ASA karakory nandikan̈a Salamo 83:18 amy Baibolinao? Karaha ty izy amy Fandikan-tenin’ny Tontolo Vaovao: “Baka olo jiaby mahay fa anao, araiky manan̈a an̈aran̈a Jehovah, anao zaraiky fo Farany An̈abo amy tany jiaby.” Mira zen̈y koa raha koran̈iny Baiboly sasany. Maro olo mandika Baiboly nan̈adoso an̈aran̈a Jehovah io fa nisoloandro an̈aran̈a fan̈ajan̈a, karaha ataony “Tompo” na “Mandrakizay.” Izikoa amy Salamo io zahan̈a, ino tokony nisoratin̈y: An̈aran̈a fan̈ajan̈a izy sa ten̈a an̈aranany?

Izikoa volan̈a hebreo nandikan̈a izio tamy voanalohany tan̈y zahan̈a, ten̈a an̈aran̈a Zan̈ahary nisoratindro fa tsy an̈aran̈a fan̈ajan̈a izy. Karaha ty fanoratan̈a izy tamy voanalohany tan̈y: יהוה (YHWH). “Jehovah” matetiky andikan̈a izio amy volan̈a malagasy. Tsy amy Salamo io fo misy an̈aran̈a io. Mimpody im-7 000 izio amy ­Soratra Hebreo tamy voanalohany tan̈y!

Ten̈a ilain̈y ma an̈aran̈a Zan̈ahary io? Izikoa azonao onon̈o vavaka nampianariny Jesosy in̈y, karaha ty raha nivolan̈iny voanalohany: “Anao Babanay andan̈itry an̈y, irarian̈a an̈aranao ho masin̈y.” (Matio 6:9) Nisy fotoan̈a koa Jesosy nivavaka, nivolan̈a karaha ty: “Anao Babako andan̈itry an̈y, amia voninahitry an̈aranao.” Jehovah namaly karaha ty: “Zaho efa nan̈amia voninahitry izy ndreky mbala han̈amia voninahitry izy ndraiky koa.” (Jaona 12:28) Zen̈y mivolan̈a fa ten̈a ilain̈y an̈aranany io. Ke ino fo nahavy olo sasany nandika Baiboly nan̈adoso an̈aran̈a Jehovah io, ke nisoloandro an̈aran̈a fan̈ajan̈a?

Mety ho baka amy raha aroe ty nahavy iro nan̈ano zen̈y. Voanalohany, maro olo mieritreritry fa an̈aran̈a Zan̈ahary io tsy tokony ton̈onin̈y, fotony tsisy olo mahay fanon̈onan̈a izio. Volan̈a hebreo tsisy zanatsoratra, ke tsy ten̈a hay fanon̈onanolo YHWH io taloha tan̈y. Kanefa, zen̈y ma mivolan̈a fa tsy tokony  hampiasain̈y foeky an̈aran̈a Zan̈ahary io? Taloha tan̈y, olo samy amy fanon̈onany an̈aran̈a Jesosy. Misy man̈ano Yeshoà, sasany ndraiky Yehôshoà, fa tsy ten̈a azondro antoko fa io marin̈y ten̈a fanon̈onan̈a izy. Olo izioty koa samy amy fanon̈onany Jesosy io, arakaraka tany misy izy. Iro ndray tsy mahay volan̈a griky, iro manon̈ono an̈aran̈a Jesosy io fo. Karaha zen̈y koa an̈aranao, mety tsy ho mira fanon̈onanolo izy, arakaraka volan̈anany. Ke atsika ndray tsy mahay manon̈ono an̈aran̈a Zan̈ahary io karaha tamy voanalohany tan̈y, atsika tokony hampiasa izio fo.

Faharoe, finoan̈andro Jiosy taloha tan̈y koa nahavy olo nandika Baiboly nan̈adoso an̈aran̈a Jehovah tao. Maro tamindro nino fa tsy mila ton̈onin̈y an̈aran̈a Zan̈ahary io. Ino nahavy zen̈y? Fotony tsy haindro tsarabe dikany volan̈a Baiboly ty: “Aza manonton̈ono an̈aran̈a Zan̈aharinao Jehovah; fotony zay olo manonton̈ono an̈aranany tsy hambelany Jehovah karaha io fo.”—Eksodosy 20:7.

Lalàn̈a io tsy mandrova olo hampiasa an̈aran̈a Zan̈ahary, izikoa iro man̈aja izy. Olo tsy nivadiky tamy Jehovah ndreky nan̈araka Lalàn̈anany namiany Israelita nanoratra Soratra Hebreo (na “Testamenta Taloha”) io. Matetiky mimpody an̈aran̈a Zan̈ahary amy boky nisoratindro. Ohatra, amy salamo maro fihirandro panompony Zan̈ahary taloha tan̈y, ahitan̈a an̈aran̈a Jehovah io. Jehovah koa nan̈iraka olonany hikaiky an̈aranany, ke nan̈eky zen̈y olonany tsy mivadiky aby io. (Joela 2:32; Asan’ny Apostoly 2:21) Ke aminandra izioty, olo ten̈a Kristianin̈y man̈aja an̈aran̈a Zan̈ahary, karaha nataony Jesosy, ke tsy misalasala mampiasa an̈aranany io.—Jaona 17:26.

Ten̈a tsy mety raha nataonolo sasany nandika Baiboly, fotony nisoloandro an̈aran̈a Jehovah io. Iro tsy vitany tsy nan̈isy fotiny Zan̈ahary fo, fa natao raha nahavy olo hieritreritry fa Zan̈ahary zen̈y lavitry atsika. Kanefa Baiboly man̈iraka atsika ‘hinaman̈a’ aminany. (Salamo 25:14) Mba diniha hely baka ty: Ten̈a hatokisanao kamaradinao izikoa tsy hainao an̈aranany? Karaha zen̈y koa Zan̈ahary, atsika koa tsy mahay an̈aranany, atsika tsy ten̈a kamaradinany. Olo koa tsy mahay an̈aranany, tsy hahay dikany an̈aran̈a io, kanefa dikanizio ilaintsika amy fiain̈ana. Ino ma dikanizio?

Zan̈ahary nan̈azava izio tamy Mosesy. Izy koa fa nan̈ontany an̈aran̈a Zan̈ahary, karaha ty nivolan̈iny Zan̈ahary: ‘Haboakako tsarabe fa Zaho Araiky Mahavita Zay Raha Tiako Hatao in̈y.’ (Eksodosy 3:14) Karaha ty izio amy fandikanteniny Rotherham: “Ho vitako han̈ano zay raha tiako.” Dikanizen̈y, Jehovah mahavita miovaova zay raha ilain̈y baka fikasan̈anany tanteraka ndreky vitany koa man̈ovaova raha niasainy, amy zay raha ilany izy, baka fikasan̈anany tanteraka.

Izikoa anao manan̈a angovo han̈ano raha jiaby, ino raha hataonao? Izikoa misy kamaradinao marary mare, anao efa manjary dokotera edy, vitanao mitaha izy. Anao koa mahita kamaradinao sahiran̈a tsisy vola, anao efa man̈amia vola mahampy izy. Zay raha manahiran̈a izy, ho voavahanao fo. Raha misy fo, tsisy olo mahavita zen̈y, fotony atsika tsy ampy angovo han̈anovan̈a zen̈y. Anao koa fa mianatra Baiboly, ho hitanao fa Jehovah io mahavita zay raha iriny, ke vitany man̈atanteraka raha jiaby volan̈iny. Ravoravo koa izy man̈amia angovonany han̈ampian̈a atsika. (2 Tantara 16:9) Olo tsy mahay an̈aran̈a Jehovah, tsy mahay toetrinany zen̈y.

Dikanizen̈y, an̈aran̈a Jehovah io tokony ho hita amy Baiboly jiaby. Atsika koa mahay dikany an̈aran̈a Jehovah io, baka io mampiasa izio koa fa manompo izy, atsika ten̈a hanjary kamaradiny ankitin̈y. *