ДАНИЙЕЛЕ пʹехәмбәр, ԝәкә 500 сал пешийа буйина Иса Мәсиһ дьжит. Йаһоԝа әʹламәтийа ӧса да Данийел, бь сайа чь жи әԝи дькарьбу те дәрхьста әԝ ԝәʹдә, кʹәнге кӧ Иса ԝе бьһата рʹункьрьне йан кʹьфшкьрьне ча Иса Мәсиһ. Данийелрʹа һатьбу готьне: «Бьзаньбә у фәʹм бькә, кӧ бона ава кьрьна Оршәлиме  у бона анина рәԝша [ньсьла] ԝе йе бәре жь дәркʹәтьна әʹмьр, һʹәта сәрԝере кӧ һатийә мәсиһ кьрьн, һʹәфт һʹәфтә у шест у дӧ һʹәфтә ԝе һәбьн» (Данийел 9:25).

Сәва кӧ те дәрхьн ԝәʹде һатьна Иса Мәсиһ, пешийе әм гәрәке пебьһәʹсьн кӧ кʹәнге дәстпебу әԝ ԝәʹдә, дәрһәԛа кʹижани жи Данийел пʹехәмбәрти кьр. Дь пʹехәмбәртийеда һатьбу готьне, ԝәки әв ԝәʹдә ԝе дәстпебә паши ԝе йәке, ча фәрмана «авакьрьна Оршәлиме» бе дайине. Ле гәло әв фәрман кʹәнге һатьбу дайине? Дь кʹьтеба Нәһәмийада ньвисийә, ԝәки әв фәрман һатә дәрхьстьн ԝәʹде пʹадшатийа Артаһшашт, гава ида бист сал бу кӧ әԝи пʹадшати дькьр (Нәһәмийа 2:1, 5-8). Бь гьлийeд тʹәрихзана, Артаһшашт Пʹадша дь сала 474-да Б.Д.М.  дәстпекьр пʹадшатийе бькә. Демәк 20 салийа пʹадшатийа Артаһшашт, дькʹәвә сала 455. Жь вьр те кʹьфше, кӧ әԝ ԝәʹдә дәрһәԛа чь жи Данийел дьгот, дь сала 455-да дәстпебу.

Данийел әʹйан кьр, ԝәки һʹәта һатьна Иса Мәсиһ чьԛас ԝәʹдә гәрәке дәрбаз буйа. Дь пʹехәмбәртийеда һатьбу готьне кӧ «һʹәфт һʹәфтә у шест у дӧ һʹәфтә», бь тʹәмамийе әв дәрдькʹәвә 69 һʹәфтә. Ле гәло әв ԝәʹдә чьԛаси дьреж дьбә? Жь һьнә ԝәлгәрʹандьнeд Кʹьтеба Пироз рʹьнд те кʹьфше, ԝәки хәбәрдан дәрһәԛа һʹәфтийе сала дьчә, нә кӧ дәрһәԛа һʹәфт рʹожeд һʹәфтийе. Демәк һәр һʹәфтийе сала, дәрдькʹәвә 7 сал. Щьмәʹта Щьһуйа дәрһәԛа ван һʹәфтийе сала рʹьнд заньбун. Мәсәлә, һәр сала һʹәфта дь Исраеледа дьһатә һʹәсабе сала Шәмийе (Дәркʹәтьн 23:10, 11). Демәк пʹехәмбәрти дәрһәԛа 69 һʹәфтә, әв те һʹәсабе 69 ԝәʹдә у дь һәр жь ван ԝәʹдада 7 сал һәнә. Һәрге 7 дәрба 69 һʹәсаб кьн, ԝе дәрдькʹәвә 483 сал, демәк 69 һʹәфтә әв 483 сал ьн.

Ньһа әм ида дькарьн һʹәсаб кьн, ԝәки кʹәнге Иса Мәсиһ гәрәке бьһата. Һәрге әм жь сала 455 бәри дәԝрана мә Б.Д.М., бьжмерьн 483 сал, әме бьгьһижнә сала 29 дәԝрана мә Д.М. Һәма дь ве саледа Иса һатә ньхӧмандьне у кʹьфш бу ча Мәсиһ! * (Луԛа 3:1, 2, 21, 22). Гәло әв йәк әʹщебмайи нинә, кӧ пʹехәмбәртийeд жь Кʹьтеба Пироз ӧса һур бь һур һатьнә сери?