NUDỌNAMẸ DOGỌ
Lehe Dọdai Daniẹli Tọn Dọ Ojlẹ Wiwá Mẹssia Tọn Do
HUGAN owhe 500 ko juwayi to gbẹninọ yẹwhegán Daniẹli tọn godo whẹpo Jesu do yin jiji. Etomọṣo, Jehovah do nudọnamẹ lẹ hia Daniẹli he na hẹn ẹn yọnbasi na ẹn nado dlẹnalọdo ojlẹ lọ whenuena Jesu na yin yiyiamisisadode, kavi yin dide gbọn gbigbọ dali, taidi Mẹssia, kavi Klisti lọ. Daniẹli yin didọna dọmọ: “Yọnẹn bosọ tunayinugo, dọ sọn gbonujẹ yì gbedide lọ tọn nado gọ̀jó podọ nado do Jelusalẹm hlan mẹyiamisisadode de, ahọvi lọ, na yin osẹ ṣinawe: po osẹ kandekonukunawe po.”—Daniẹli 9:25.
Nado yọ́n ojlẹ wiwá Mẹssia tọn, tintan whẹ́, mí dona yọ́n whenue ojlẹ he planmẹ wá Mẹssia dè lọ bẹjẹeji. Sọgbe hẹ dọdai lọ, e yin “sọn gbonujẹ yì gbedide lọ tọn nado gọ̀jó podọ nado do Jelusalẹm.” Whetẹnu wẹ “gbonujẹ yì gbedide lọ tọn” jọ? Sọgbe hẹ Biblu kantọ Nẹhemia, gbedide lọ nado do adó lẹdo Jelusalẹm yin didetọ́n “to owhe okotọ Altakẹlikesi ahọlu lọ tọn mẹ.” (Nẹhemia 2:1, 5-8) Whenuho-kantọ lẹ dohia dọ owhe 474 J.W.M. wẹ Altakẹlikesi basi owhe dopo to ogán ji. Enẹwutu, owhe 20tọ gandudu etọn tọn yin owhe 455 J.W.M. Todin mí ko mọ whenue hẹndi dọdai Daniẹli tọn gando Mẹssia go bẹjẹeji, enẹ wẹ, 455 J.W.M.
Daniẹli do lehe ojlẹ he na planmẹ jẹ wiwá “mẹyiamisisadode . . . , ahọvi lọ” tọn na dite sọ hia. Dọdai lọ donù “osẹ ṣinawe: po osẹ kandekonukunawe po” go—ehe lẹndopọ etọn yin osẹ 69. Nawẹ ojlẹ ehe dite sọ? Lẹdogbedevomẹ Biblu tọn voovo lẹ dọ dọ ehelẹ ma yin osẹ azán ṣinawe tọn lẹ gba, ṣigba osẹ owhe lẹ tọn. Enẹ wẹ yindọ, osẹ dopodopo nọtena owhe ṣinawe. Linlẹn lọ nado yí osẹ lẹ zan nado nọtena owhe lẹ, kavi osẹ dopo nado nọtena owhe ṣinawe, gbayipe to Ju hohowhenu tọn lẹ ṣẹnṣẹn. Di dohia, yé nọ yìn Gbọjẹzan owhe tọn to owhe ṣinawetọ lẹpo mẹ kẹdẹdile yé nọ yìn Gbọjẹzan azán lẹ tọn to azán ṣinawetọ lẹpo mẹ do. (Eksọdusi 23:10, 11) Enẹwutu, osẹ 69 he dọdai lọ dọ nọtena owhe 69 donu 7, kavi owhe 483 to lẹndopọ mẹ.
Nuhe mí dona wà todin lẹpo wẹ nado basi lẹndopọ etọn. Eyin mí lẹn ẹn sọn 455 J.W.M., owhe 483 plan mí jẹ owhe 29 W.M. tọn mẹ. Owhe enẹ mẹ pẹpẹ wẹ Jesu yin bibaptizi bosọ lẹzun Mẹssia lọ! * (Luku 3:1, 2, 21, 22) Be ehe ma yin hẹndi dọdai Biblu tọn he jẹna ayidego de ya?
^ huk. 2 Bẹsọn 455 J.W.M. wá owhe 1 J.W.M. yin owhe 454. Sọn owhe 1 J.W.M. wá owhe 1 W.M. yin owhe dopo (owhe tata [zéro] de ma nọ tin). Podọ sọn owhe 1 W.M. wá 29 W.M. yin owhe 28. Eyin mí lẹn sọha atọ̀n ehelẹ dopọ, mí na mọ owhe 483. Jesu yin ‘sinsán sẹ̀’ to okú mẹ to 33 W.M., to osẹ owhe tọn 70tọ lọ gblamẹ. (Daniẹli 9:24, 26) Pọ́n Payi Dọdai Daniẹli Tọn Go! weta 11, po Étude perspicace des Écritures po, Bladopọ 2, weda 995-997. Kunnudetọ Jehovah tọn lẹ wẹ zín owe awe ehe lẹpo jẹgbonu.
