NGUA ngera oidel a Psalm 83:18 el ngar er a Biblia er kau? A New World Translation of the Holy Scriptures a oliuid er tia el bades el kmo: “Me a rechad bo lodengei el kmo, ngdi kau el tang a ngklem a Jehovah, a Kot el Ngarbab er a beluulechad el rokir.” Ngbetok el Biblia a osisiu a oidel er tia el bades. Engdi te diak el lousbech er a ngakl el Jehovah, te bai mla mtechir er a dui el ua “Rubak” me a “Dios.” Me ngngera kirel ngar tia el bades? Ngdui me a lechub e ngtia el ngakl el Jehovah?

A bades a mesaod el kirel a ngakl. A klou el tedobech er a Biblia a milluches el lousbech a tekoi er a Hebru. E mla er ngii a ileakl el ngakl el ngar tia el bades. Ngmle llechukl el tekoi er a Hebru el kmo, יהוה (YHWH). Ngar er a tekoi er a Merikel e tia mloiuid el “Jehovah.” Me ngdi chimo el bades a debetik er tia el ngakl er ngii? Ngdiak. Kede metik er tia el ngakl el bekord el 7,000 el taem el ngar er aike el kot el omelechesel a bades el tekoi er a Hebru.

Ngua ngera klungel a ultutelel a ngklel a Dios? Ka molebedebek er sel kerebai el lebilskid a Jesus Kristus el kirel a nglunguuch. Ngomuchel el kmo: “Demmam el ngar a eanged: Bo le modanges a chedaol ngklem.” (Mateus 6:9) Ngdirrek el ngar er a ta er a nglunguchel, e a Jesus a dilu el kmo: “Chedam, mkebkellii a ngklem!” Me a Dios a ulenger el kmo, “Ak mla kobkellii e lmuut el mo kobkellii.” (Johanes 12:28) Me ngbleketakl el kmo, a ngklel a Dios a kmal klou a ultutelel. Me ngngera uchul me a rebebil er a ruliuid er a Biblia a mla mtechir a ngklel el lolab a dui?

Ngngar er ngii a teblo el uchul. A kot, e te betok a melekoi el kmo tia el ngakl a diak a medengelii a mera el omengiuel me ngdiak el kired el ousbech er ngii. A irechar e te milluches a tekoi er a Hebru el dimlak a omechelel el ua  a,e,i,o,u. Sei a uchul me ngdiak a chad el medengelii a mera el omengiuel a YHWH. Me nguaisei, engdi tia ngkirel rullid me ngmo diak dousbech er a ngklel a Dios? Ngar er a taem er a Biblia, e a omengiuel a ngakl el Jesus a locha mle Yeshua me a lechub e ng Yehoshua. Engdi chelecha el taem e a rechad a ousbech er a ngakl el Jesus el oltirakl a omelekingir. Te dirk ousbech er ngii alta ngdiak a mera el medengelii a omengiuel er a irechar. Me ngdi osisiu, ngar er a ngodech el beluu e a ngklem a dirrek el locha diak el losisiu a omengiuel. Me a leuaisei, alta ngdiak dodengelii a omengiuel a ngklel a Dios er a irechar engdi tia diak el kirel el rullid el mo diak dousbech er ngii.

A ongerung, e a rechad a mla otebedii a ngklel a Dios er a Biblia er tir el oltirakl er a siukang er a Rechijudea. Ngbetok er tir a oumerang el kmo ngkmal diak el kired el melekoi er a ngklel a Dios. Tia el klaumerang a mlengai er a cheleuid el otireklel a llach er a Biblia el kmo: “Ngdiak el kirem el merrekakl er a ngklel a Jehovah el Dios er kau, e le Jehovah a mo omals er ngike el merrekakl er a Ngklel.”​—Exodus 20:7, NW.

Tia el llach a ullekebai er a mekngit el usbechel a ngklel a Dios. Engdi, ngdirrek el olekebai er a usbechel el ngar er a ungil el rolel? Ngkmal diak. A remilluches aike el Bades el tekoi er a Hebru (“Chuodel el Testament”) a mle blak a rengrir el chad el kiliei el oltirakl a Llechul a Dios el mo er a rechad er a Israel er a irechar. Engdi te mle blechoel el ousbech er a ngklel a Dios. El uai tiang, te uluusbech er ngii er a chelsel a betok el chelitakl el lulengitakl el ngar er a omengull er tir. A Jehovah el Dios a dirrek el dilu er a remengull er Ngii el mo omekedong er a ngklel, me a reblak a rengrir el mesiungel a mirruul el uaisei. (Psalm 148:5, 13; Rellir 2:21) Me nguaisei, a Rekristiano er chelecha el taem a ousbech er a ngklel a Dios el ngar er a ungil el rolel, el ua lurruul er ngii a Jesus.​—Johanes 17:26.

A ruliuid er a Biblia a rirellii a kmal cheleuid el tekoi er a lotebedii a ngklel a Dios el mtechir er a dui. Te mla rullii a Dios el mo meringel er kid a mo kmeed er ngii, engdi a Biblia a  melisiich er kid el mo ‘sechelil’ a Jehovah. (Psalm 25:14) Ka di molatk er a kmal sechelim. Ngmo ua ngera deleuill er kemiu omko ngdimlak bo modengelii a ngklel? Me ngdi osisiu, a lsekum a rechad a diak bo lodengelii a ngklel a Dios el Jehovah, e te mekera e mera el mo kmeed er ngii? Me a lmuut el tang, ngdiak el sebechir el mo medengelii a mengasireng el belkul a ngklel a Dios a lak lousbech er ngii. Me ngngera belkul a chedaol el ngklel a Dios?

A Dios a silodii a belkul a ngklel el mo er a blak a rengul el mesiungel er a Moses. A Moses er a loker el kirel a ngklel a Dios, e a Jehovah a ulenger el kmo: “Ak Mo Ngii Di el Ngerang Me Kutaut a Moktek er Ngak.” (Exodus 3:14, NW) A oidel a Biblia er a Rotherham a ulidii tiang el kmo: “Ak mo ngii di el ngerang el soak.” Me a Jehovah a sebechel el mo ngii di el ngerang me a lechub e ngmeruul a ngii di el tekoi el kirel meketmokl me bo el sebechel el mo oltaut er a moktek er Ngii.

Omko ngsebechem el mo ngii di el ngerang el lousbech er ngii a resechelim, e ngera ke mo rullii el kirir? A bo el secher a tang, e ngsebechem el mo toktang e omekungil er ngii. Me a lemla er ngii a chebuul er a udoud, e ke mo merau el chad e ngosuir. Me nguaisei, ngdi kid a telkael a sebeched el remuul. Engdi omolemolem er a omesubem er a Biblia e ke mo mesa rolel e a Jehovah a mo ngii di el ngerang el mo oltaut a telbilel. Ngdirrek el kmal dmeu a rengul el ousbech er a klisichel el kirir a rebetik a rengrir er Ngii. (2 Kronika 16:9) A rechad el diak lodengelii a ngklel a diak el sebechir el mo medengei chouaika el klebokel el blekerdelel a Jehovah.

Me a ngakl el Jehovah a kmal kirel el ngar er a Biblia. Ngmo sebeched el mo kmeed er a Demad el ngar er a eanged el Jehovah * a bo dodengelii a belkul a ngklel e dousbech er ngii er a omengull er kid.