PROFETA Daniel 500 año gus burgwisad sorba, Jesús gwalulesad. Jehová, Danielga sogsad sana Jesús Mesíasga guoe geb igi wisgulegoe. Danielga soglesad: “We ibmar be magar iddoger gebed, be nue wisguer gebed: Jerusalén neggwebur gannar soblegega igar uglesad aggale, Dule Dummad Nugsalesad noniggoedse, iddoged gugle (7) naguoed. Aa sorbali, iddoged dulabaa gaggabo (62) nagubaloed” (Daniel 9:25).

 Anmar durdaggoena igi nabir wisgulesale sana Mesías nononiggoye soglesa. Gebbe bin anmar wisgugweler gebed, sana ebisledoe Mesías dagedse owarmaggega. Danielga soglesad ebisledoye “Jerusalén neggwebur gannar soblegega igar uglesar[ye]”. ¿Ingua weyob “igar uglesa”? Nehemías soged Jerusalén muralla gannar sobedgi sunmaglearye “rey Artajerjes birga dula gwengus (20), neg dagmaidgi” (Nehemías 2:1, 5-8). Historiadormar sogmarmogad Artajerjes reyga megwidye año 475 era común iduale (e.c.i). Nueggwa anmar ebisdele anmar daggoed año 455 e.c.i. Artajerjes birga  durbo gusa reyga mainad. Degsoggu Danielga ibmar soglesadi año 455 e.c.i. ebisleded.

Daniel sogsad birga bigwa nanaoe “Mesías” dagedse. Danielga soglesad “iddoged gugle (7) naguo[ye]. Aa sorbali, iddoged dulabaa gaggabo (62) nagubalo[ye]”, degsoggu sogledo bela 69 semana nanaoye. ¿Degidde 69 semanadega bule sugusunna? Bibliamargi soglenaid wegine iddogedgi sunmaglenaidi iddogedgi iba gugle niggad obarnasurye, wedi iddoged irgwengi birga gugle niggad obarnaye. Judíomardi wegi ebisleged mag iddomalanad, ar emardi birga gugle nanasale sogdamalad birga gwen gusye, we birga bidamalad año sabático (Éxodo 23:10, 11). Degsoggu, 69 semanaye soglenaidi 483 año obarnaid.

Anmar año 455 e.c.i. ebisdele año 29 era común (e.c.) sega anmarga noed 483 año. Año 29 gine Jesús bautizar gusad geb Mesíasga gunoniggid (Lucas 3:1, 2, 21, 22). * Igi be binsae, ¿Bibliagi ibmar soglesad gusdibe?