OMUPROFETE Daniel wa ri ko ozombura zokombanda 500 komurungu wongwatero yaJesus. Nungwari Jehova wa yandja ondjivisiro ku Daniel ndjatjai mu vatera okutjiwa kutja Jesus ma twirisiwa poo ma toororwa ruṋe otja Messias poo Kristus. Daniel wa raerwa kutja: “Tjiwa otjiṋa hi nu u tji zuve nawa: Okuza koruveze ndwi rwomarakiziro wokutungurura Jerusalem tji rwa yandjewa  ngandu omunane omutoororwa waNdjambi tje ya, mape kapita ozombura hambombari povikando hambombari. Jerusalem matji tungururwa; nomivanda noviyeure ovinamasa wina, nu matji kurama oure wozombura omirongo hamboumwe nambari povikando hambombari, nungwari orwo maru rire oruveze rwomaumba.”—Daniel 9:25.

Kokutja tu tjiwe omeero waMessias, eṱe rutenga matu sokukonḓonona kutja oruveze ndu maru tu eta komeero we rwa uta ruṋe. Otja komahunganekero, orwo rwa uta ‘okuza koruveze ndwi rwomarakiziro wokutungurura Jerusalem.’ ‘Omarakiziro’ nga ya tjitwa  ruṋe? Otja komutjange wOmbeibela Nehemia, omarakiziro wokutungurura orumbo rwaJerusalem ya tjitwa ‘mombura oitjamirongo vivari youhona wombara Artakerkes.’ (Nehemia 2:1, 5-8) Ovatjange vomakuruhungi ve raisa kutja Artakerkes wa uta okuhonapara mombura 475 K.O.Z. Okutja ombura oitjamirongo vivari youhonapare we, ya ri ombura ndji 455 K.O.Z. Ihi matji hee kutja omahunganekero waDaniel nge notjiṋa na Messias ya uta mombura 455 K.O.Z.

Daniel wa raisa kutja oruveze ndu maru tu twara komeero ‘womunane omutoororwa’ maru rire orure pu pe ṱeki pi. Omahunganekero ngo maye tamuna “ozombura hambombari povikando hambombari,” na wina “ozombura omirongo hamboumwe nambari povikando hambombari.” Indwi oruveze ndu ṱeki pi? Okutja ozombura 49 (7x7), atu weza ko ozombura 434 (62x7), nozo maze tu pe ozombura 483.

Nambano ngatu vare. Indu tji twa vara okuza kombura 455 K.O.Z., ozombura 483 maze tu eta kombura 29 O.Z. Indjo ondja ri ombura Jesus ndja papitisiwa na rire Messias! * (Lukas 3:1, 2, 21, 22) Tjiri omaprofetero wOmbeibela ngo ya yenenisiwa momuano omuhimise!