Se Ẹwetde Ẹdian
Nte Ntịn̄nnịm Ikọ Daniel Ebemde Iso Etịn̄ Aban̄a Edidi Messiah
PRỌFET Daniel ama odu uwem ke se ikande isua 500 mbemiso Jesus akamanade. Nte ededi, Jehovah ama owụt Daniel n̄kpọntịbe oro akanamde ẹkeme ndidiọn̄ọ ini emi ẹkeyetde Jesus aran, m̀mê ini oro ẹkemekde enye nte Messiah m̀mê Christ. Ẹkesian Daniel ẹte: “Fiọk, ndien, nyụn̄ tịm nịm ibuot, ete, ke ọtọn̄ọde ke ini emi uyo ọwọrọde, ẹte ẹtọn̄ọ ntak ẹdiọn̄ ẹnyụn̄ ẹbọp Jerusalem, tutu esịm ke ini Messiah Ọbọn̄, eyedi urua itiaba ye urua ata ye iba.”—Daniel 9:25.
Man idiọn̄ọ ini emi Messiah ekedide, oyom nnyịn ibem iso idiọn̄ọ ntọn̄ọ ini emi akadade ekesịm ini edidi Messiah oro. Nte ntịn̄nnịm ikọ oro ọdọhọde, enye ‘ọtọn̄ọ ke ini emi uyo ọwọrọde, ete ẹtọn̄ọ ntak ẹdiọn̄ ẹnyụn̄ ẹbọp Jerusalem.’ Ini ewe ke ‘uyo ọkọwọrọ’? Nte Nehemiah emi ekewetde Bible ọdọhọde, uyo ọkọwọrọ ete ẹtọn̄ọ ntak ẹbọp ibibene Jerusalem ke “ọyọhọ isua Artaxerxes edidem edịp.” (Nehemiah 2:1, 5-8) Mme ewetmbụk eset ẹsọn̄ọ ke Artaxerxes ọkọtọn̄ọ ndikara nte edidem ke isua 475 M.E.N. Ke ntre, ọyọhọ isua 20 ke ukara esie ekedi isua 455 M.E.N. Idahaemi nnyịn imọfiọk ntọn̄ọ ini ntịn̄nnịm ikọ Daniel aban̄ade Messiah, oro edi, isua 455 M.E.N.
Daniel owụt nte ini emi adade esịm edidi “Messiah Ọbọn̄” ọniọn̄de eketre. Ntịn̄nnịm ikọ oro asiak “urua itiaba ye urua ata ye iba,” emi edide urua 69 ke ofụri ofụri. Ini emi ọniọn̄ adan̄a didie? Ndusụk edikabade Bible ẹwụt ke emi idịghe mme urua emi ẹsịnede usen itiaba, edi ke ẹdi mme urua emi usen kiet adade ọnọ isua kiet. Emi ọwọrọ ke urua kiet ada ọnọ isua itiaba. Mme Jew eset ẹma ẹdiọn̄ọ ndibat mme urua emi usen kiet adade ọnọ isua kiet, m̀mê mme ini emi ikpehe kiet kiet ọniọn̄de ke isua itiaba. Ke uwụtn̄kpọ, mmọ ẹma ẹsinyene isua Sabbath ke kpukpru ọyọhọ isua itiaba. (Exodus 23:10, 11) Ke ntre, urua 69 ke ntịn̄nnịm ikọ oro ẹsịne ikpehe ini 69 emi kiet kiet ọniọn̄de ke isua 7, m̀mê emi ofụri ibat edide isua 483.
Idahaemi se oyomde nnyịn inam edi ndibat ini oro. Edieke nnyịn itọn̄ọde ke isua 455 M.E.N. ibat, inyene isua 483 ke isịmde isua 29 E.N. Kpa isua oro ke Jesus akana baptism onyụn̄ akabade edi Messiah! * (Luke 3:1, 2, 21, 22) Nte oro idịghe utịbe utịbe edisu ntịn̄nnịm ikọ Bible?
^ ikp. 2 Ọtọn̄ọde ke isua 455 M.E.N. sịm isua 1 M.E.N. edi isua 454. Ọtọn̄ọde ke isua 1 M.E.N. sịm isua 1 E.N. edi isua kiet (owo ikenyeneke 0 isua M.E.N.). Ndien ọtọn̄ọde ke isua 1 E.N. sịm isua 29 E.N. edi isua 28. Ke idiande mbita emi, nnyịn inyene ofụri ibat emi edide isua 483. ‘Ẹkesịbe’ Jesus ẹfep ke isua 33 E.N., ke ọyọhọ urua 70 emi usen kiet kiet adade ọnọ isua kiet. (Daniel 9:24, 26) Se Nọ Ntịn̄enyịn ke Prọfesi Daniel! ibuot 11, ye Insight on the Scriptures, Eboho 2, page 899-901. Mme Ntiense Jehovah ẹsio n̄wed mbiba emi.
