Omu Upolofweto waNdanyele Wahanjikile Vyakwiza chaMeshiya
Omu Upolofweto waNdanyele Wahanjikile Vyakwiza chaMeshiya
KAPOLOFWETO Ndanyele apwilengako myaka yakuhambakana 500 shimbu kanda Yesu asemuke. Oloze, Yehova alwezele Ndanyele vyuma navikakafwa vatu vakejive lwola navakawavisa Yesu, chipwe ngwetu kumutongola nakupwa Meshiya, chipwe Kulishitu. Ndanyele vamulwezele ngwavo: “Tachikiza umone, mwomwo kufuma hakulovoka lushimbi lwakuhilwisa nakutungulula Yelusalema nakuheta kuli ou vawavisa, ou twamina, nakukapwa jisemana jitanu najivali, najisemana makumi atanu nalimwe najivali.”—Ndanyele 9:25.
Hakusaka twijive lwola ejile Meshiya, twatela chatete kwijiva oho haputukilile lwola lwakukokela kuli Meshiya. Kweseka naupolofweto, lwola kana lwapwile, “kufuma hakulovoka lushimbi lwakuhilwisa nakutungulula Yelusalema.” Uno lwola muka ‘valowele lushimbi’ kanelu? Kweseka namuka-kusoneka Mbimbiliya Nehemiya, lushimbi lwakutungulula kembwe yaYelusalema lwapwileko “hamwaka wamwangana Alatakaseleke wakusokesa mumakumi avali.” (Nehemiya 2:1, 5-8) Vaka-kulinangula vyakushikulu vamba ngwavo mumwaka wa 474 B.C.E mukiko Alatakaseleke ahetesele mwaka wamuundu hachiyulo chenyi. Ngocho, mu 455 B.C.E mukiko ahetesele myaka makumi avali muchiyulo chenyi. Tunawane jino mwaka wa 455 B.C.E. kupwa himwaka waputukile kutesamo upolofweto wauMeshiya uze avulukile Ndanyele.
Ndanyele asolola tando nayikahitamo kuheta nakukwiza chayou ‘twamina vawavisa.’ Upolofweto wavulukile “jisemana jitanu najivali, najisemana makumi atanu nalimwe najivali,” kufutula josena najiheta kujisemana chipwe ngwetu vyalumingo 69. Uno eyi tando kana yasuhwa ngachilihi? JiMbimbiliya jajivulu jasolola nge evi keshi nge hivyalumingo vyamakumbi 7 koko, oloze hivyalumingo vyamyaka. Kulumbununa nge chalumingo hichalumingo chemanyinako myaka 7. Echi kulava chavyalumingo vyamyaka, chipwe ngwetu myaka 7, vachijivile chikuma kuli vaYuleya vakushikulu. Chakutalilaho, valingilenga Sambata yamwaka hanyima yamyaka 7. (Kulovoka 23:10, 11) Shikaho, vyalumingo 69 vyamuupolofweto vyenyikila kuvihanda 69 vyamyaka 7 muchihanda hichihanda, chipwe ngwetu myaka yakuheta ku 483.
Ngocho tulave jino. Nge natulava kufuma mu 455 B.C.E., kaha myaka 483 nayituhetesa kumwaka wa 29 C.E. Ou ukiko vene mwaka vambapachishile Yesu nakupwa jino Meshiya. * (Luka 3:1, 2, 21, 22) Kutesamo chaupolofweto kanou wakujiminyina hichuma chakukomwesa chiyovo!
[Kwinyikila chamwishi]
^ par. 5 Kufuma mu 455 B.C.E. nakuheta mu 1 B.C.E. mwahichile myaka 454. Kufuma mu 1 B.C.E. nakuheta mu 1 C.E. mwahichile mwaka umwe. Kaha kufuma mu 1 C.E. nakuheta mu 29 C.E. mwahichile myaka 28. Ngocho kufutula kulava chosenechi chitatu nachituhana myaka 483. Yesu ‘vamuteteleko’ omu afwile mu 33 C.E., mumyaka yachalumingo chakusokesa 70. (Ndanyele 9:24, 26) Tala kapetulu 11 mumukanda waPay Attention to Daniel’s Prophecy!, naInsight on the Scriptures, Volyumu 2, hamafwo 899-901. Mikanda yoseneyi yivali vayisoneka kuli Vinjiho jaYehova.
[Ndayangalamu/Mivwimbimbi halifwo 198]
(Hakusaka mumone mazu akwala kanawa, talenu mumukanda)
“JISEMANA MAKUMI ATANU NAAVALI”
Myaka 490
Jisemana 7 Jisemana 62 Semana yimwe
(myaka 49) (Myaka 434) (myaka 7)
455 406 ← B.C.E. C.E. → 29 33 36
“Lushimbi Kutungulula Meshiya ‘Kutetako’ Kukuma
lwakuhilwisa Yelusalema neza chaMeshiya ‘chajisemana
. . . Yelusalema” makumi atanu
naavali’
