ANG propeta nga si Daniel nagkabuhi sing sobra 500 ka tuig antes pa natawo si Jesus. Pero may ginsugid sa iya si Jehova nga impormasyon para mabal-an kon san-o haplasan ukon itangdo si Jesus bilang Mesias, ukon Cristo. Si Daniel ginsilingan: “Dapat mo mahibaluan kag mahangpan nga halin sa paggua sang sugo nga ipasag-uli kag patindugon liwat ang Jerusalem tubtob sa pag-abot sang Mesias nga Lider, may 7 ka semana kag 62 ka semana.”—Daniel 9:25.

 Para mabal-an ang tion sang pag-abot sang Mesias, dapat anay naton mabal-an kon san-o nagsugod nga natuman ang tagna ni Daniel. Suno sa tagna, nagsugod ini “halin sa paggua sang sugo nga ipasag-uli kag patindugon liwat ang Jerusalem.” San-o ‘ginpagua ang sugo’? Suno sa manunulat sang Biblia nga si Nehemias, ang sugo nga patindugon liwat ang mga pader sang Jerusalem ginhatag “sang ika-20 nga tuig sang paggahom ni Hari Artajerjes.” (Nehemias 2:1, 5-8) Ginpamatud-an sang mga manunulat sang kasaysayan nga sang 474 B.C.E., isa ka tuig na nga nagagahom si Artajerjes. Kon amo, ang ika-20 nga tuig sang iya paggahom amo ang 455 B.C.E. Gani nabal-an na naton nga ang tagna ni Daniel parte sa pag-abot sang Mesias nagsugod nga natuman sang 455 B.C.E.

Ginapakita ni Daniel kon daw ano kalawig ang hut-ong sang tion nga matapos sa pag-abot sang “Mesias nga Lider.” Ginasugid sang tagna ang “7 ka semana kag 62 ka semana”—69 ka semana tanan. Daw ano kalawig ini nga tion? Ang pila ka badbad sang Biblia nagsiling nga indi ini semana nga may pito ka adlaw, kundi semana sang mga tuig. Buot silingon, ang kada semana pito ka tuig. Ang mga Judiyo sang una kabalo gid kon ano ang semana sang mga tuig ukon mga tion nga may tagpito ka tuig. Halimbawa, ginaselebrar nila ang tuig nga Inugpahuway kada ikapito nga tuig. (Exodo 23:10, 11) Gani, ang gintagna nga 69 ka semana katumbas sang 69 ka tion, nga ang kada tion may tag-7 ka tuig. Kon totalon, 483 ka tuig tanan.

Gani sumahon naton. Kon mag-isip kita halin sa 455 B.C.E., ang hut-ong sang tion nga 483 ka tuig matapos sa 29 C.E. Sina gid nga tuig ginbawtismuhan si Jesus kag nangin Mesias! * (Lucas 3:1, 2, 21, 22) Indi bala nga makatilingala gid ini nga katumanan sang tagna sa Biblia?