SEKINOK TLAMACHTILI
Tlajtolpanextijketl Daniel kiijtok kema asiskia Mesías
DANIEL itstoya kema poliuiyaya kipano 500 xiuitl kema tlakatiskia Jesús. Jehová kiiljuik kenijkatsa Jesús eliskia Mesías o Cristo kema kiiljuik: “Intla se peuas kipouas sejse xiuitl tlen kema temakasej nopa tlanauatili para sampa ma kisenkauakaj altepetl Jerusalén, elis 49 xiuitl o 7 xiuitl panos 7 ueltas. Uan teipa elis seyok 434 xiuitl o 7 xiuitl panos 62 ueltas hasta kema asis nopa Mesías” (Daniel 9:25).
Ma tikitakaj kenijkatsa asiskia Mesías. Achtoui monekiyaya kimatisej kema peuaskia kipouasej nopa xiuitl katli panoskia uan kema tlamiskia. Daniel kiijtok peuaskia “kema temakasej nopa tlanauatili para sampa ma kisenkauakaj altepetl Jerusalén”. ¿Kema ‘temakaskiaj nopa tlanauatili’? Nehemías kiijtoua panok “kema Tlanauatijketl Artajerjes yauiyaya para 20 xiuitl tlanauatis” (Nehemías 1:1; 2:1, 5-8). Miakej kiijtouaj nopa achtoui xiuitl kema tekichijki Artajerjes elki ipan xiuitl 474 a.u.J. Tlaj peuas tijpouasej ipan xiuitl 474 a.u.J., uan titlamisej ipan xiuitl 455 a.u.J., tikitasej Artajerjes ya tlanauatijtoya 20 xiuitl. Uajka, tlen kiijkuilok Daniel pejki moaxitia ipan xiuitl 455 a.u.J.
Daniel kiijtok ipan keski xiuitl asiskia “Mesías”. Ya kiijtok panoskia “49 xiuitl o 7 xiuitl panos 7 ueltas. Uan teipa elis seyok 434 xiuitl o 7 xiuitl panos 62 ueltas”. Ni 69 ueltas panoskia chikompa. Judáeuanij kuali kikuamachiliyayaj kema xiuitl mopouayaya chijchikompa, pampa chijchikompa xiuitl amo tekitiyayaj se xiuitl, kej kichiuayayaj sejse sabádo (Éxodo 23:10, 11). Tlaj nopa 69 ueltas tijpouasej chikompa mochiuas 483 xiuitl.
Tlaj nopa 483 xiuitl peuas tijpouasej ipan xiuitl 455 a.u.J., titlamitij ipan xiuitl 29 y.u.J. kema Jesús moatsonpoliuiltik uan mochijki Mesías (Lucas 3:1, 2, 21, 22). * ¿Tikitak kenijkatsa moaxitik ni tlajtolpanextili?
^ párr. 2 Tlaj peuas tijpouasej ipan xiuitl 455 a.u.J. uan titlamisej ipan xiuitl 1 a.u.J., tijpouasej 454 xiuitl. Teipa, tlaj peuas ipan xiuitl 1 a.u.J. uan titlamisej ipan xiuitl 1 y.u.J., tijpouasej setsi xiuitl (pampa amo onka xiuitl cero). Uan tlaj tijpouasej ipan xiuitl 1 y.u.J. uan titlamisej ipan xiuitl 29 y.u.J., tijpouasej 28 xiuitl. Tlaj tijsejkotilisej nochi xiuitl tlen tijpojkej, mochiua 483 xiuitl. Jesús ‘kimiktijkej’ ipan xiuitl 33 y.u.J., kema panoyaya nopa 7 xiuitl 70 ueltas (Daniel 9:24, 26). Nojua tijmatis, tlaj tikitas amochtli Prestemos atención a las profecías de Daniel ipan tlamachtili 11, uan amochtli Perspicacia para comprender las Escrituras, vol. 2, iamayo 1014-1017, tlen kichijtokej Jehová itlajtoltemakauaj.
