KIBANDEKESU
“Makuinhi A Sambuadi Dia Semana”
O POLOFETA Daniiele ua kexile mu ixi, 500 ia mivu ande dia ku vuala Jezú. Mu kiki, Jihova ua tangela Daniiele, o ijimbuete ioso ieji londekesa o kithangana kieji unda Jezú kála Mexiia, mba Kristu. Ua tangela Daniiele: “Eie tuma-phe ku k’ijiia: tunde bhu tubhukila o ngonge phala kubhetula dingi Jeluzaleme ni ku mu tunga, katé bhua kéjila Mexiia, o M’ona Ngana, bhuala sambuadi dia semana, ni makuinhi asamanu ni kiiadi kia jisemana.”—Daniiele 9:25.
Phala ku sanga o kithangana kieji kuíza Mexiia, kia dianga tua tokala kuijiia se thembu kuxi ieji mateka o kuíza kua Mexiia, ni disukilu diê. Kála kia tange o kizuelu kia Daniiele, kiki kieji mateka ‘tundé kia bhana o kitumu phala ku tunga dingi Jeluzaleme.’ O kitumu kiki kia tundu kithangana kuxi? Kála kia tange o musoneki ua Bibidia, Nehemiia, o kitumu kia ku tunga Jeluzaleme, kia tundu ‘ku muvu ua makuinhi’a iadi, ua utuminu ua sobha Artaxexe.’ (Nehemiia 2:1, 5-8) Akua misoso, ambe kuila o muvu ua 475 A.K.K., o muvu ua dianga ua utuminu ua Artaxexe. Kienhiki-phe, muéne ua tenesa 20 a muvu ku utuminu mu 455 A.K.K. Kienhiki, tuejiia kiá se thembu kuxi kia mateka ku di kumbidila o kizuelu kia tange Daniiele kia lungu ni Mexiia, kia mateka ku muvu ua 455 A.K.K.
Daniiele uedikisa o thembu ieji bhita phala o kuíza kua ‘Mexiia o Mon’a Ngana.’ O kizuelu kiambe “sambuadi dia semana ni makuinhi asamanu ni kiiadi kia jisemana”—ki tenesa 69 a jisemana. Thembu ji kuxi, ja ithangana íii? Mu ji Bibidia ja vulu, amba kuila ki jisemana ja izuua, maji jisemana ja mivu. Mukonda kala semana, ilondekesa sambuadi dia mivu. O ndunge íii, ia lungu ni jisemana ja mivu, a ijidile ku Jijudé m’okulu. Mu kifika, ene akexile mu bhanga fesa ua muvu ua Sábhalu, mu sambuadi joso ja mivu. (Makatukilu 23:10, 11) Kienhiki, tuala ni 69 a jisemana, kala semana i soka 7 a mivu, se tu bunda o mivu joso jiji, tua-nda kala ni 483 a mivu.
Kienhiki, etu’oso tua tokala ku bhanga o ji konda. Se tu kondala 455 A.K.K, katé 483 a mivu, tua-nda suka katé ku muvu ua 29 K.K. Iú uene o muvu ua batizala Jezú, iu ua kituka Mexiia! * (Luka 3:1, 2, 21, 22) O ki kumbidilu kiki, ki kilondekesa muene kuma ki kumbidilu kia Bibidia?
^ kax. 2 Tundé ku muvu ua 455 A.K.K. katé ku muvu 1 A.K.K. ki tenesa 454 a mivu. Tundé ku muvu 1 A.K.K. katé ku muvu 1 K.K. ki tenesa muvu umoxi ngó. Tundé ku muvu 1 K.K. katé ku muvu ua 29 K.K. ki tenesa 28 a mivu. Se tu bandekesa o mixinda íii (454+1+28) Tua-nda suka mu 483 a mivu. Ku muvu ua 33 K.K., Jezú ‘a mu jibha mu 70 dia jisemana ja mivu.’ (Daniiele 9:24, 26) Tanga o divulu, Preste Atenção a Profecia de Daniel! mu kibatulu 11, ni divulu, Estudo Perspicaz das Escrituras, Volume 3 mu jimbandu ja 582-5. A di bhange ku Jimbangi ja Jihova.
