EBHAYIBHELINI lakho, Tihlabelelo 83:18 tihunyushwe njani? I-New World Translation of the Holy Scriptures ilibeka kanjena lelivesi: “Shangatsi bangati kutsi nguwe wedvwa lolibito lakhe linguJehova, nguwe Losetikwako Konkhe, lophakeme abuse umhlaba wonkhe.” Lamanyenti emahumusho eliBhayibheli asho lokufananako. Noko, emahumusho lamanyenti ayalikhipha libito lelitsi Jehova, esikhundleni salo afake ticu letinjengekutsi “Nkhosi” nobe “Simakadze.” Ngukuphi lokufanele kusentjentiswe kulelivesi? Sicu nobe libito lelitsi Jehova?

Lelivesi likhuluma ngelibito. NgesiHebheru sekucala lokwabhalwa ngaso incenye lenkhulu yeliBhayibheli, kuvela libito lelikhetsekile. Libhalwe kanjena ngetinhlavu tesiHebheru, יהוה (YHWH). NgesiSwati leligama libitwa ngekutsi “Jehova.” Lelibito livela evesini linye kuphela yini eBhayibhelini? Cha, akunjalo. Livela cishe tikhatsi letingu-7 000 emiBhalweni yekucala yesiHebheru.

Libaluleke kanganani libito laNkulunkulu? Cabanga ngemthandazo losibonelo lowashiwo nguJesu Khristu. Ucala ngekutsi: “Babe wetfu losezulwini, alingcweliswe libito lakho.” (Matewu 6:9) Kamuva, Jesu wathandaza kuNkulunkulu watsi: “Babe, dvumisa ligama lakho.” Kusenjalo, Nkulunkulu waphendvula asezulwini watsi: “Sengilidvumisile, ngisetalidvumisa futsi.” (Johane 12:28) Ecinisweni, libito laNkulunkulu libaluleke kakhulu. Pho, kungani labanye bahumushi balikhiphile libito laNkulunkulu kulamanye emahumusho eliBhayibheli babese bafaka ticu esikhundleni salo?

Kubonakala shengatsi kunetizatfu letimbili letiyinhloko. Sekucala, labanyenti batsi lelibito akukafanele lisetjentiswe ngobe lamuhla ayatiwa indlela lelalibitwa ngayo ekucaleni. SiHebheru sasendvulo sasibhalwa ngephandle kwabonkhamisa. Ngako kute longasho kutsi bantfu bangesikhatsi kusabhalwa liBhayibheli bebalibita kanjani libito lelitsi YHWH. Nobe kunjalo, loko kufanele yini kusivimbe kutsi sisebentise libito laNkulunkulu? Ngesikhatsi  sekubhalwa kweliBhayibheli, libito laJesu kungenteka kutsi lalibitwa ngekutsi Yeshua nobe Yehoshua—kute longasho aciniseke kutsi lalibitwa njani. Nobe kunjalo, bantfu emhlabeni wonkhe lamuhla balibita ngetindlela letihlukene libito laJesu, balibita ngendlela letayeleke elulwimini lwabo. Abesabi kusebentisa lelibito ngesizatfu sekutsi abati kutsi lalibitwa kanjani ekhulwini lekucala leminyaka. Ngendlela lefananako, nangabe bekungatsiwa uya kulelinye live bewungatfola kutsi libito lakho libitwa ngendlela lehlukile ngalolunye lulwimi. Ngako, kungaciniseki ngendlela yekubita libito laNkulunkulu akusiso nani sizatfu sekungalisebentisi.

Sizatfu sesibili lesivamise kuniketwa sekungalisebentisi libito laNkulunkulu eBhayibhelini sihlanganisa lisiko lemaJuda lasendvulo. Lamanyenti abekholelwa kutsi libito laNkulunkulu akufanele nje libitwe. Lenkholelo isekelwe ekuchazeni kabi umtsetfo weliBhayibheli lotsi: “Ungaliphatsi ngelite libito laSimakadze . . . [Jehova] wakho; ngobe Simakadze [Jehova] uyawumbeka licala lowo lophatsa libito lakhe ngelite.”—Eksodusi 20:7.

Lomtsetfo awukuvumeli kusebentisa kabi libito laNkulunkulu. Kodvwa lomtsetfo uyakuvimbela yini kusebentisa libito lakhe ngenhlonipho? Cha, akunjalo. Babhali bemiBhalo yesiHebheru (“Lithestamente Lelidzala”) bonkhe bebabantfu labetsembekile labebaphila ngeMtsetfo waNkulunkulu labewunikete ema-Israyeli asendvulo. Kodvwa bebalisebentisa njalo libito laNkulunkulu. Sibonelo saloku kutsi balifaka etingomeni letinyeti letatihlatjelelwa ticumbi tebantfu lebebakhonta Nkulunkulu. Nkulunkulu Jehova waze wayala tikhonti takhe kutsi tibite libito lakhe, futsi labo labatsembekile balalela. (Joweli 2:32; Imisebenti 2:21, catsanisa neNW.) Lamuhla, emaKhristu ayalisebentisa libito laNkulunkulu ngenhlonipho, njengobe naJesu alisebentisa.—Johane 17:26.

Bahumushi beliBhayibheli bente liphutsa lelibi kakhulu ngekufaka ticu esikhundleni selibito laNkulunkulu. Bente shengatsi Nkulunkulu ukhashane nebantfu futsi ute buntfu, kodvwa liBhayibheli lona litsi “bungani betfu naNkulunkulu busashisa.” (Jobe 29:4) Cabanga ngemngani wakho lomkhulu. Bebungashisa njani bungani benu ungalati libito lakhe? Ngendlela lefananako, bantfu nabafihlelwa libito laNkulunkulu lelitsi Jehova, bangasondzela njani kuye? Ngetulu kwaloko, ngalesikhatsi bantfu bangalisebentisi libito laNkulunkulu, basala bangati kutsi lisho kutsini. Vele lisho kutsini lelibito laNkulunkulu?

 Nkulunkulu lucobo lwakhe walichaza kutsi lisho kutsini libito lakhe encekwini yakhe letsembekile Mosi. Ngalesikhatsi Mosi abuta Nkulunkulu ngelibito lakhe, Jehova waphendvula: “Nginguye Lenginguye.” (Eksodusi 3:14) Lihumusho laRotherham liwabeka kanjena lamavi: “Ngiyoba ngunobe yini lengitsandza kuba ngiyo.” Ngako Jehova angaba ngunobe yini ledzingekako kute agcwalise tinjongo takhe.

Ase sitsi bewungakwati kuba ngunobe yini lofuna kuba ngiyo. Bowungabentelani bangani bakho? Nangabe lomunye abengagula kakhulu, bewungaba ngudokotela lonelikhono bese uyamelapha. Nangabe lomunye abengaba senkingeni yetimali, bewungatenta injinga umsite. Liciniso likutsi, angeke wena ube ngunobe yini loyitsandzako. Loko kunjalo kitsi sonkhe. Njengobe ufundza liBhayibheli, utawumangala kutsi Jehova utenta abe ngunobe yini lendzingekako kute afeze tetsembiso takhe. Kumjabulisa kakhulu kusebentisa emandla akhe kulabo labamtsandzako. (2 Tikhronike 16:9) Letici letinhle tebuntfu baJehova abatiboni labo labangalati libito lakhe.

Ecinisweni, libito laJehova kufanele lisetjentiswe eBhayibhelini. Kwati inchazelo yalo nekulisebentisa ngalokukhululekile ekukhonteni kuyokusita usondzele nakakhulu kuBabe wetfu wasezulwini, Jehova. *