Mokanwo
Kɛzi Daneɛle Ngapezo ne Ka Mɛzaya ne Ɛralɛ nwo Edwɛkɛ La
NGAPEZONLI Daneɛle dɛnlanle aze ɛvolɛ mɔɔ bo ɛya 500 la anzi kolaa na bawo Gyisɛse. Noko akee Gyihova yele edwɛkɛ mɔɔ bamaa bɛahola bɛanwu mekɛ mɔɔ bɛbakpokpa Gyisɛse anzɛɛ bɛbakpa ye kɛ Mɛzaya anzɛɛ Kelaese la hilele Daneɛle. Bɛhanle bɛhilele Daneɛle kɛ: ‘Yɛ edwɛkɛ ɛhye nzonlɛ na nyia nwolɛ ndelebɛbo kɛ ɔvi mekɛ mɔɔ bɛkɛha Gyɛlusalɛm ɛkyekyelɛ bieko anwo edwɛkɛ ne mɔɔ kɔdwu sonla ne, belemgbunli bie, mɔɔ bɛkpa nu bɛye ye na bɛkpokpa ye nwole la ɛralɛ mekɛ zo la, bayɛ ɛvolɛ nsuu fane nsuu, yɛɛ ɛvolɛ abulasia nee nwiɔ fane nsuu.’
Amaa yɛanwu Mɛzaya ne ɛralɛ mekɛ ne la, ɔwɔ kɛ yɛdumua yɛnwu mekɛ mɔɔ ninyɛne mɔɔ bamaa yɛanwu kɛ Mɛzaya ne ɛra la bɔle ɔ bo a. Kɛmɔ ngapezo ne kile la, ɔvi “mekɛ mɔɔ bɛkɛha Gyɛlusalɛm ɛkyekyelɛ bieko anwo edwɛkɛ” la. Mekɛ boni a ‘bɛhanle edwɛkɛ’ ɛhye a? Baebolo kɛlɛvolɛ Nihɛmaya kile kɛ, bɛhanle Gyɛlusalɛm bane ne mɔ ɛkyekyelɛ bieko anwo edwɛkɛ “wɔ Belemgbunli Atazɛzɛse ye ɛvolɛ abulanwiɔ ne azo.” (Nihɛmaya 2:1, 5-8) Tetedwɛkɛ kɛlɛvolɛma si ye pi kɛ Atazɛzɛse ebialilɛ ne bɔle ɔ bo wɔ 474 K.Y.M. Yemɔti, ɛnee ye ebialilɛ ɛvolɛ mɔɔ tɔ zo abulanwiɔ la a le 455 K.Y.M. Kɛkala akee yɛnwu mekɛ mɔɔ Daneɛle ngapezo mɔɔ fane Mɛzaya ne anwo la bɔle ɔ bo a, 455 K.Y.M.
Daneɛle hilele mekɛ tendenle mɔɔ “sonla ne, belemgbunli bie, mɔɔ bɛkpa nu bɛye ye na bɛkpokpa ye nwole” la ɛralɛ ne bayɛ la. Ngapezo ne ka ‘ɛvolɛ nsuu fane nsuu, yɛɛ ɛvolɛ abulasia nee nwiɔ fane nsuu’
Kɛkala, mɔɔ ɔwɔ kɛ yɛyɛ la a le kɛ yɛkɛsese. Saa yɛbɔ ye 455 K.Y.M. yɛtia ɛvolɛ 483 a, ɔfa yɛ ɔba 29 Y.M. Ɛvolɛ ɛhye anu a bɛzɔnenle Gyisɛse na ɔrayɛle Mɛzaya a! * (Luku 3:1, 2, 21, 22) Asoo kɛ Baebolo ngapezo ɛhye zile rale nu la ɛnyɛ nwanwane ɔ?
^ ɛden. 2 Ɛbɔ ye 455 K.Y.M. mɔɔ ɔba 1 K.Y.M. la le ɛvolɛ 454. Ɔbɔ ye 1 K.Y.M. mɔɔ ɔba 1 Y.M. la le ɛvolɛ ko, yɛɛ ɔvi 1 Y.M. mɔɔ badwu 29 Y.M. la le ɛvolɛ 28. Saa yɛfa ɛvolɛ ɛhye mɔ (454+1+28) yɛbɔ nu a, yɛnyia ɛvolɛ 483. ‘Bɛhunle’ Gyisɛse wɔ 33 Y.M., wɔ ɛvolɛ ne mɔɔ tɔ zo 70 fane nsuu ne anu. (Daneɛle 9:24, 26) Nea Pay Attention to Daniel’s Prophecy! tile 11, yɛɛ Insight on the Scriptures, Volume 2, mukelɛ 899-901, mɔɔ Gyihova Alasevolɛ ɛyɛ la anu.
