KIRA Daniɛl tun ye ɲɛnamaya kɛ a ka ca nin san 500 ye sani Yesu ka bange. Nka, Jehova ye kunnafoni di Daniɛl ma k’a dɔn waati min na Yesu tun bɛna mun walima ka sigi ka kɛ Masiya wala Krisita ye. Daniɛl y’a fɔ ko: “I k’a dɔn k’a jɛya ko kabini Jerusalɛm dugu sigili ni a jɔli ko fɔra fo ka taa se Kuntigi Munnen ka waati ma, o na kɛ dɔgɔkun wolonwula ni dɔgɔkun biwɔɔrɔ ni fila ye.”—Daniɛl 9:25.

 Walisa k’a dɔn Masiya bɛna na tuma kelen min na, jate bɛ daminɛ waati min na ka na Masiya nali ma, fo an ka o dɔn fɔlɔ. Ka kɛɲɛ ni kirayakuma ye, o tun bɛna daminɛ tuma min na “Jerusalɛm dugu sigili ni a jɔli ko fɔra”. O ‘kofɔra’ tuma jumɛn na? Nehemi ka fɔ la, n’o tun ye Bibulu sɛbɛnbaga dɔ ye, Jerusalɛm kogobaw jɔli kofɔra “masakɛ Artakserkses ka masaya san mugannan la.” (Nehemi 2:1, 5-8) Tarikusɛbɛnnaw y’a tiɲɛtigiya ko san 474 ka kɔn Krisita tile ɲɛ, o kɛra Artakserkses ka masaya san fɔlɔ dafalen ye. O la sa, a ka masaya san mugannan kɛra san 455 ye ka kɔn Krisita tile ɲɛ. An  bɛ Daniɛl ka masaya kirayakuma daminɛ dɔn sisan, n’o ye san 455 ye ka kɔn Krisita tile ɲɛ.

Waati min bɛ taa se “Kuntigi Munnen” nali ma, Daniɛl bɛ o waati janya fɔ. Kirayakuma bɛ “Dɔgɔkun wolonwula ni dɔgɔkun biwɔɔrɔ ni fila” fɔ fana, n’o bɛɛ bɛ bɛn dɔgɔkun 69 ma. O bɛ bɛn waati joli ma tigitigi? Bibulu bayɛlɛmalen caman b’a jira ko tile wolonwula dɔgɔkun tɛ. Nka san dɔgɔkun de dɔn. O kɔrɔ ye ko dɔgɔkun o dɔgɔkun bɛ bɛn san wolonwula ma. Fɔlɔ Yahutuw tun delilen bɛ san dɔgɔkun na. Misali la, san wolonwula o san wolonwula, u tun bɛ Lafiɲɛsan seli kɛ. (Ekisode 23:10, 11) O la sa, dɔgɔkun 69 kirayakuma kɔnɔ, dɔgɔkun kelen o kelen ye san 7 ye, n’o bɛɛ bɛ bɛn san 483 ma (69 sigiyɔrɔma 7 bɛ bɛn 483 ma).

Sisan, a bɛɛ jate. Kabini san 455 la ka kɔn Krisita tile ɲɛ, n’an bɛ san 483 jate, o bɛ taa an bila san 29 na Krisita tile la. O san yɛrɛ de la Yesu batisera ani a kɛra Masiya ye. * (Luka 3:1, 2, 21, 22) Yala Bibulu ka kirayakuma tiimɛni tɛ koba ye wa?