AMA hina kaspa Bibliaykipi kichaykuy Salmo 83:18 nisqanta (wakin Bibliakunapiqa 82:19 nisqapim rikurin). ¿Ima nintaq chay texto? Traducción del Nuevo Mundo de las Santas Escrituras nisqa Bibliam nin: “Sutikiqa Jehová kasqantayá runakuna yachachunku, kay pachapa altonpiqa qamlla kasqaykitayá yachachunku”, nispa. Huk Bibliakunapas yaqa chaynatam tikranku. Ichaqa achka Bibliakunapim Jehová sutiqa mana rikurinchu, “Señor” otaq “Dios” reqsinallapaq sutikunawanmi sutinpa rantinpi qellqanku. Chaynaqa, ¿ima sutitaq rikurimunan kay textopi? ¿Reqsinallapaq sutikunachu icha Jehová sutipunichu?

Chay textopiqa huk sutimantapunim willakuchkan. Yaqa llapanpim Bibliaqa qellqakurqa hebreo simipi, chaypim rikurimun huk suma-sumaq suti reqsinallapaq sutikunamantaqa. Chay sutim hebreo simipi kaynata qellqakun יהוה (YHWH). Qechua simimantaq tikrakun Jehová nispa. ¿Huk kutillachu Bibliapi chay sutiqa rikurimunman? Manam, Hebreo Simipi Bibliata qellqakusqanpim yaqa qanchis waranqa kutita hina rikurimun.

¿Mayna chaninniyoqtaq Diospa sutinqa kanman? Jesuspa yachachisqan Padrenuestro sutichasqa oracionpi reparasun. Kaynatam qallarin: “Hanaq pachapi Taytayku, sutiki yupaychasqa kachun”, nispa (Mateo 6:9). Kayna mañakuymanta yachachisqan qepatam Jesusqa mañakuspan nirqa: “Taytáy, sutikitayá hatunchayña”, nispa. Taytanñataqmi hanaq pachamanta nimurqa: “Ñam hatuncharuniña, chaywanpas huktawanraqmi hatunchasaq”, nispa (Juan 12:28). Chaykunam qawachiwanchik Diospa sutin valorniyoqpuni kasqanta. Chaynaqa, ¿imanasqataq wakin tikraqkunaqa Diospa sutinta Bibliamanta qechururqaku hinaspa reqsinapaq sutikunallata rantinpi qellqarqaku?

Achkam ninku Diospa sutintaqa mana rimanamanta imayna rimakusqanta mana yachakusqanrayku. Hebreo simipiqa manam vocal nisqa letrakunawanqa qellqakurqachu, chaymi mana pipas yachanmanchu ñawpa tiempopi rimakusqanman hina YHWH letrakuna imaynatapuni rimakusqantaqa. ¿Chayraykuchu Diospa sutintaqa  manaña rimana? Ñawpa tiempokunapiqa Jesus sutitapas yaqapaschá Yeshua otaq Yehoshua nispa rimaqku, manam pipas yachanmanchu chay sutipa rimakusqanta imayna toqyasqantaqa. Chayna kaptinpas enteron pachapim Jesus sutitaqa rimayninkuman hinalla rimanku. Punta pachak wata ukupi chay sutita imayna rimakusqanta kunan tiempo runakuna mana yachaspankupas hinallam rimanku. Chayna kaqllam runapa llaqtanman illaptikiqa musyakunki sutikiqa huk rimaykunapi hukniraqta uyarikusqanta. Chayraykum ñawpa tiempokunapi Diospa sutinta imayna rimakusqanta mana yachasqanchikqa manam razonchu Diospa sutinta mana rimanapaqqa.

Manataqmi achka Bibliakunapiqa Diospa sutinqa rikurinchu ñawpa judio runakuna yachachisqankurayku. Yaqa lliw judiokunam ninku Diospa sutintaqa manam haykapipas rimanachu nispa. Chaynataqa piensanku Exodo 20:7 nisqanta mana allinta entiendespankum, chaypim nin: “Ñoqapa sutiytaqa amam yanqaqa rimankichu. Sutiy yanqa rimaqtaqa castigasaqpunim”, nispa.

Chay kamachikuypi nisqanman hinaqa manapunim Diospa sutintaqa yanqaqa rimanachu. ¿Chayraykuchu Diospa sutintaqa manaña rimana? Manam, manapunim chaynachu. Hebreo simipi (“Ñawpa Testamento”) lliw qellqaqkunaqa Diospaq sonqo runakunam karqaku, kasukuqkum Israel runakuna Diospa Kamachikuyninkuna chaskisqankutaqa. ¿Imatam chay qellqaqkuna Diospa sutinwanqa rurarqaku? Diospa sutintaqa sapa kutillam rimaqku. Chayraykum achka kutita salmos libropi Diospa sutintaqa qellqakurqa, chaymantam Diospa yupaychaqninkunaqa takiqku. Kikin Jehová Diospunim serviqninkunata kamachirqa sutinta rimanankupaq, kasukurqakum sonqo kaq serviqninkunaqa (Joel 2:32; Hechos 2:21, NM). Chaymi kunanpas cheqap cristianokunaqa Jesus hina respetowan Diospa sutintaqa rimanchik (Juan 17:26, NM).

Biblia tikraqkunaqa manam allintachu ruranku Diospa sutinpa rantinpi reqsinallapaq sutikunata qellqasqankuwanqa. Chayna rurasqankuwanmi qawachinku Diosqa karupi hina kasqanta hinaspa kallpa hinalla kasqantapas. Bibliam ichaqa kallpanchawanchik Jehová Dioswan ‘sumaqllaña amistadta’ rurananchikpaq (Salmo 25:14). Piensariy ancha kuyasqayki amistadnikipi. Sutillantapas mana yachaptikiqa, ¿cheqap amistadnikichu kanman? Chayna kaqllam Jehová Dioswanpas. ¿Imaynataq Diospa amistadninqa kachwan sichu Jehová sutin kasqanta mana reqsispaqa? Chaymantapas Diospa sutinta mana rimariqkunaqa manam haykappas Diospa sutin ima ninanmantaqa yachanmankuchu. ¿Ima ninantaq Diospa sutinqa?

 Jehová Diosqa Moises sutichasqa siervonmanmi willarqa. Sutinmanta tapuptinmi Jehová Dios nirqa: “Ñoqaqa Kani Hina Kaqllam”, nispa (Exodo 3:14). Otaq Rotherham sutiyoq runapa tikrasqanman hinaqa: “Ñoqam munasqayman hina kasaq”, nispa. Chaynaqa imatañapas Jehová Diosqa ruranmanmi munayninta rurananpaqqa.

Sichu ima munasqaykitapas ruranaykipaq atiyniyoq kawaq, ¿ima allinkunatam amistadnikikunapaq rurawaq? Wañuypaq hina huknin amistadniki onqoruptinqa allin hampiq doctorpich rikuriruwaq hampiykunaykipaq. Hukninpas achka qollqenta wischuruptinqa qamqa apu runapas rikuriruwaqmi yanapaykunaykipaq. Ichaqa llapallanchik hinam munasqaykikunataqa mana lliwtaqa ruraytaqa atiwaqchu. Bibliata estudiasqaykiman hinam ichaqa admirakuspa qawanki imaynam Jehová Diosqa tukuy ima rurayta atinman munasqankuna rurakunanpaqqa. Payqa munachkanpunim kuyaqninkunaman atiyninta qawachiytaqa (2 Cronicas 16:9). Jehová Diospa chay sumaq kayninkunamantaqa manam yachanmankuchu sutinta mana yachaqkunaqa.

Qawasqanchikman hinaqa Diospa sutinqa rikurimunanpunim Bibliapiqa. Jehová suti ima ninanta yachaspanchik hinaspa hanaq pacha kaq Taytanchikta yupaychaypi mana recelowan sutinta rimaptinchikqa mana sasachakuspanchikmi paymanqa astawan asuykusun. *