BIBLIAYKIPI Salmo 83:18 pʼitita ñawiriy. ¿Ima nintaq chaypi? Kay Traducción del Nuevo Mundo de las Santas Escrituras nisqapi jinata nin: “Tukuy runas yachachunku, sutiykiqa Jehová kasqanta, qamlla tukuy kay jallpʼa patapi kaq Dios kanki”. Kay pʼitita wak Bibliasqa yaqha kikillantataq tikrachinku. Chaywanpis, wakin tikrachiqkunaqa, Jehová sutita Bibliamanta urqhunku, “Señor”, “Tata Dios” nisqa rimaykunallata churanku. ¿Imataq kay pʼitipi rikhurinan karqa? ¿Jehová sutipunichu rikhurinan karqa?

Kay pʼitipiqa Diospa sutin willakun. Hebreo simipi Biblia qillqakuchkaptin, Diospa sutinqa tukuyniqpi rikhuriq. Kay sutiqa hebreo simipi jinata qillqakun יהוה (YHWH). Qhichwa simipiqa jinamanta uqharikunman: Jehová. ¿Juk kutillachu Bibliapi Diospa sutin rikhurin? Mana. Ñawpa testamento hebreo simipi qillqakuchkaptin, yaqha qanchis waranqa kutita Diospa sutin rikhuriq.

¿Uqharinachu kanman Diospa sutinta? Padrenuestropi Jesús jinamanta mañakuyta yachachirqa: “Janaj pachapi kashaj Tatayku, sutiyki jatunchasqa kachun”, nispa (Mateo 6:9). Chaymanta qhipaman mañakullarqataq: “Tatáy, sutiykita jatunchay”, nispa. Diosninchiktaq janaqpachamanta kutichimurqa: “Sutiyta jatunchaniña, kunantaj ujtawan jatunchasaj”, nispa (Juan 12:28). Chayrayku Diospa sutinta uqharinapuni tiyan. Chaywanpis, ¿imaraykutaq wakin tikrachiqkuna Diospa sutinta Bibliamanta urqhunku, wak sutistataq cuentanmanta churaykunku?

Kayta kutichinapaqqa iskay yuyayta qhawarisunchik. Juknin kay: wakinkuna ninku mana Diospa sutinta uqharinanchikchu kasqanta, Diospa sutin imaynatachus ñawpa tiempopi uqharikusqanta mana yachasqanchikrayku. Ñawpa hebreo simipiqa, mana a, e, i, o, u, nisqa vocaleswan qillqakuqchu, chayrayku mana pipis sutʼita yachanchu imaynatapunichus Diospa sutin (YHWH) uqharikuq kasqanta. ¿Chayraykuchu mana Diospa  sutinta uqharina kanman? Mana. Unayqa Jesuspa sutinqa ichapis jinata uqharikuq, Yeshúa chayri Yehoshúa; chaytaqa mana pipis yachanchu. Chaywanpis kunanqa, tukuyniqpi runasqa parlayninkumanjina Jesuspa sutinta uqharinku. Manapis yachankuchu imaynatachus unay tiempopi chay suti uqharikuq kasqanta, kunanqa mana iskaychakuspa uqharillankupuni. Jinallatataq, qam karu llaqtaman riptiyki, sutiykiqa wak simispi jukjinamanta uqharikunman. Chayrayku manapis yachanchikchu imaynatachus ñawpaqpi Diospa sutin uqharikusqanta, kunanqa Diospa sutinta uqharinanchikpuni tiyan.

Iskay kaq yuyay: judiosqa Diospa sutinta ni jaykʼaq uqharikunan kasqanta yachachisqankurayku, Bibliamanta Diospa sutinta urqhunku. ¿Imaraykutaq jinata yachachinku? Bibliamanta juknin kamachiyninta pantasqata japʼiqasqankurayku: “Ama qhasi manakajta oqharinkichu Señorniyki Tata Diospa sutinta. Diosqa castiganqapuni pichus sutinta qhasi manakajta oqharejtaqa” (Éxodo 20:7).

Kay kamachiyqa, qhasi mana kaqta Diospa sutinta uqhariqtaqa juchachan. Chaywanpis, ¿jatunpaq qhawaspa Diospa sutinta uqharisunmanchu? Arí. Hebreo simipi (Ñawpa Testamento) Bibliata qillqaqkuna, kʼacha runas karqanku, Diospa kamachiykunasnintataq juntʼarqanku, ¿imatá paykuna Diospa sutinwan ruwarqanku? Mayta uqharirqanku. Salmosman Diospa sutinta churarqanku, llaqtan chay salmosta sinchita takinanpaq. Astawanpis, Jehovaqa, kamachisninman sutinta uqharinankuta kamachirqa, paykunataq kasukurqanku (Joel 2:32; Hechos 2:21). Kunanpis Jesusjina Diosta yupaychaqkunaqa, Diospa sutinta jatunpaq qhawaspa uqharinanku tiyan (Juan 17:26).

Bibliata wak simiman tikrachiqkuna, Diospa sutinta urqhuspa mayta pantanku. Diosninchik karupipis kachkanmanjina rikchʼachinku. Mana chaymanjinataq Bibliaqa tukuyta niwanchik, ‘Dioswan allinta kawsakuyta’ atisqanchikta qayllapi kasqanrayku (Proverbios 3:32). Munasqa amigoykipi tʼukuriy. Mana sutillantapis yachaptiyki, ¿munasqa amigoykichu kanman? Mana, ¿icharí? Jinallataq Dioswanpis. ¿Imaynatá Jehovap amigon kasunman mana sutillantapis yachasparí? Chantapis,  Diospa sutinta mana uqhariqkunaqa, imachus sutin ninayasqanta manallataq yachankuchu. ¿Imataq Diospa sutin niyta munan?

Diosninchik, kamachin Moisesman sutinta sutʼincharqa. Moisés Diosninchikta sutinta tapuptin, Diosninchik kutichirqa: “Noqa kani pichus kani chay”, nispa (Éxodo 3:14). Kaytaq niyta munan, Jehovaqa munasqanta juntʼananpaq, tukuy ima munasqanman tukuyta atisqanta.

Qam munasqaykiman tukuwaq chayqa, ¿manachu amigosniykita yanapawaq? Juknin amigoyki sinchita unquykuptin, qam juk allin jampiqman tukuspa, jampiwaq. Juknin amigoykiñataq qullqinta chinkachiptin, qhapaq runaman tukuspa, yanapayta atiwaq. Chaywanpis tukuy runajina, qamqa munaspapis, mana tukuy ima munasqaykiman tukuyta atinkichu. Chaywanpis Bibliamanta yachakusqaykimanjina, rikunki imaynatachus Jehová tukuy imaman tukuspa, munayninta juntʼasqanta. Diosqa Payta munakuqkunata yanapaspa kusikun (2 Crónicas 16:9). Diospa sutinta mana yachaqkunaqa, imaynachus Jehová kasqanta mana yachallankutaqchu.

Qhawanchikjina, Bibliapi Diospa sutinqa rikhurinanpuni tiyan. Imachus Jehová suti niyta munasqanta yachaspa, mana manchachikuspa sutinta uqharispaqa, Jehovaman qayllaykuyta atisunchik. *