مزید معلومات

خدا کے نام کا استعمال اور اس کا معنی

بائبل کا جو ترجمہ آپ استعمال کرتے ہیں،‏ اس میں زبور ۸۳:‏۱۸ میں کیا لکھا ہے؟‏ اُردو بائبل میں اس آیت کا ترجمہ یوں کِیا گیا ہے:‏ ”‏تاکہ وہ جان لیں کہ تُو ہی جس کا نام یہوؔواہ ہے تمام زمین پر بلندوبالا ہے۔‏“‏ خدا کا نام ”‏یہوواہ“‏ بائبل کے بہت سے ترجموں میں استعمال ہوا ہے۔‏ لیکن بعض مترجمین نے اس آیت میں ”‏یہوواہ“‏ کی بجائے ”‏خداوند“‏ یا ”‏خدا“‏ جیسے لقب لگائے ہیں۔‏ کیا اس آیت میں خدا کا نام ”‏یہوواہ“‏ آنا چاہئے یا پھر ایک لقب؟‏

جیسا کہ آپ نے پڑھا ہے زبور ۸۳:‏۱۸ میں ایک نام کا ذکر کِیا گیا ہے۔‏ بائبل کا ایک بڑا حصہ عبرانی زبان میں لکھا گیا تھا۔‏ اس زبان میں زبور ۸۳:‏۱۸ میں خدا کا نام یوں لکھا جاتا ہے:‏ יהוה جس کے ہجے ی-‏ہ-‏و-‏ہ ہیں۔‏ اُردو میں یہ نام عام طور پر ”‏یہوواہ“‏ لکھا جاتا ہے۔‏ کیا خدا کا نام بائبل میں صرف اِسی آیت میں استعمال ہوا ہے؟‏ جی‌نہیں۔‏ عبرانی صحائف میں یہ نام تقریباً ۰۰۰،‏۷ مرتبہ آتا ہے۔‏

خدا کے نام کو استعمال کرنا بہت اہم ہے۔‏ اس سلسلے میں اس دُعا پر غور کیجئے جو یسوع نے اپنے شاگردوں کو سکھائی تھی۔‏ یہ دُعا یوں شروع ہوتی ہے:‏ ”‏اَے ہمارے باپ تُو جو آسمان پر ہے تیرا نام پاک مانا جائے۔‏“‏ (‏متی ۶:‏۹‏)‏ ایک اَور موقعے پر یسوع نے یوں دُعا کی:‏ ”‏اَے باپ!‏ اپنے نام کو جلال دے۔‏“‏ اِس پر خدا نے آسمان سے جواب دیا:‏ ”‏مَیں نے اُس کو جلال دیا ہے اور پھر بھی دوں گا۔‏“‏ (‏یوحنا ۱۲:‏۲۸‏)‏ اس سے ظاہر ہوتا ہے کہ خدا کے نام کو استعمال کرنا بہت ہی اہم ہے۔‏ تو پھر بعض مترجمین نے بائبل کے ترجموں میں سے خدا کا نام یہوواہ ہٹا کر خدا یا خداوند جیسے لقب کیوں لگائے ہیں؟‏

کئی لوگ اس کی دو وجوہات بتاتے ہیں۔‏ وہ کہتے ہیں کہ ہمیں اس نام کو اس لئے استعمال نہیں کرنا چاہئے کیونکہ ہم یہ نہیں جانتے کہ قدیم زمانے میں اس کا تلفظ کیسے کِیا جاتا تھا۔‏ شروع شروع میں عبرانی زبان حروفِ‌علت (‏یعنی تلفظ ظاہر کرنے والی علامات)‏ کے بغیر لکھی جاتی۔‏ چونکہ ہم خدا کے نام  کے بارے میں صرف یہ جانتے ہیں کہ اُس کے ہجے ی-‏ہ-‏و-‏ہ تھے اس لئے ہم یقین سے نہیں کہہ سکتے کہ قدیم زمانے میں اسے کیسے بولا جاتا تھا۔‏ کیا اس کا یہ مطلب ہے کہ ہمیں خدا کے نام کو استعمال نہیں کرنا چاہئے؟‏ اس سلسلے میں یسوع کے نام کی مثال لیجئے۔‏ ہو سکتا ہے کہ قدیم زمانے میں اسے یِشُوعا یا یِہوشُوعا بولا جاتا تھا۔‏ لیکن آج ہم اس کا صحیح تلفظ نہیں جانتے۔‏ اس کے باوجود دُنیابھر میں لوگ یسوع کے نام کو استعمال کرتے ہیں۔‏ اس نام کا جو تلفظ اُن کی زبان میں عام ہے،‏ لوگ اسے بِلاجھجک زبان پر لاتے ہیں۔‏ اسی طرح آپ نے شاید کسی اَور مُلک میں سفر کرتے وقت یہ پایا ہوگا کہ آپ کے نام کو کسی دوسری زبان میں فرق تلفظ دیا جاتا ہے۔‏ ان مثالوں سے کیا ظاہر ہوتا ہے؟‏ یہ بات سچ ہے کہ ہم خدا کے نام کے اصلی تلفظ کو نہیں جانتے لیکن اس وجہ سے اس نام کو استعمال کرنے سے انکار کرنا غلط ہے۔‏

بائبل کے ترجموں میں خدا کا نام اس لئے بھی شامل نہیں کِیا جاتا ہے کیونکہ یہودی اسے زبان پر لانا ہی گُناہ خیال کرتے ہیں۔‏ اس کی وجہ یہ ہے کہ وہ قدیم زمانے سے خدا کے ایک حکم کو غلط سمجھتے آ رہے ہیں۔‏ خدا کی شریعت میں لکھا ہے:‏ ”‏تُو [‏یہوواہ]‏ اپنے خدا کا نام بےفائدہ نہ لینا کیونکہ جو اُس کا نام بےفائدہ لیتا ہے [‏یہوواہ]‏ اُسے بےگُناہ نہ ٹھہرائے گا۔‏“‏—‏خروج ۲۰:‏۷‏۔‏

اس حکم کے مطابق خدا کے نام کا احترام نہ کرنا گُناہ ہے۔‏ لیکن اسے احترام کے ساتھ استعمال کرنے سے منع نہیں کِیا گیا۔‏ عبرانی صحائف (‏یعنی ”‏پُرانے عہدنامے“‏)‏ کے لکھنے والے آدمی خدا کی شریعت پر چلتے تھے۔‏ اُنہوں نے خدا کا کلام درج کرتے وقت یہوواہ کا نام بار بار شامل کِیا۔‏ مثال کے طور پر خدا کا نام زبور کی کتاب میں کئی مرتبہ آتا ہے۔‏ اس کتاب میں ایسے گیت بھی شامل ہیں جو اُونچی آواز میں گائے جاتے تھے یعنی باقاعدگی سے زبان پر لائے جاتے تھے۔‏ اس بات پر بھی غور کیجئے کہ یہوواہ خدا ہی نے اپنے بندوں کو اپنا نام لینے کا حکم دیا۔‏ اُس کے وفادار خادم اس حکم پر پورا اُترتے تھے۔‏ (‏یوایل ۲:‏۳۲؛‏ اعمال ۲:‏۲۱‏)‏ لہٰذا،‏ آج بھی سچے مسیحی بڑے احترام سے خدا کا نام استعمال کرتے ہیں،‏ جیسا کہ یسوع مسیح نے بھی کِیا تھا۔‏—‏یوحنا ۱۷:‏۲۶‏۔‏

 بائبل کے ترجموں میں خدا کے نام کی بجائے ایک لقب لگانے سے مترجمین بڑی غلطی کرتے ہیں۔‏ وہ لوگوں میں یہ غلط‌فہمی پیدا کرتے ہیں کہ خدا انسان سے بہت دُور ہے اور اُس کی قُربت حاصل کرنا ممکن نہیں ہے۔‏ لیکن زبور ۱۴۵:‏۱۸ میں بتایا گیا ہے کہ ”‏[‏یہوواہ]‏ اُن سب کے قریب ہے جو اُس سے دُعا کرتے ہیں۔‏“‏ ذرا اپنے کسی قریبی دوست کے بارے میں سوچیں۔‏ اگر آپ اُس کا نام تک نہیں جانتے تو کیا آپ واقعی کہہ سکتے ہیں کہ وہ آپ کا قریبی دوست ہے؟‏ اِسی طرح اگر خدا کے نام پر پردہ ڈالا جاتا ہے تو لوگ خدا کے قریب کیسے ہو سکتے ہیں؟‏ اور جب لوگ خدا کے نام سے ناواقف رہتے ہیں تو وہ اس کا مطلب بھی نہیں جان سکتے۔‏ آئیے دیکھتے ہیں کہ خدا کے نام ”‏یہوواہ“‏ کا معنی کیا ہے۔‏

جب موسیٰ نبی نے یہوواہ خدا سے اس کے بارے میں سوال کِیا تو اُس نے اپنے نام کا مطلب یوں بتایا:‏ ”‏مَیں جو ہُوں سو مَیں ہُوں۔‏“‏ (‏خروج ۳:‏۱۴‏)‏ ایک اَور ترجمے میں ان الفاظ کو یوں بیان کِیا گیا ہے:‏ ”‏مَیں جیسا چاہتا ہوں ویسا ہی کرتا ہوں۔‏“‏ اس سے ظاہر ہوتا ہے کہ یہوواہ خدا اپنے ہر ارادے کو انجام تک پہنچاتا ہے۔‏

فرض کریں کہ آپ ہر وہ کام کرنے کے قابل ہوتے جسے آپ کرنا چاہتے ہیں۔‏ تو پھر آپ اپنے دوستوں کے لئے کیا کچھ نہ کرتے؟‏ اگر اُن میں سے ایک بیمار پڑتا تو آپ اُسے صحت‌یاب کر دیتے۔‏ اور اگر آپ کے کسی دوست کی مالی حالت بگڑ جاتی تو آپ اُس کی ضروریات کو پورا کرتے۔‏ لیکن حقیقت تو یہ ہے کہ ہم ہر وہ کام کرنے کے قابل نہیں ہوتے جسے ہم کرنا چاہتے ہیں۔‏ انسان کی طاقت محدود ہے۔‏ اس کے برعکس آپ پاک صحائف کو پڑھ کر جان جائیں گے کہ یہوواہ خدا اپنے ہر ایک ارادے کو پورا کرنے کی طاقت رکھتا ہے۔‏ اور وہ اُن سب کی مدد کو آتا ہے جو اُس سے محبت رکھتے ہیں۔‏ (‏۲-‏تواریخ ۱۶:‏۹‏)‏ جو لوگ خدا کا نام نہیں جانتے وہ یہوواہ کی شاندار خوبیوں سے بھی بےخبر رہتے ہیں۔‏

ان تمام باتوں سے صاف ظاہر ہوتا ہے کہ بائبل کے ترجموں میں یہوواہ خدا کا نام ضرور شامل کِیا جانا چاہئے۔‏ اس نام کا معنی جاننے اور اسے عبادت میں استعمال کرنے سے ہم اپنے خالق یہوواہ خدا کے اَور بھی قریب ہو جاتے ہیں۔‏

‏[‏صفحہ ۱۹۵ پر تصویر]‏

عبرانی حروف میں خدا کا نام اس طرح لکھا جاتا ہے