NKULU mejô Daniel a nga nyiñe mimbu 500 ôsusua na Yésus a bialé. Ve jame da, Yéhôva a nga kate Daniel mefoé méziñe me nga bo na bôte be yemelane éyoñe Yésus a nga toban ane nyô a ne ñwô’ane mbon, nge nyô a ne ntoban, nge Messie, Krist. Daniel a nga jô na: “Ajô te yemek a fase na, ataté mveane ya atiñe na, be bulane kôme Jérusalem a beta lôñe nye, akekui be  nyô a ne ñwo’an mbon, évet éte, d’aye bo besondô zañbwa.”​—Daniel 9:25.

Asu na bi yemelan éyoñe Messie a nga suan, jam ôsu bia yiane taté yem é ne éyoñ évé be nga taté na ba lañe mimbu mi nga zu man éyoñ Messie a nga yené. Éyoñe bia fombô nkulan ajô, a ne “ataté mveane ya atiñe na, be bulane kôme Jérusalem.” Nde éyoñ évé ‘atiñ é nga vebane na be beta lôñe Jérusalem?’ Avale ntili Kalate Zambe, Néhémie a nga jô, ngul é nga vebane na Jérusalem a beta lôñeban “mbu mewôm mebaa, Artaxerxès njô bôt a nga jôô.” (Nehémie 2:1, 5-8) Bekañete mam be a bo’olô na mbu 474 Ô.É.J. ô ne mbu ôsu ô nga kpwaan Artaxerxès éto  njô bôt. Nde, mbu 20 ya éjôé jé ô mbe mbu 455 Ô.É.J. Nne ñhe bia taté na bia lañe mbu ya nkulan ajô Daniel ô fombô’ô Messie valé, mbu 455 Ô.É.J.

Daniel a nga liti nté ôvé ñyangane “Messie, Njô” wo ye tabe. Nkulane ajô wo kobô ajô “besondô zangbwal, a besondô mewôm mesaman a bebaé”​—éyoñe te a ve besondô 69. Besondô bete ba yiane tabe nté ôvé? Abui minkôñelane mi Kalate Zambe mi a yemelane na a nji bo besondô be ne melu zangbwal, a ne besondô mimbu. Nalé a liti na sondô ase ya été a ne mimbu zangbwal. Fatane nlañane besondô mimbu nyi é ne nnôme jame Bejuif ya nnôm éyoñe be nga zu ba bo. Bi tame nyoñ éve’an, be nga to be jeme mbu Sabbat mvuse mimbu zangbwale mise. (Nkôlan 23:10, 11) Ajô te, éyoñe bia nya’até besondô 69 ya nkulane ajô, sondô ase mimbu 7, tañ éte ja ve mimbu 483.

Nde bi tame ñhe zu bo tañ. Nge wo lañ ataté mbu 455 Ô.É.J., mimbu 483 mi a jaé mbu 29 É.J. Mbu ôte ôbien ñwô Yésus a nga duban, ane a nga bo Messie! * (Luc 3:1, 2, 21, 22) Sa jame ya semé le na nkulan ajô ya Kalate Zambe te ô nga kôme tôéban, éfia éziñ teke ku mfomolo?