JESÚS onasérõ guare ohasáma quinientos áño pe proféta Daniel oikohague. Upéicharõ jepe, Jehová heʼivaʼekue Daniélpe mbaʼéichapa ikatúta ojekuaa arakaʼetépa oikóta Jesúsgui pe Mesías térã Cristo. Daniélpe ojeʼevaʼekue: ‘Reikuaa ha rehechakuaavaʼerã ko mbaʼe, osẽ guive pe ñeʼẽ oñemyatyrõ ha oñemopuʼã jey hag̃ua Jerusalén og̃uahẽ meve pe Mesías pe  Caudillo, oĩta siete semána, avei sesenta y dos semána’ (Daniel 9:25).

Jahechami mbaʼéichapa ikatu jaikuaa arakaʼetépa og̃uahẽvaʼerã pe Mesías. Upearã, tekotevẽ jaikuaa raẽ arakaʼe guivépa oñepyrũ ojepapa pe tiémpo ohasátava haʼe og̃uahẽ meve. Pe profesía heʼi ‘osẽ guive pe ñeʼẽ oñemyatyrõ ha oñemopuʼã jey hag̃ua Jerusalén’. Arakaʼépa ‘osẽ pe ñeʼẽ’? Peteĩ ohaivaʼekue la Biblia, hérava Nehemías, heʼi pe ñeʼẽ térã pe órden oñemopuʼã jey hag̃ua Jerusalén murálla osẽhague pe rréi Artajerjes oisãmbyhývo veinte añohápe (Nehemías 2:1, 5-8). Heta istoriadór heʼi pe primer áño pe rréi Artajerjes ogovernahague haʼeha pe  áño 474, ñande ára mboyve. Upéicharõ, pe áño veinte ogovernaha haʼevaʼekue pe áño 455. Upéicha jahecha pe profesía Daniel ohaivaʼekue oñepyrũhague oñekumpli pe áño 455-pe, ñande ára mboyve.

Daniel heʼivaʼekue mboy tiémpopa ohasavaʼerã ko mbaʼe oiko rire ou peve ‘Mesías pe Caudillo’. Pe profesía heʼivaʼekue ‘siete semána, avei sesenta y dos semána’, upéicha jaguereko 69 semána. Mbaʼéichapa jaipapavaʼerã pe tiémpo? Heʼiháicha heta Bíbliape, koʼãva ndahaʼéi semána oguerekóva siete día, síno semána áño rehegua. Upéva heʼise káda semána oguerekoha siete áño. Umi hudío ymaguare oikuaa porã vaʼekue koʼãichagua semána áño rehegua, oguerekóva siete áño. Upéva jahecha, oguerekohaguére hikuái peteĩ áño sabático káda siete áño (Éxodo 23:10, 11). Upéicharõ, umi 69 semána heʼíva pe profesía haʼe 69 semána oguerekóva 7 áño káda uno, ha upéicha ohupyty 483 áño.

Koʼág̃a ikatu jahecha mboýpepa osẽ. Jaipapáramo 483 áño ñañepyrũvo pe áño 455 ñande ára mboyve guive, ñandegueraha pe áño 29 ñande árape. Ha upe áñope Jesús ojevautisavaʼekue ha oiko chugui pe Mesías (Lucas 3:1, 2, 21, 22). * Ajépa ko profesía oĩva la Bíbliape oñekumpli upeichaite?