenle kɛ yɛkɛva Nyamenle duma ne yɛkɛli gyima ɔ? Wɔ Baebolo mekɛ zo, bie a ɛnee bɛbɔ duma Gyisɛse Yeshua anzɛɛ Yehoshua
Debie mɔɔ tɔ zo nwiɔ mɔɔ bɛta bɛfa bɛkile deɛ mɔɔ ɔti bɛye Nyamenle duma ne bɛvi Baebolo ne anu la gyi Dwuuma amaamuo dɛba bie azo. Ɛnee bɛ nuhua dɔɔnwo die di kɛ ɔnle kɛ bɛbɔ Nyamenle duma ne fee. Diedi ɛhye gyi mɛla bie mɔɔ wɔ Baebolo ne anu mɔɔ bɛhakyile ye la azo. Mɛla ne se: “Bɛmmabɔ medame [Gyihova, NW] bɛ Nyamenle ne duma mgbane mgbane, ɔluakɛ medame [Gyihova, NW], menrɛmaa mɔɔ bɔ me duma mgbane mgbane la ɛnrɛva ɔ nwo dwɔɔ.”
Mɛla ɛhye tua Nyamenle duma mɔɔ bɛfa bɛdi gyima wɔ adenle ɛtane zo la. Noko asoo ɔtua ye duma ne mɔɔ bɛfi ɛbulɛ nu bɛfa bɛdi gyima la ɔ? Kyɛkyɛ. Menli mɔɔ hɛlɛle Hibulu Baebolo ne (“Ngyekyeleɛ Dɛba” ne) la ɛnee le menli mɔɔ di nɔhalɛ mɔɔ lile Mɛla ne mɔɔ Nyamenle vale manle tete Yizilayɛma la azo a. Noko, ɛnee bɛta bɛfa Nyamenle duma ne bɛdi gyima. Kɛ neazo la, ɛnee ɔwɔ edwɛne dɔɔnwo mɔɔ ɛnee Nyamenle azonvolɛ to la anu. Gyihova Nyamenle bɔbɔ hanle hilele ye azonvolɛ kɛ bɛva ye duma ne bɛvɛlɛ ye, na menli mɔɔ di nɔhalɛ la lile zolɛ. (Dwowɛle 2:32; Gyima ne 2:21) Ɛhye ati, nɔhalɛ Keleseɛnema mɔɔ wɔ ɛkɛ ne ɛnɛ la ɛndwehwe bɛ bo aze kɛ bɛkɛvi ɛbulɛ nu bɛkɛva Nyamenle duma ne bɛkɛli gyima, kɛmɔ Gyisɛse yɛle la pɛpɛɛpɛ.
Ɔle nvonleɛ kpole kɛ menli mɔɔ kile Baebolo bo la kɛva amodinli kɛzie Nyamenle duma ne agyakɛ anu. Bɛmaa ɔyɛ kɛ asɛɛ Nyamenle wɔ moamoa mɔɔ yɛbikye ye a ɔnyɛ boɛ a, noko Baebolo ne tu menli folɛ kɛ bɛrava ‘Gyihova agɔnwolɛ.’ (Edwɛndolɛ 25:14) Suzu agɔnwolɛ kpalɛ bie mɔɔ ɛlɛ ye la anwo nea. Saa ɛnze ye duma a anrɛɛ kɛ ɔkɛyɛ na bɛ agɔnwolɛ ne anu amia ɛ? Zɔhane ati, saa menli annwu Nyamenle duma Gyihova ne a, kɛzi bɛbahola bɛabikye Nyamenle kpalɛ ɛ? Bieko, saa menli ɛnva Nyamenle duma ne ɛnli gyima a, ɛnee bɛnze mɔɔ ɔkile la kpalɛ. Duzu a Nyamenle duma ne kile a?
Nyamenle mumua ne hilehilele mɔɔ ye duma ne abo kile la anu hilele ye sonvolɛ nɔhavo Mosisi. Mekɛ mɔɔ Mosisi bizale Nyamenle duma ne anwo edwɛkɛ la, Gyihova buale ye kɛ: “Medame a le Medame.” (Adendulɛ 3:14) Rotherham ngilebɛbo ne ka ye kɛ: “Mebayɛ me nwo biala mɔɔ mekulo kɛ meyɛ la.” Yemɔti Gyihova kola yɛ ɔ nwo biala mɔɔ ɔkulo la amaa ye atiakunlukpɔkɛ ne mɔ ara nuhua.
Fa ye kɛ ɛkola ɛyɛ debie biala mɔɔ ɛkulo la. Duzu a anrɛɛ ɛbayɛ wɔamaa ɛ gɔnwo mɔ a? Saa anwonyane kpole bie bɔ bɛ nuhua ko a, ɛbahola wɔayɛ ɛ nwo dɔketa mɔɔ yɛ deɛ kpalɛ la na wɔayɛ ye ayile. Saa bie noko bɔ kakɛ a, ɛbayɛ ɛ nwo sukoavolɛ kpole na wɔalie ye. Noko, nɔhalɛ ne a le kɛ, ɛnlɛ zɔhane tumi ne. Yɛ muala yɛnlɛ ye. Mekɛ mɔɔ ɛlɛsukoa Baebolo ne la ɛbanwu kɛzi Gyihova kola yɛ debie biala mɔɔ ɔkulo amaa ye ɛwɔkɛ ne mɔ ara nuhua la. Na ɔ nye die kɛ ɔkɛva ye tumi ne ɔkɛboa menli mɔɔ kulo ye la kɔsɔɔti. (2 Edwɛkɛsisilɛ 16:9) Menli mɔɔ ɛnze Gyihova duma ne la ɛnze ye subane ɛhye mɔ mɔɔ yɛ nwanwane la.
Ɔda ali wienyi kɛ, ɔwɔ kɛ Gyihova duma ne finde Baebolo ne anu. Saa yɛte duma ne abo na yɛfa yɛdi gyima wɔ yɛ ɛzonlenlɛ nu a, ɔboa yɛ kpalɛ ɔmaa yɛbikye Gyihova, yɛ anwuma Selɛ ne. *
^ ɛden. 3 Saa ɛkpondɛ Nyamenle duma ne, mɔɔ ɔkile, nee deɛ mɔɔ ɔti ɔwɔ kɛ yɛfa yɛdi gyima wɔ yɛ ɛzonlenlɛ nu la anwo edwɛkɛ dɔɔnwo a, nea The Divine Name That Will Endure Forever, buluku ne mɔɔ Gyihova Alasevolɛ ɛyɛ la anu.
