TLAN xputsa kBiblia Salmo 83:18 (82:19 kmakgapitsi biblias). ¿Tuku wan uma versículo? Salmos Ixtatlincan ti Talipawan Dios wan: «Katakatsilh ti kintasitsini xlakata wata wix Dios y Jehová mintukuwini. Wata wix Dios xala talhman, ti mapakgsinan nak ixlitilanka katiyatni». Na xtachuna wi klhuwa tachuwin nema matitaxtikanit Biblia. Pero makglhuwa akxni matitaxtikgolh Biblia kʼatanu tachuwin ni wilikgolh xtukuwani Jehová chu lilakgpalikgolh «Dios» o «kinTlatkan». Wa xlakata, ¿tuku xlitawilat kʼuma texto xalak Biblia? ¿Kaj akgtum tuku xlilakgapaska Dios, o xtukuwani Jehová?

Ktexto wi akgtum tukuwani. Tachuwin xahebreo xala makgasa, nema talimaklakaskilh xlakata nalitatsokga atsinu ni maktuminika Biblia, kSalmo 83:18 wi akgtum tukuwani nema ni anan xtachuna. Uma tukuwani litatsokga letras xahebreo יהוה (YHWH). Chu xatotonaco tlan wankan Jehová. ¿Kaj makgtum wi uma tukuwani kBiblia? Ni kaj makgtum, Biblia nema tatsokgli ktachuwin xahebreo xala makgasa wilikanit atsinu ni akgtujun mil.

¿La xlilakaskinka xtukuwani Dios? Kalakapastakwi oración nema talilakgapasa Padrenuestro, xaliʼakxilhtit oración nema Jesucristo makgxtakgli. Chuna litsuku: «KinTlatikan tiku wilapi kʼakgapun, katamasantujlilh mintukuwani» (Mateo 6:9, TNM). Ni lu lhuwa kilhtamaku titaxtulh akxni Jesús xmasiyanit uma oración, skinilh Dios: «Kamatlanki mintukuwini». Chu Dios kgalhtilh kʼakgapun: «Kmatlankinitta, na nakmatlankipalay amakgtum» (Juan 12:28). Uma limasiya pi xtukuwani Dios lu xlakaskinka. Pero komo lu xlakaskinka xtukuwani Dios, ¿tuku xlakata makgapitsi tiku matitaxtikgolh Biblia kʼatanu tachuwin ni wilikgolh xtukuwani Dios chu lilakgpalikgolh tuku lilakgapaskan?

Wi pulaktiy tuku xlakata. Xapulana, lhuwa latamanin wankgo pi ni xlilat namaklakaskinaw xtukuwani Dios xlakata  ni katsiyaw la xwankan. Xlakata tachuwin xahebreo xalamakgasa akxni xtatsokgnan ni xmaklakaskinkgo vocales, la uku niti katsi tuku vocales xtamaklakaskin akxni xtalikgalhtawakga letras YHWH akxni tsokgka Biblia. Xlakata ni katsiyaw la xwankan xtukuwani Dios, ¿wamputun pi ni namaklakaskinaw? Akxni tsokgka Biblia, xtukuwani Jesús max chuna xwankan o xtakgaxmata Yeshúa o Yehoshúa, niti la nawan pi chuna xwankan. Pero xlikalanka katiyatni tipalhuwa la tatsokga xtukuwani Jesús chu wankan chuna la tlan takgaxmata kʼakgatunu tachuwin. Maski latamanin ni katsikgo la xwankan xtukuwani Jesús kxapulana siglo, xlakan limaklakaskinkgo. Nachuna, komo xpit atanu kachikin niku atanu tachuwin chuwinankgo xʼakxilhti pi mintukuwani talakgpali. Wa xlakata maski ni liwana katsiyaw la xwankan xtukuwani Dios makgasa, xlakaskinka namaklakaskinaw.

Xlipulaktiy tuku xlakata mapanukgo xtukuwani Dios kBiblia, wa xlakata akgtum takanajla nema xkgalhikgo judíos. Lhuwa judíos lakpuwankgo pi ni xlilat namapakuwiyaw Dios. Chuna xkanajlakgo xlakata nitlan xlimaklakaskinkgo akgtum limapakgsin xalak Biblia nema wan: «Ni natiyaya xtukuwani Jehová miDios xlakata tuku nitlan, xlakata xla ni kaj chuna namakgxtakga ni namalakgaxokge tiku tiyay xtukuwani xlakata tuku nitlan» (Éxodo 20:7).

Xlikana uma limapakgsin wan pi ni namaklakaskinaw xtukuwani Dios xlakata tuku nitlan. Pero akxni maklakaskinaw, ¿wan Biblia pi nitlan? Ni. Putum tiku tsokgkgolh Biblia kxahebreo («Antiguo Testamento») putum kilhtamaku xkgalhakgaxmatkgo xLimapakgsin Dios nema kamaxkilh israelitas. Xlakan makglhuwa limaklakaskinkgolh xtukuwani Dios. Akgtum liʼakxilhtit, xlakan wilikgolh klhuwa salmos nema pixlanka xkilhtlikgo tiku xkakninanikgo Dios. Asta Jehová kalimapakgsilh kskujnin kalimapakuwikgolh xtukuwani chu tiku ni xmakgxtakgkgo kawanilh pi xkgalhakgaxmatkgolh (Joel 2:32; Hechos 2:21). Wa xlakata, kstalaninanin Cristo xala uku liwana katsiyaw pi tlan nalimaklakaskinaw xtukuwani Dios chuna la xlilat la tlawalh Jesús (Juan 17:26).

Akxni tiku matitaxtikgo Biblia kʼatanu tachuwin lilakgpalikgo  xtukuwani Dios tuku lilakgapaskan, lu nitlan tuku tlawamakgolh. Tlawakgo pi kaʼakxilhka Dios la tiku lu makgat wi chu ni makgkatsi chu ni lakapastaknan. Pero Biblia kinkamakgpuwantiniyan “lu tlan natalalinaw” (Salmo 25:14). Kalakapastakti chatum amigo tiku lu tlan talalipina. Komo wix nipara xkatsi la wanikan, ¿tlan miʼamigo xwa? Nachuna akxni latamanin ni katsikgo la wanikan Dios, ¿la tlan natalakatsuwinikgo? Latamanin tiku ni maklakaskinkgo uma tukuwani ni katsikgo pi lu tlan tuku wamputun. ¿Tuku wamputun xtukuwani Dios?

Dios wanilh xlakskujni Moisés tuku wamputun xtukuwani. Akxni Moisés kgalhskilh la xwanikan, Jehová kgalhtinalh: «Akit naklitaxtu tuku akit naklitaxtuputun» (Éxodo 3:14). Rotherham na matitaxtilh kʼatanu tachuwin chu chuna wan: «Akit Nakwan tuku akit nakwamputun». Wa uma likatsiyaw pi Jehová tlan tlawa tuku natalakaskin xlakata namakgantaxti tuku lakapastaknit natlawa chu tlan tlawa pi xtamalakatsukin katlawalh tuku talakaskin xlakata nakgantaxtu xtalakaskin.

Komo wix tlan xtlawa tuku xtlawaputu. ¿Tukuya litlan xkatlawani miʼamigos? Komo chatum miʼamigo snun xtatatlalh max wix xwanti chatum xatlan makuchina chu xmakuchi. Komo achatum miʼamigo xmakgatsankgalh lhuwa tumin, wix xwanti chatum tiku kgalhi lhuwa tumin chu xmaxki. Xlikana, wix chu akit nila putum tlan tlawayaw, wi tuku ni matlaniyaw. Pero akxni tlakg nalikgalhtawakgaya Biblia naʼakxilha pi Jehová tlawa putum tuku talakaskin xlakata namakgantaxti tuku lakapastaknit natlawa. Chu lipaxuwa akxni limaklakaskin xlitliwakga xlakata nakamakgtaya latamanin tiku paxkikgo (2 Crónicas 16:9). Tiku ni katsikgo xlakata xtukuwani Dios ni lakgapaskgo uma tuku xastlan xlakata la xtayat Jehová.

Uma tuku akxilhwi litasiya pi xtukuwani Dios xlitawilat kBiblia. Akxni katsiyaw tuku wamputun tukuwani Jehová, chu limaklakaskinaw xlakata nalikakninaniyaw, kinkamakgtayayan xlakata natalakatsuwiniyaw Jehová kinTlatkan xalak akgapun. *