IA DUWEN Paipel me ke kin doadoahngki eh kawehwehdi Melkahka 83:18? Nan ehu kawehwehn Paipel, e mahsanih nan ire wet: “Pwe aramas akan en esehla me komwi, me mwarenki Siohwa, komwi kelehpw me Keieu Lapalap pohn sampah koaros.” (New World Translation of the Holy Scriptures) Pil nan kawehwehn Paipel tohto teikan kin kawehwe duwehte met. Ahpw mie kawehwehn Paipel tohto me kin kihieisang mwaro Siohwa oh uhd wiliankihdi lengileng kan me duwehte “KAUN-O” de “Kaun-o.” Ahpw dahme uhdahn kin mi nan iretikitik wet? Lengileng ehu de mwaren Siohwa?

Iretikitik wet kin mahsanih duwen uhdahn mwaren (eden) emen. Paipel tepin ntingda ni mahsen en Ipru. Nan iretikitik wet ni mahsen en Ipru, mwaren Koht me pwarada wasaht. Mwomwen mesen nting kan me pwarada nan mwar wet iei יהוה (YHWH) ni nting en Ipru. Mahsen en Pohnpei kin kalapw kawehwehdiong mwar wet “Siohwa.” Ia duwe, pak ehute me mwar wet pwarada nan Paipel? Soh. E pwarada mpen pak 7,000 nan tepin nting kan en Palien Paipel ni Lokaiahn Ipru!

Ia uwen kesempwal en mwaren Koht? Kitail tehk kapakap en Kaun-o me Sises Krais ketikihdahro. E tepikihda mahsen pwukat: “Samat me ketiket nanleng: Mwaromwi en sarawihla.” (Madiu 6:9) Mwuhr Sises pil ketin loulou ong Koht patohwan: “Maing Semei, komwi ketin kalinganahla mwaromwi!” Koht eri mahsendihdohsang nanleng mahsanih: “I kawauwihalahr edei, oh I pahn pwurehng kawauwihala.” (Sohn 12:28) E sansal me mwaren Koht me keieu kesempwal. Eri dahme kahrehda ekei sounkawehwehn Paipel kan kin kihieisang mwaro sang nan arail kawehwe kan oh uhd wiliankihdi lengileng kan?

E mwomwen me kahrepe riau me kahrehda. Keieu, aramas tohto kin kose me mwaro sohte me pahn doadoahngki pwe rahnwet sohte me ese ia mwomwen mehn Ipru kan en mahs ar kin nda mwar wet. Nting en Ipru en kawao kin sohte mesen nting pwukat a, e, i, o, u loale. Kahrehda sohte aramas emen rahnwet kak nda ia uhdahn mwomwen ahn aramas en nan mwehin Paipel ar kin nda mesen  nting pwukat YHWH. Ahpw ia duwe, met wia kahrepe mwahu ehu kitail en dehr doadoahngki mwaren Koht? Nan mwehin Paipel, ni ahnsou me aramas kin nda mwaro Sises, mwein irail kin kakete nda Yeshua de Yehoshua ahpw sohte aramas emen rahnwet me uhdahn ese mwomwen ar kin nda mwaro mahso. Ahpw aramas akan nan sampah pwon rahnwet kin nda mwaren Sises ni soangsoangen ahl tohto. Re kin nda mwar wet ni pein arail lokaia. Mendahte ma re sohte wehwehki ia mwomwen tepin Kristian akan ar kin nda mwaren Sises, irail sohte kin perki nda mwar wet ni pein arail lokaia. Ni soangen ahlohte, ma ke pahn seiloakla nan ehu sahpw tohrohr, ke pahn diarada me ahn aramas en sahpwo ar pahn nda edomwen ni pein arail lokaia pahn kawekila ngoaren edomwo. Kahrehda atail sohte uhdahn ese ia mwomwen ahn mehn mahs akan arail kin nda mwaren Koht kaidehn kahrepe mwahu ehu en dehr doadoahngki mwaro.

Kahrepe keriau me kin kalapw kahrehiong ren kihieisang mwaren Koht sang nan Paipel kin pid tiahk en mehn Suhs sangete mahso. Mehn Suhs tohto kin kamehlele me sohte me pahn kin nda mwaren Koht. Dahme re kamehlele wasaht kohsang ni arail kin doadoahngki ni ahl sapwung iren kosonned en Paipel me mahsanih: “Kumwail dehr doadoahngki mwarei ong ni mehkot me suwed, pwe ngehi KAUN-O, amwail Koht, pahn kaloke mehmen me kin ndinda mwahl mwarei.”​—Deuderonomi 5:11.

Kosonned wet kin keinepwihsang irail en dehr doadoahngki mwaren Koht ni ahl sapwung. Ahpw ia duwe, e keinapwih kitail en doadoahngki mwaro ni wahu? Uhdahn soh. Sounnting kan koaros en Palien Paipel ni Lokaiahn Ipru (“Kadehde Mering”) kin wia ohl lelepek kei me kin momourki kosonned me Koht ketikihong mehn Israel en kawa ko. Ahpw irail kin kalapw doadoahngki mwaren Koht. Karasepe, irail kin doadoahngki mwareo nan melkahka tohto me irail tohnkaudok pokon akan kin kouliki ni ngihl laud. Pein Siohwa pil ketin kaweidki sapwellime tohnkaudok kan en likweriong mware oh irail me lelepek kan kin peikiong. (Melkahka 148:5, 13; Wiewia 2:21) Kahrehda Kristian akan rahnwet sohte kin perki en doadoahngki mwaren Koht ni wahu duwehte me Sises kin ketin wiahier ni eh ketin mahsanih: “I kahrehiong irail en ese mwaromwi.”​—Sohn 17:26, NW.

Sounkawehwehn Paipel akan kin wiahda sapwung laud ehu ni ar kin wiliankihdi mwaren Koht lengileng kan. Irail kin kadohwanla Koht sang rehn aramas oh wiahda en mwomwen me sohte sapwellime  pepehm kan. Ahpw Paipel kin kangoangehki aramas akan en “kompoakepahnki” Siohwa. (Melkahka 25:14) Medewehla duwen kompoakepahmw keren emen. Ia duwen amwa kak inenen kerenpene ma ke sehse eden kompoakepahmwo? Ni mwohmwohte, ia duwen aramas ar pahn kak uhdahn karanihala Koht ma re sehse mwaren Koht Siohwa? Patehng met, ni ahnsou me aramas akan sohte kin doadoahngki mwaren Koht, irail sohte pahn kak ese wehwe kaselel en mwaro. Ia wehwehn mwar wet?

Pein Koht kin ketin kawehwehda wehwehn mwareo ong sapwellime ladu lelepek, Moses. Ahnsou me Moses patohwan idek duwen mwaren Koht, Siohwa ketin sapeng mahsanih: “I Pahn Wiahla Dahme I Pahn Wiahla.” (Eksodus 3:14, NW) Kawehwehn Paipel me adaneki Rotherham kin kihda kawehwe nin duwe met: “I Pahn Wiahla soahng sohte lipilipil nin duwen kupwurei.” Kahrehda Siohwa kak ketin wiahla soahng sohte lipilipil me anahn pwehn kak kapwaiada sapwellime kupwur kan, oh e kak ketin kahrehda soahng sohte lipilipil me anahn en wiawi me pid duwen sapwellime kepikipik kan oh me pid pweidahn kupwure.

Ia duwen ma ke kak wiahla soahng sohte lipilipil me ke men wiahla? Dahme ke pahn wiahiong kompoakepahmw akan? Ma emen irail ahneki soumwahu laud ehu, ke pahn kak wiahla toahkte koahiek men oh kamwahwihala eh soumwahwo. Ma emen paisuwedla oh sohte nah mwohni, ke pahn kak wiahla aramas kepwehpwe men oh sewesehda ih. Ahpw ni mehlel, miehte soahng kan me ke sohte kak wiahla. Sohte mehmen rehtail me kak wiahla soahng sohte lipilipil. Ni omw pahn sukuhlki Paipel, ke pahn esehla ia duwen Siohwa eh kin ketin wiahla soahng sohte lipilipil me anahn pwehn kak ketin kapwaiada sapwellime inou kan. Oh e kin ketin kupwurperenki en kin doadoahngki sapwellime kehl ong irail oko me kin poakohng ih. (2 Kronikel 16:9) Irail akan me sohte kin ese mwareo sohte kak wehwehki irair kaselel tohrohr pwukat me Siohwa ketin sapwellimaniki.

E sansal mwahu me e konehng mwar wet Siohwa en kadoadoahk nan Paipel. Atail ese wehwehn mwar wet oh kin doadoahngki mwaro ni saledek nan atail kaudok kin sewese kitail en karanihala Samatail nanleng, iei Siohwa. *