УӔЛӔМХАСӔН
Данелы пехуымпарад Мессийӕйы ӕрцыды тыххӕй
ПЕХУЫМПАР Данел цард Йесойы райгуырдӕй 500 азы раздӕр. Фӕлӕ йын Йегъовӕ уыцы рӕстӕг цы раргом кодта, уый фӕрцы базонӕн уыд, Йесо Хуыцауы сыгъдӕг тыхӕй сӕрст кӕд хъуамӕ ӕрцыдаид, ома Мессийӕ, кӕнӕ Чырысти, кӕд хъуамӕ суыдаид, уыцы рӕстӕг. Хуыцау Данелӕн загъта: «Уӕдӕ йӕ базон ӕмӕ йӕ бамбар: Иерусалим фӕстӕмӕ йӕ къахыл слӕууын кӕныны тыххӕй ӕмӕ йӕ ногӕй саразыны тыххӕй бардзырд куы рацӕуа, уӕдӕй Разамонӕг Мессийӕйы фӕзындмӕ рацӕудзӕн авд къуырийы ӕмӕ ӕхсай дыууӕ къуырийы» (Данел 9:25).
Цӕмӕй, Мессийӕ кӕд хъуамӕ ӕрцыдаид, уый сбӕрӕг кӕнӕм, уый тыххӕй уал фыццаг хъуамӕ базонӕм, уыцы рӕстӕг нымайын кӕцы азӕй хъӕуы, уый. Пехуымпар Данелы ныхӕстӕм гӕсгӕ, «Иерусалим фӕстӕмӕ йӕ къахыл слӕууын кӕныны тыххӕй ӕмӕ йӕ ногӕй саразыны тыххӕй бардзырд куы рацӕуа, уӕдӕй». Ӕмӕ уыцы бардзырд кӕд рацыд? Библийы фысджытӕй сӕ иу, Нееми, куыд загъта, афтӕмӕй Иерусалимы къултӕ ногӕй саразыны бардзырд рацыд, «Артаксеркс дыууынӕм аз куы уыд паддзах, уыцы аз» (Нееми 2:1, 5–8). Историктӕ куыд зӕгъынц, афтӕмӕй Артаксерксӕн йӕ хицаудзинады фыццаг ӕнӕхъӕн аз уыди н. э. размӕ 474 аз. Ӕмӕ уӕд йӕ хицаудзинады 20-ӕм аз та хауы н. э. размӕ 455 азмӕ. Уӕдӕ ныр зонӕм, Мессийӕйы ӕрцыды тыххӕй Данел цы загъта, уый нымайын кӕй хъӕуы н. э. размӕ 455 азӕй.
Данел бамбарын кодта, «Разамонӕг Мессийӕйы» ӕрцыдмӕ цы рӕстӕг ис, уый цас хъуамӕ ахастаид. Йӕ пехуымпарады скодта «авд къуырийы ӕмӕ ӕхсай дыууӕ къуырийы» кой – ӕдӕппӕтӕй 69 къуырийы. Уый цас у? Библийы иуӕй-иу тӕлмацтӕй бӕрӕг у, уыцы къуыритӕй алкӕцы дӕр 7 боны кӕй нӕ уыд, фӕлӕ 7 азы. Рагзаманты дзуттӕгтӕ зонгӕ уыдысты ӕвдгай азтӕй нымадимӕ. Зӕгъӕм, алы ӕвдӕм аз дӕр-иу сын уыд Сабаты аз (Рацыд 23:10, 11). Уӕдӕ 69 къуырийы сты 69 рӕстӕджы, ӕмӕ уыцы рӕстӕджытӕй алкӕцыйы дӕр ис 7 азы. Ӕмӕ уымӕ гӕсгӕ 69 «къуырийы» сты 483 азы.
Ныр ма нӕ хъӕуы ацы нымӕцтӕ иууылдӕр иумӕ банымайын. Н. э. размӕ 455 азӕй 483 азы куы ранымайӕм, уӕд ӕрцӕудзыстӕм н. э. 29 азмӕ. Раст уыцы аз Йесо донаргъуыд райста ӕмӕ сси Мессийӕ! (Лукайы 3:1, 2, 21, 22) *. Библийы пехуымпарад афтӕ лыстӕг хабӕртты онг кӕй сӕххӕст, уый диссаг нӕу?
^ 2 абз. Н. э. размӕ 455 азӕй н. э. размӕ 1 азмӕ ис 454 азы. Н. э. размӕ 1 азӕй н. э. 1 азмӕ та – иу аз. Ӕмӕ уӕд н. э. 1 азӕй н. э. 29 азмӕ ис 28 азы. Ацы ӕртӕ нымӕцы иумӕ куы банымайӕм, уӕд рауайдзысты 483 азы. Йесойы «амардтой» н. э. 33 азы, 70-ӕм азон къуырийы мидӕг (Данел 9:24, 26).
