EBYONGIRWEHO
Ibara lya Ruhanga—Enkozesa Yalyo n’Amakuru Gaalyo
OMU Baibuli yawe, Zabuli 83:18 ruhindwirwe ruta? Omu New World Translation of the Holy Scriptures rwolekerwe ruti: “Nukwo abantu bamanye ngu iwe, ibara lyawe Yahwe, niwe wenka ali haiguru muno omu nsi yoona.” Baibuli ezimu ziruhindura omu mulingo nugwo gumu. Kyonka, empindura za Baibuli ezindi nyingi ziihamu ibara lya Ruhanga, Yahwe, omu kikaro kyalyo nizitekamu ebitiinisa, “Mukama” rundi “ow’Ebiro n’Ebiro.” Kiki ekyakukozesibwe omu ruka’ra runu? Ekitiinisa rundi ibara Yahwe?
Ibara lya Ruhanga omunyuguta ez’Oruheburaniya
Oruka’ra runu rubaza ha ibara. Mu rulimi Oruheburaniya orwakara ebicweka ebikukira ebya Baibuli oru byahandiikirwemu, ibara ely’embaganiza lizokamu. Lihandiikwa liti יהוה (YHWH) omu nyuguta ez’Ekiheburaniya. Omu Runyoro/Rutooro ibara eryo likira kumanywa nka “Yahwe.” Baitu, Ibara eryo lizooka omu ruka’ra rwa Baibuli rumu rwonka? Nangwa. Lizooka omu Byahandiikirwe eby’Oruheburaniya eby’aira haihi emirundi 7,000!
Ibara lya Ruhanga likuru kwingana nkaha? Cumitiriza ha saara ey’ekyokurorraho Yesu Kristo ei yatuhaire. Etandika eti: “Isitwe ali omuiguru, ibara lyawe [l]yezebwe.” (Matayo 6:9) Hanyuma Yesu akasaba Ruhanga ati: “Isenyowe nyumiza ibara lyawe.” Ruhanga akagarukamu n’asigikira omuiguru n’agamba: “Nkalinyumiza, kandi ndigarukamu okulinyumiza.” (Yohana 12:28) Nikyeyoleka kurungi ngu ibara lya Ruhanga likuru muno. Hati, habwaki, abahinduzi ba Baibuli abamu balihiire kimu omu mpindura zaabu eza Baibuli, omu kikaro kyalyo batekamu ebitiinisa?
Nikizooka haroho ensonga ibiri enkuru. Ey’okubanza, baingi bagamba ngu ibara eryo tirikutekwa kukozesebwa habwokuba okwaturwa kwalyo okwa kara tikukumanywa hati. Oruheburaniya orwa ira rwali rutaina nyuguta enyatuzi. Nahabwekyo busaho n’omu hati akusobora kugumya omulingo abantu b’omu busumi bwa Baibuli ogu bayaturamuga ibara YHWH. Baitu kinu kyakutukugire kukozesa ibara lya Ruhanga? Omu busumi bwa Baibuli ibara Yesu nirisobora kuba lyayaturwaaga Yeshua rundi Yehoshua—busaho asobora kukigumya. Kyonka, abantu okwehinguliriza ensi yoona batura ibara lya Yesu omu miringo ekwahukana n’okusigikira ha ndimi zaabu. Tibabandara kukozesa ibara eryo ngu habwokuba tibamanyire enyatura yalyo ey’omukyasa eky’okubanza. Omu mulingo nugwo gumu, kakusangwa ogenda omu nsi endi nosobora kwesanga ibara lyawe niryaturwa omu mulingo ogundi. Nahabwekyo obutaba n’okugumya ha nyaturwa y’ibara lya Ruhanga eya ira tikikututanga kulikozesa.
Ensonga ey’akabiri ei baha habw’okwihamu ibara lya Ruhanga omu Baibuli, eina akakwatiraine n’emirwa y’Ekiyudaya. Abakira obwingi bakakyekwati’ra ngu ibara lya Ruhanga tirikutekwa kwaturwa. Nikizoka enyikiriza enu esigiki’ra ha kiragiro ekya Baibuli ekyayetegerezibwe kubi ekigamba: “Otalirahi’ra busa ibara lya Mukama Ruhanga wawe, baitu Mukama alimutaho omusango anyakurahi’ra busa ibaralye.”—Okuruga 20:7.
Ekiragiro kinu kikuhakana kukozesa kubi ibara lya Ruhanga. Baitu nikitanga kulikozesa omu mulingo gw’okuliheisa ekitiinisa? Nakake. Abahandiiki ba Baibuli ey’Ekiheburaniya (“Ekiragano Ekya Ira”) boona bakaba bantu abesigwa abayoroberaga Ebiragiro Ruhanga ebi yahaire Isareri eya ira. Kyonka, mirundi nyingi bakakozesa ibara lya Ruhanga. Nk’eky’okurorraho, bakalikozesa muno omu zabuli ezazinwaga muno abarukuramya. Kandi Yahwe Ruhanga akaragira abaramya be okukungaga ibara lye, kandi abesigwa bakyoroberaga. (Yoweri 2:32; Engeso 2:21) Nahabwekyo, Abakristayo biro binu tibabandara kukozesa ibara lya Ruhanga omu mulingo ogw’ekitiinisa, nka Yesu oku yakozere.—Yohana 17:26.
Abahinduzi ba Baibuli bakora ensobi y’amaani obu bahingisa ibara lya Ruhanga n’ebitiinisa. Bazokesa Ruhanga kuba muntu w’omundugu muno, atasemerire n’okubazibwaho, kandi kunu Baibuli ehagira abantu kuba “n’obunywani obwahaihi nawe.” (Zabuli 25:14) Tekereza ha munywani wawe muno. Mali yakubaire munywani wawe muno kakuba wabaire otamanyire ibara lye? Omu mulingo nugwo gumu, abantu barasobora bata kutunga enkoragana ey’amaani na Yahwe ou batamanyire ibara lye? Kwongereho, abantu obu batakozesa ibara lya Ruhanga, tibasobora kumanya amakuru galyo amarungi. Ibara linu erirukwera limanyisa ki?
Ruhanga wonyini akasobo’ra omuhereza we omwesigwa Musa amakuru g’ibara lye. Musa obu yakagwize ha’ibara lya Ruhanga Yahwe, akamugarukamu ati: “Ninyija kuba ekyo ekinyija kuba.” (Okuruga 3:14, NW) Empindura ya Rotherham, oruka’ra runu eruhindura eti: “Ninyija kuba kyona ekindagonza.” Nahabwekyo Yahwe nasobora kuba kyoona ekikwetagisa kusobora kuhikiriza ebigendererwa bye.
Kakuba wali nosobora kuba kyoona eky’okugonza kuba. Biki ebi wakukoliire banywani baawe? Kakusangwa omu hali bo arwara, wakufokere dakitali omukugu omukiza. Kandi kakusangwa ondi aferwa ensimbi ze, wakufokere omugudda n’omwiha omu kizibu ekyo. Amananu gali nti, oina ahogarukira omu by’okusobora kuba. Itwena nukwo tuli. Noyeyongera kwega Baibuli noija kurora ngu Yahwe aba kyoona eky’akugonza kuba kusobora kuhikiriza eby’araganiza. Kandi kimusemeza muno kukozesa amaani ge habw’abo abamugonza. (2 Ebyomubusinge 16:9) Abo abatamanyire ibara lya Yahwe, tibasobora kumanya emiringo ye enu ennungi muno.
Nikyeyoleka kurungi ngu ibara Yahwe lihikire kukozesebwa omu Baibuli. Kumanya amakuru galyo n’okulikozesa omu kuramya kwaitu bukonyezi bw’amaani omu kui’ra haihi na Isiitwe ow’omuiguru, Yahwe. *
^ kac. 12 Kumanya ebirukukiraho ha ibara lya Ruhanga, amakuru galyo n’ensonga habwaki line kukozesebwa omu kuramya rora akatabu The Divine Name That Will Endure Forever, akatiirwe Abakaiso ba Yahwe.
Nosobora Kugonza na Binu;
ENYEGESA ZA BAIBULI ENKURU
Ruhanga Aine Ibara?
Ruhanga aine ebitinisa bingi nka ow’Obusobozi, Omuhangi Bwona, kandi Mukama. Baitu ibara lya Ruhanga likozesebwa omu Baibuli emirundi erukuhingura 7,000.
