ANA lilemba lya Salimo 83:18 ŵaligopolele wuli mu Baibulo jawo? Mu Baibulo jaŵagopolele ŵa Mboni sya Yehofa lilembali ŵaligopolele kuti: “Kuti amanyilile kuti wawojope, lina lyawo ni Yehofa, Ŵalakwe ali Ŵamwinani Mnope pacilambo cosope capasi cino.” Mabaibulo gane gakusagopolelasoni mpela muŵagopolelele mwelemu. Nambope, ŵagopolela Mabaibulo ŵajinji akusatyosa lina lyakuti Yehofa, ni kuŵikapo mena gane ga ukumu mpela gakuti “Ambuje” kapena “Mlungu.” Ana palilembali, akuganisya kuti pakusosekwa lina lya ukumu kapena lina lyakuti Yehofa?

Lilembali likusala ya lina. Mu Cihebeli caŵakamulicisye masengo pakulemba Baibulo, pa lilembali pakusasimanikwa lina lyapajikali. Linali mu Cihebeli akusalilemba יהוה (YHWH). Mu Ciyawo, linali akusalilemba kuti “Yehofa.” Ana linali likusasimanikwa mu ndime jimo ja m’Baibulo? Iyayi. Linali likusasimanikwa ndaŵi ciŵandika 7,000 m’Malemba ga Cihebeli caŵacikamulicisye masengo pakulemba Baibulo pandandapo.

Ana lina lya Mlunguli lili lyakusosekwa catuli? Kwende tulole lipopelo lya cisyasyo lyaŵapelece Yesu Klistu. Lipopeloli likusatanda kuti: “Atati ŵetu ŵa kwinani, Lina lyawo licimbicikwe.” (Matayo 6:9) Pali papite kandaŵi panandi, Yesu ŵapopesile kwa Mlungu kuti: “Atati, acimbicisye lina lyawo.” Pakwanga kutyocela kwinani, Mlungu ŵatite: “Nalicimbicisye, soni tinjilicimbicisyasoni.” (Yohane 12:28, NW) M’yoyo, lina lya Mlungu lili lyakusosekwa mnope. Ni ligongo cici ŵagopolela Mabaibulo ŵane ŵatyosisye lina lyakuti Yehofa m’malo mumwaliji linali ni kulembamo mena ga ukumu?

Yikuwoneka kuti pana magongo gaŵili. Candanda, ŵandu ŵajinji ŵasalaga kuti linali lili lyangasosekwa kulikamulicisya masengo, ligongo kasale kakwe kasyesyene ngakakumanyika  cenene moŵa agano. Mu ciŵeceto ca Cihebeli cakala nganakamulicisyaga masengo yilembo ya a, e, i, o, u. M’yoyo, pangali jwalijose moŵa agano jwampaka asale mulyapikanicilaga linali YHWH kalakalako. Nambo ana yeleyi yitulepelekasyeje kamulicisya masengo lina lya Mlungu? Pa ndaŵi jaŵalembaga Baibulo, lina lyakuti Yesu komboleka kuti ŵandu ŵalisalaga kuti Yeshua kapena kuti Yehoshua. Pangali jwampaka amanyilile kasale kakwe kasyesyene. Nambo ŵandu pacilambo cosope capasi moŵa agano akusalisala linali mwakamulana ni ciŵeceto cawo. Akusalikamulicisya masengo atamose kuti ngakumanyilila mulyapikanicilaga linali kalako. Yeleyi yikwamba kulandana ni mwampaka ŵandu asalile lina lyawo papite ku cilambo cine. Ŵandu mpaka alisale mwakulekangana ni ciŵeceto ca wawojo. M’yoyo, ungamanyilila mulyapikanicilaga lina lya Mlungu kalakala, kukatulepelekasya kulikamulicisya masengo.

Ligongo lyaŵili lyaŵatyocesye lina lya Mlungu m’Baibulo likwayana ni misyungu ja Ayuda jaŵele ali mkujikamulicisya masengo kwa ndaŵi jelewu. Ŵajinji mwa jemanjaji, akusakulupilila kuti lina lya Mlungu lyangasosekwa kulisala. Cikulupici komboleka kuti catandile pa kakamulicisye masengo kakulemweceka ka lilamusi lya m’Baibulo lyalikusati: “Mkalikamulicisya masengo gangalumbana lina lya Ambuje Mlungu jwenu, pakuŵa Ambuje ngasalepela kumpa cilango mundu jwakulikamulicisya masengo gangalumbana lina lyakwelyo.”—Eksodo 20:7.

Lilamusi lyeleli likusalekasya kamulicisya masengo lina lya Mlungu mwakulemweceka. Nambo ana likusalekasya kulikamulicisya masengo linali mwaucimbicimbi? Iyayi. Ŵaŵalembile Baibulo m’Cihebeli (“Malangano ga Kala”) ŵaliji acalume ŵakulupicika ŵaŵakuyaga Cilamusi ciŵapelece Mlungu kwa Ayisalayeli. Nambope, jemanjaji mwakuwilisyawilisya ŵakamulicisyaga masengo lina lya Mlungu. Mwambone, nyimbo syaŵajimbaga ŵakutumicila ŵa Mlungu kala syakolaga linali. Yehofa Mlungu ŵasasilesoni kuti, ŵakumtindiŵalila jwalakwe akusosekwa kuŵilanga lina lyakwe. Ŵandu ŵakulupicika, ŵapikanile maloŵega. (Yoweli 2:32; Masengo 2:21) Ni ligongo lyakwe Aklistu moŵa agano ŵangakayicila kulikamulicisya masengo lina lya Mlungu mwaucimbicimbi, mpela muŵatendelaga Yesu.—Yohane 17:26.

Ŵagopolela Baibulo ŵakusalembaga mena ga ukumu mmalo mwa kulemba lina lisyesyene lya Mlungu, akusalemwesya  mnope. Jemanjaji akusalosyaga kuti Mlungu ali mundu jwamti ngaŵa mkuŵa najo paunasi. Nambope Baibulo jikusatulimbikasya kuti tuŵeje “paunasi wakulimba ni Yehofa.” (Salimo 25:14) Aganisye ya mjawo jwakusamnonyela mnope. Ana mpaka yikombolece kuŵa paunasi wamnope ni mjawo jwangakummanyilila lina lyakwe? M’yoyosoni, ana ŵandu mpaka aŵe catuli paunasi wakulimba ni Mlungu naga ŵanduwo ngakumanyilila kuti lina lyakwe ali Yehofa? Konjecesya pelepa, naga ŵandu ngakukamulicisya masengo lina lya Mlungu, ŵangamanyililasoni kuti lyana kugopolela kwambone. Ana lina lya Mlungu likusagopolela cici?

Mlungu ŵasasile jika kugopolela kwa lina lyakwe kwa jwakutumicila jwakwe Musa. Musa paŵawusisye yakwamba lina lya Mlungu, Yehofa ŵamjanjile kuti: “Cinjiŵa jwacinjisaka kuŵa.” (Eksodo 3:14, NW) M’Baibulo jaŵagopolele Rotherham, pa lilembali jikusati: “Cinjiŵa cilicose cacisangalesye.” M’yoyo Yehofa mpaka aŵe jwalijose jwakusaka kuŵa pakusaka kwanilisya cakulinga cakwe.

Tuwanicisye kuti wawojo akwete macili gakuŵa jwalijose jwasacile. Ana mpaka ŵatendele cici acimjawo? Naga mjawo jwine julwasile mnope, wawojo mpaka aŵe dokotala ni kumposya mjawojo. Naga jwine akulaga ni usawuci, wawojo mpaka aŵe jwakusicila ni kumkamucisya mjawojo. Nambo yisyesyene yakwe yili yakuti wawojo ngaŵa mkuŵa jwalijose jwasacile. Wosopewe ngaŵa mkupakombola. Pakulijiganya Baibulo, cacisimonga kuyiwona kuti Yehofa akusaŵa jwalijose pakusaka kwanilisya yilanga yakwe. Soni jwalakwe yikusamnonyela kamulicisya masengo macili gakwe pakwakamucisya ŵandu ŵakusamnonyela. (2 Mbiri 16:9) Ŵandu ŵangamanyilila lina lya Mlungu, ŵangamanyililasoni kuti Yehofa akwete ndamo syambone mpela syelesi.

M’yoyo lina lyakuti Yehofa likusosekwa lisimanikweje m’Baibulo. Kumanyilila kugopolela kwa lina lyakwe, soni kulikamulicisya masengo mwagopoka pakulambila mpaka yitukamucisye mnope kuti twaŵandicile Atati ŵetu ŵakwinani, Yehofa. *