FA PSALM 83:18 (na ini son Bijbel a de Psalm 83:19) vertaal na ini yu Bijbel? Na ini a Nieuwe-Wereldvertaling van de Heilige Schrift (Nyun-Grontapuvertaling fu den Santa Buku fu Bijbel) a tekst disi e taki: "So taki sma kan sabi taki yu, di nen na Yehovah, yu wawan na a Moro Heiwan fu heri grontapu.” Wan tu tra Bijbel vertaal a tekst disi na a srefi fasi. Ma na ini furu tra Bijbel a nen Yehovah no skrifi. Na presi fu dati, den gebroiki den wortu "Masra” noso "Gado”. San musu skrifi na ini a tekst disi? A musu de wan wortu di e sori go na a posisi fu Gado, noso a musu de a nen Yehovah?

A nen fu Gado na ini a Hebrewtongo

A tekst disi e taki fu wan nen. Furu fu den Bijbel buku ben skrifi fosi na ini a Hebrewtongo. Na ini den buku dati wan aparti nen fu wan sma skrifi. Na ini a Hebrewtongo a e skrifi so: יהוה (YHWH). Na ini Sranantongo sma e taki "Yehovah”. A de so taki a nen de fu feni na ini wán bijbeltekst nomo? Nôno. Na ini den fosi Hebrew Buku fu Bijbel, a nen disi skrifi sowan 7000 tron!

O prenspari a nen fu Gado de? Poti prakseri na a begi di Yesus Krestes ben leri sma. A begi dati e bigin so: "Wi Tata na hemel, meki yu nen kon santa” (Mateyus 6:9). Bakaten, Yesus ben begi Gado: "Tata, gi yu nen glori.” Dan Gado piki en komoto fu hemel, taki: "Mi gi mi nen glori èn mi o gi en glori baka” (Yohanes 12:28). A de krin taki a nen fu Gado de tumusi prenspari. Ma fu san ede son sma di vertaal Bijbel puru a nen disi poti tra wortu di abi fu du nanga a posisi fu Gado?

Soleki fa a sori, dan tu sani de fu san ede sma du dati. A fosi sani, na taki furu sma feni taki wi no musu gebroiki a nen fu Gado fu di wi no sabi soifri fa sma fu fositen ben e taki a nen. Te sma ben skrifi a Hebrewtongo fu fositen, dan den no ben e skrifi den letter a, e, i, o, nanga u. Fu dati ede, nowan sma na ini a ten disi kan taki soifri fa den sma na ini Bijbel ten ben e leisi YHWH. Ma yu denki taki disi musu tapu wi fu gebroiki a nen fu Gado? A kan taki sma na ini Bijbel ten ben e kari Yesus, Yesua, noso Yehosua. Ma nowan sma sabi soifri fa den ben e taki a nen disi. Toku sma na heri grontapu e kari a nen fu Yesus na difrenti sortu fasi, soleki fa den gwenti fu taki en na ini den eigi tongo. Den no sabi fa sma na ini a fosi yarihondro ben e kari a nen fu Yesus, ma toku dati no e tapu den fu gebroiki a nen. Na so a kan de tu taki, efu yu ben sa go na wan tra kondre, dan yu sa si taki den sma drape e taki yu nen heri tra fasi na ini a tongo fu den. Sobun, a no fu di wi no sabi fa sma ben e kari a nen fu Gado na ini owruten, meki wi no musu gebroiki en.

Wan tra sani fu san ede sma puru a nen fu Gado na ini Bijbel, abi fu du nanga wan gwenti di den Dyu abi langa ten kaba. Furu fu den Dyu e bribi taki sma no musu kari a nen fu Gado noiti. Soleki fa a sori, dan den e bribi disi fu di den no frustan wan fu den wet di skrifi na ini Bijbel. A wet e taki: "Yu no musu gebroiki a nen fu Yehovah yu Gado leki wan soso sani, fu di Yehovah no sa gi a sma pardon di e gebroiki a nen fu En leki wan soso sani.”—Exodus 20:7.

A wet disi e taki dati sma no musu gebroiki a nen fu Gado na wan fowtu fasi. Ma a de so taki a e tapu sma fu gebroiki a nen fu Gado na wan lespeki fasi? Nôno, kwetikweti. Ala den skrifiman fu den Hebrew Buku fu Bijbel (na "Owru Testamenti”) ben de getrow man di ben e libi akruderi a Wet di Gado ben gi den Israelsma fu owruten. Toku den ben e gebroiki a nen fu Gado furu tron. Fu eksempre, den ben gebroiki a nen disi na ini furu psalm, èn bigi grupu anbegiman ben e singi den psalm dati. Yehovah Gado ben taigi den anbegiman fu en srefi fu kari a nen fu en, èn den getrow sma ben e gi yesi na en (Yoèl 2:32; Tori fu den Apostel 2:21). Dati meki, Kresten na ini a ten disi no e frede fu gebroiki a nen fu Gado na wan lespeki fasi, neleki fa Yesus no ben frede fu du dati.—Yohanes 17:26.

Den sma di puru a nen fu Gado èn di poti wan tra wortu di den vertaal Bijbel, meki wan seryusu fowtu. Den e meki a gersi leki Gado de fara fu wi, neleki a no e broko en ede nanga wi, aladi Bijbel e gi libisma a deki-ati fu kon kisi ’wan tranga banti nanga Yehovah’ (Psalm 25:14). Kon meki wi teki wan bun mati fu yu leki eksempre. Yu ben o man taki dati unu na bun mati efu noiti yu no ben kon sabi fa a nen? Na so a de tu nanga a matifasi fu libisma nanga Gado. Efu sma no e kon sabi taki a nen fu Gado na Yehovah, dan fa den kan kon kisi wan krosibei banti nanga En? Boiti dati, te sma no e gebroiki a nen fu Gado, dan den no e kon sabi tu taki a nen disi wani taki wan spesrutu sani. San a nen fu Gado wani taki?

Gado srefi ben sori en getrow futuboi Moses san a nen fu En wani taki. Di Moses ben aksi Gado fa a nen, dan Yehovah ben piki en: "Mi sa sori fu de san mi sa sori fu de” (Exodus 3:14). Na ini a vertaling fu Rotherham a tekst disi skrifi so: "Mi o tron iniwan sani di mi wani tron.” Sobun, Yehovah kan kon tron iniwan sani di de fanowdu fu meki den prakseri fu en kon tru.

Kon meki wi taki dati yu ben kan tron iniwan sani di yu wani tron. San yu ben o du gi den mati fu yu? Efu wan fu den mati fu yu ben kon siki seryusu, dan yu ben kan tron wan koni datra èn yu ben kan dresi en. Efu wan tra mati fu yu ben kisi bigi moni problema, dan yu ben kan tron wan gudu sma èn yu ben kan lusu a problema gi en. Ma soleki fa a de, dan yu no man tron ala san yu wani tron. Nowan fu wi man du dati. Te yu studeri Bijbel, yu sa fruwondru fu si fa Yehovah e tron iniwan sani di de fanowdu fu meki den pramisi fu en kon tru. Èn nanga prisiri a e gebroiki a makti fu en gi a bun fu den wan di lobi en (2 Kroniki 16:9). Den sma di no sabi a nen fu Gado, no man kon sabi den moi sani disi di e sori fa Yehovah de.

A de krin taki a nen Yehovah musu fu skrifi na ini Bijbel. Te wi sabi san a nen disi wani taki èn te wi e gebroiki en na wan fri fasi na ini na anbegi fu wi, dan dati sa de wan bigi yepi gi wi fu kon moro krosibei na wi hemel Tata, Yehovah.*

*  Efu yu wani kon sabi moro fu a nen fu Gado, san a wani taki, èn fu san ede wi musu gebroiki en na ini na anbegi fu wi, dan luku a buku Sabi di e tjari joe go na têgo libi, bladzijde 24-27, di Yehovah Kotoigi tyari kon na doro.

← Luku a kapitel di e taki fu a tori disi