QULLAAWU MAXAAFIKKIRA Faarso 83:18 mayine tirroonni? Qullaawa Borroti Haaro Alame Tiro tenne xiqise, “Suˈmakki Yihowa yinannihu ati callu uulla woˈmate aana Ayirrado ikkoottota mannu afona” yite tirtino. Wole haammata Qullaawu Maxaafi tirono tenne xiqise konni garinni tirtino. Ikkollana batinynye Qullaawu Maxaafi tiro Yihowa yinanni suˈma fushshite hoolte “Mootichcha” woyi “Magano” yite maaragete suˈminni riqibbino. Tenne xiqise aana heeˈra hasiissannosihu hiikkonne suˈmaati? Maaragete suˈmaatinso Yihowa yinanni suˈmaati?

Tini xiqise coyidhanni noohu suˈmunnireeti. Qullaawu Maxaafiti batinynye maxaaffa umo borreessantinohu Ibirayisxete afiinniiti; konni afiinni borreessini wote tenne xiqise aana baxxinohu gillete suˈmi no. Kuni suˈmi Ibirayisxete fidalenni יהוה (YHWH) yaamame borreessamino. Sidaamu afiinni konne suˈma “Yihowa” yine woshshinanni. Kuni suˈmi Qullaawu Maxaafi giddo mitto bayichcho calla no? Deeˈni. Umo borreessinoonnitera Ibirayisxete Qullaawa Borro giddo kuni suˈmi 7,000 meddi yitanno basera no!

Maganu suˈmi mageeshshi geeshsha hasiisanno? Hanni Yesuusi Kiristoosi rosiisino huuccatto laˈno. Tini huuccatto togo yite jammartanno: ‘Iima heeˈratto Annanke, suˈmikki maassamo.’ (Maatewoosi 6:9) Yannate gedensaanni Yesuusi togo yee huucciˈrino: “Annaˈya suˈmakki ayirrisi.” Maganuno iiminni, “Ayirrisoommo xaano ayirriseemmo” yee qolino. (Yohaannisi 12:28) Maganu suˈmi lowo geeshsha hasiisannoha ikkinota konninni buuxa dandiinanni. Ikkina mitu mitu Qullaawa Maxaafa tirtinori konne suˈma fushshite hoolte bayichchoho maaragete suˈma eessitinohu mayiraati?

Konnira lame qara korkaata shiqishshanno. Umihunni, batinynyu manni hunda konne suˈma woshshinanni gara xa anfoonnikki daafira horoonsiˈra dihasiissanno yaanno. Biˈreeha Ibirayisxete qaale coyishiishaano nookkiha borreessinanni. Konni daafira YHWH yitanno fidale hakkawaro mayine nabbambanniro xa seekke afinohu dino. Ikkina tini Maganu suˈma gana hooltannonke? Yesuusi yannara isi suˈma Yeshuwa woyi Yehoshuwa  yinanniha ikkara dandaanno. Xaa yannara tenne bade afinohu dino. Ikkeennano, yannankera alamete doyichchora heeˈranno manni qaalinsanni rosamino garinni Yesuusa yinanni suˈma babbaxxino garinni woshshanno. Kuni manni umi sanira Yesuusi suˈma woshshinanni gara afa hooginohura calla konne suˈma gana diagurino. Hatteente gede, baara widira haˈrittoro ate umikki suˈma wolu qaalinni baxxino garinni woshshinanna macciishshattora dandaatto. Konni daafira, hunda Maganu suˈma woshshinanni gara afa hooganke suˈmasi woshshineemmota dihooltannonke.

Maganu suˈma Qullaawu Maxaafi giddonni fushshate korkaata assine kullannihu layinki coyi, lowo diro heeˈrinohu Yihudootu budi ledo xaado afiˈrinoho. Batinynyu Yihudooti Maganu suˈma gana dihasiissanno yite ammantanno. Insa hatto yite ammantinohu mitte Qullaawu Maxaafi higge doogimale horoonsidhino daafiraati. Hatti higge togo yitanno: “Maganikki Yihowa suˈma doogimale gantooti; korkaatuno Yihowa suˈmasi doogimale ganannoha qorichchishanno.”—Wolaphpho 20:7.

Tini higge Maganu suˈma doogimale gana hooltannote. Ikkollana ayirrinynyunni konne suˈma gana hooltannoni? Horonta dihooltanno. Ibirayisxennita Qullaawa Borro (“Akkala Gondooro”) borreessitinori baalunku, Maganu biˈre Isiraeelete uyino Higge garinni heedhannoreetinna ammanantinoreeti. Ikkeennano Maganu suˈma ganynyite gantanno. Lawishshaho kuri borreessaano, ammanaano gamba yite lowo qoonqonni faarsitannote batinynye faarso giddo Maganu suˈma eessitino. Qoleno Maganu Yihowa, magansidhannosiri suˈmasi gantanno gede hajajino; ammanantino soqqamaanosino hajajante suˈmasi gantino. (Iyyueeli 2:32; Soqqamaanote Looso 2:21) Konni daafira, yannankera noo Kiristaanino Yesuusinte gede Maganu suˈma ayirrinynyunni gana diwaajjanno.—Yohaannisi 17:26.

Qullaawa Maxaafa tirturi Maganu suˈma maaragete suˈminni soorransa lowo soˈrooti. Insa Magano shinqara dandiinannikkihanna dadillano ikko hagiidha dandaannokkiha lawissino. Qullaawu Maxaafi kayinni mannu ooso “Yihowa ledo jaaloontanno gede” amaalanno. (Faarso 25:14) Hanni lubbora baxatto jaalikkire hedi. Suˈmasi afoottokkiha ikkoommero isi ledo mageeshsha jaalooˈmatto? Hatteente gede, mannu Yihowa yinanniha Maganu suˈma afa hoogiro isi ledo hiitto ikke jaaˈloomanno? Qoleno mannu Maganu suˈma gana hoogiro xagge ikkitinota suˈmisi tiro afikki gatanno. Maganu suˈmi mayi tiro afiˈrino?

 Maganu suˈmisi tiro ammanamino soqqamaanchisira Musera kulino. Muse Maganu suˈma xaˈmi wote Yihowa, “Ikka hasiissannoere baala ikkeemmo” yee qolinosi. (Wolaphpho 3:14) Rozerhaami yinanni tiro konne qaale, “Ikka hasiˈreemmore baala ikkeemmo” yite tirtino. Konni daafira Yihowa alaamasi wonshate ikka hasiissannosire baala ikkanno.

Hanni ikka hasiˈrattore baala ikka dandaatto yine hendo. Hatto ikkoommero jaallakkira maa assatto? Jaallakki giddo mittu lowo geeshsha xiwamiro fullahino doktora ikkite hursattosi. Wolu jaalikki kayinni buxiro dureessa ikkite buximatenni fushshattosira dandaatto. Ikkollana, baalankare ikkate wolqakki shiimate. Ninke baalinketi wolqa shiimate. Qullaawa Maxaafa xiinxallitanni haˈritto kiiro, Yihowa qaale einore wonshate ikka hasiissannosire baala hiittoonni ikkinoro huwatatto daafira lowo geeshsha xaggeessiˈratto. Qoleno Yihowa wolqasi horoonsiˈre baxxannosire kaaˈlanno wote tashshi yaannosi. (2 Zeena 16:9) Suˈmasi afinokki manni tenne dancha akattasi huwatikki gatanno.

Kageeshsha laˈnummonte gede, Yihowa yinanni suˈmi Qullaawu Maxaafi giddo heeˈra hasiissannosi. Konni suˈmi tiro afankenna magansiˈneemmo wote horoonsiˈranke iimi anninkewa Yihowawa shiqate lowo geeshsha kaaˈlitannonke. *