E ‵FULI pefea te Salamo 83:18 i tau Tusi Tapu? E ‵fuli penei i te New World Translation of the Holy Scriptures te fuaiupu tenā: “Ke iloa ne tino me i a koe, telā ko Ieova tou igoa, ko koe fua ko te ‵toe tino Tafasili i te Maluga i te lalolagi kātoa.” E tai penā foki a ‵fuliga i nisi Tusi Tapu. Kae e uke a ‵fuliga e se fakaaogā te igoa o Ieova, kae e sui i ei ki vaegā tofi pelā mo te “Aliki” io me ko te “Atua ki te se-gata-mai.” Se a te mea e ‵tau o fakaaogā i te fuaiupu tenei? Ko te ‵tofi io me ko te igoa, ko Ieova?

E faipati te fuaiupu tenā e uiga ki se igoa. E sae mai i konei i te ‵gana Epelu mua telā ne fakaaogā i te tusiga o te Tusi Tapu a te igoa tu ‵kese o te Atua. E tusi penei te igoa tenā יהוה (YHWH) i mataimanu Epelu. A te ‵fuliga masani o te igoa tenā i te ‵gana Tuvalu ko Ieova. E mata, e sae mai fua te igoa tenā i te tusi siki e tasi i te Tusi Tapu? Ikai. E sae mai faka 7,000 taimi te igoa tenā i tusitusiga mua o te Tusi Tapu i te ‵gana Epelu!

E pefea te tāua o te igoa o te Atua? Mafaufau la ki te ‵talo fakaakoako telā ne fai ne Iesu. E kamata penei: “Te motou Tamana telā i te lagi: ke tapu tou igoa.” (Mataio 6:9) Fakamuli ifo, ne ‵talo atu Iesu ki te Atua, penei: “Te Tamana, tuku atu te vikiga ki tou igoa!” Ne tali mai te Atua mai te lagi, penei: “Ko oti ne tuku atu ne au te ‵malu [ki ei], kae ka toe tuku atu foki ne au te ‵malu [ki ei].” (Ioane 12:28) E mautinoa i ei me e tāua ‵ki eiloa te igoa o te Atua. Kaia la ne seki fakaaogā ei ne nisi tino ‵fulitusi a te igoa tenei i te ‵fuliga o olotou Tusi Tapu kae ne sui fua ne latou ki tofi?

E foliga mai me e lua a pogai ne fai ei penā. Muamua la, e kinau atu a nisi tino me e se ‵tau o fakaaogā te igoa tenā me ko se iloa nei tena faka‵leoga tonu i aso mua. Ne tusi ki lalo a pati Epelu i aso mua e aunoa mo ne vaueli. Tela la, e seai se tino i aso nei e mafai o iloa tonu ne ia me ne faka‵leo pefea ne tino i aso o te Tusi Tapu a te YHWH. E mata, e se ‵tau o fakaaogā ne tatou te igoa tenā o te Atua? I aso o te Tusi Tapu, kāti ne faka‵leo aka a te igoa o Iesu penei Iesuā io me ko Ieosuā—e seai foki se tino e mautinoa i a ia te faka‵leoga  tonu. Kae e fakaaogā sāle ne tino i te lalolagi kātoa a faka‵leoga kese‵kese mō te igoa o Iesu e ‵tusa loa mo tulafono i olotou ‵gana. E se fakalotolotolua latou i te fakaaogāga o igoa konā faitalia me e se iloa ne latou te faka‵leoga tonu o te igoa o Iesu i te taimi ne ola ei a ia i te lalolagi nei. E penā foki loa māfai e nofo atu koe i se fenua fakaa‵tea, kāti ka iloa aka ne koe me e tai ‵kese te faka‵leoga o tou igoa i se isi ‵gana. Tela la, faitalia me e se iloa tonu ne tatou te faka‵leoga o te igoa o te Atua i aso mua, e se ‵tau o fakata‵mala tatou i te fakaaogāga o te igoa tenā.

A te lua o pogai e fai sāle atu mō te tapalega o te igoa o te Atua mai te Tusi Tapu, e aofia i ei se tū telā ko leva ne masani ki ei te kau Iutaia. E tali‵tonu eiloa te tokoukega o latou me e se ‵tau lele eiloa o faka‵leo aka te igoa o te Atua. E fakavae eiloa te talitonuga tenei ki te fakauigaga ‵se o se tulafono i te Tusi Tapu, telā e fai mai, penei: “Sa fakaaogā ne koutou toku igoa ki mea ma‵sei, me i a au, te Aliki [ko Ieova] te otou Atua, ka fakasala ne au so se tino e fakaaogā ‵se ne ia toku igoa.”—Esoto 20:7.

E fakatapu i te tulafono tenā te sōna fakaaogāga o te igoa o te Atua i se auala sē ‵tau. Kae e mata, e fakatapu i ei te fakaaogāga mo te āva o tena igoa? Ikai, e se penā loa. A tino kolā ne tusi ne latou te Tusi Tapu i te ‵gana Epelu (te “Feagaiga Mua”) ne tāgata fakamaoni katoa kolā ne ola e ‵tusa mo te Tulafono telā ne tuku atu ne te Atua ki te kau Isalaelu mua. Kae ne fakaaogā faeloa ne latou te igoa o te Atua. Ne fakaaogā ne latou te igoa tenā i pese o salamo e uke kolā ne usu sāle ne tino tapuaki e tokouke. Ne fakatonu atu foki eiloa a Ieova te Atua ki ana tino tapuaki ke ka‵laga atu ki tena igoa, kae ne faka‵logo a tino fakamaoni ki ei. (Ioelu 2:32; Galuega 2:21) Tela la, e fakaaogā eiloa ne Kelisiano i aso nei te igoa o te Atua mo te āva, e pelā eiloa mo mea kolā ne fai ne Iesu.—Ioane 17:26.

E ‵se ‵ki eiloa te mea ne fai ne tino kolā ne ‵fuli ne latou te Tusi Tapu i te suiga ne latou o te igoa o te Atua ki tofi. E fai i ei ne latou ke foliga mai me e ‵mao ‵ki te Atua kae e se mafai o fakamasani atu tatou ki a ia. Kae e fakamalosi mai te Tusi Tapu ki tino ke fai latou mo “taugasoa” o Ieova. (Salamo 25:14) Mafaufau ki se taugasoa pili o koe. E mafai pefea o ‵pili te lū vā māfai e seki iloa aka eiloa ne koe tena igoa? E penā foki loa, kafai e se iloa ne tino te igoa o te Atua, ko Ieova, e mafai pefea o fakapilipili ‵tonu atu latou ki a ia? E se gata i ei, kafai e se fakaaogā ne tino te igoa o te Atua, ko se iloa foki ne latou te uiga gali o tena igoa. Se a te uiga o te igoa o te Atua?

 Ne fakamatala atu eiloa ne te Atua te uiga o tena igoa ki tena tavini fakamaoni ko Mose. I te taimi ne fesili atu ei a Mose e uiga ki te igoa o te Atua, ne tali atu a Ieova, penei: “Ka fai eiloa ne au so se mea e ‵tau o fai.” (Esoto 3:14, NW) E penei te ‵fuliga a Rotherham: “Ka fai Au mo fai so se mea e loto au ki ei.” Tela la, e mafai o fai a Ieova mo fai so se mea e manako a ia ki ei ke fakataunu ei ana fuafuaga.

Ke mafaufau me mafai ne koe o fai so se mea e manako koe ki ei. Ne a au mea e mafai o fai ki ou taugasoa? Kafai ko masaki malosi se tino i a latou, ka mafai o fai koe pelā me se tokitā atamai kae faka‵lei aka i ei tena masaki. Kafai ko seai ne tupe a te suā taugasoa, e mafai o fai koe mo fai se tino maumea telā e fesoasoani atu ki a ia. A te fakalavelave la, e se mafai o fai ne koe so se mea e manako koe ki ei. E penā loa tatou katoa. Kafai e tumau koe i tau sukesukega ki te Tusi Tapu, ka ofo koe ke lavea atu me e mafai o fai ne Ieova so se mea e manako a ia ki ei ke fakataunu ei ana folafolaga. Kae se mea fakafiafia ki a ia ke fakaaogā tena ‵mana o fesoasoani atu ki tino kolā e a‵lofa ki a ia. (2 Nofoaiga Tupu 16:9) E se malama‵lama a tino kolā e se iloa ne latou te igoa o Ieova i ana uiga ‵gali konei.

E manino i ei me e ‵tau eiloa o maua te igoa o Ieova i te Tusi Tapu. Kafai e maina tatou i tena uiga kae e fakaaogā faeloa ne tatou te igoa tenā i te ‵tou tapuakiga ka fesoasoani malosi mai i ei ke fakapili‵pili atu tatou ki te ‵tou Tamana faka-te-lagi, ko Ieova. *