APENDISE
No Panon ya Impasakbay nen Propeta Daniel so Isabi na Mesias
NAMBILAY si propeta Daniel masulok ya 500 a taon antis na inkiyanak nen Jesus. Balet, impaamta la nen Jehova ed si Daniel so impormasyon no kapigan nalanaan odino naturo si Jesus bilang Mesias odino Kristo. Impasakbay nen Daniel: “Amtaen mo tan talosan mo a manlapud pangipaakseb na ganggan ya apigeren tan ipaalagey lamet so Jerusalem ya anggad isabi na Mesias a Pangulo et walay 7 simba tan 62 simba.”—Daniel 9:25.
Pian naamtaan so “isabi na Mesias,” kaukolan tayo nin amtaen no kapigan ginmapon agawa imay impasakbay nen Daniel. Base ed satan, onggapo itan diad “pangipaakseb na ganggan ya apigeren tan ipaalagey lamet so Jerusalem.” Kapigan inter odino ‘impaakseb itan ya ganggan’? Base ed si Nehemias, sakey ed saray nansulat ed Biblia, inter so ganggan ya ipaalagey lamet iray padir na Jerusalem “diad koma-20 taon na uley nen Arin Artaxerxes.” (Nehemias 2:1, 5-8) Prupruebaan na saray historian a say taon 475 B.C.E. so onunan taon ya impanuley nen Artaxerxes. Kanian, say koma-20 a taon na uley to et nen 455 B.C.E. Natan et amta tayo la ya say gapo na samay panaon ya impasakbay nen Daniel nipaakar ed Mesias et nen 455 B.C.E.
Impanengneng nen Daniel no panon karukey so panaon ya onlabas anggad isabi na Mesias a Pangulo. Diad samay impasakbay to et walay “7 simba tan 62 simba” (7 + 62), ami-amin et 69 simba. Panon karukey itan? Ibabaga na pigaran patalos na Biblia a saratan ya “simba” et aliwan literal ya sakey simban walay pitoran agew, noagta simsimba na taotaon. Labay ton ibaga, say sakey simba et pitoran taon. Sayan simsimba na taotaon, odino asanpi-pito a taon, et kabisado na saray Judio nensaman. Singa bilang, seselebraan da so taon na Sabaton ed kada komapiton taon. (Exodo 23:10, 11) Kanian, say impasakbay ya 69 simba et 69 ya asanpi-pito a taon (69 x 7), ami-amin et 483 a taon.
Natan et kuentaen tayo. No manlapud 455 B.C.E. et manbilang tayoy 483 ya taon, ompetek itan ed taon 29 C.E. Atan so eksakton taon nen abautismoan si Jesus tan nagmaliw a Mesias! * (Lucas 3:1, 2, 21, 22) Talagan makapadinayew no panon ya asumpal itan ya impasakbay na Biblia!
^ par. 2 Manlapud 455 B.C.E. anggad 1 B.C.E. et 454 ya taon. Manlapud 1 B.C.E. anggad 1 C.E. et sakey taon (anggapo so zero ya taon). Tan manlapud 1 C.E. anggad 29 C.E. et 28 a taon. No panaaruman tayo iratan (454 + 1 + 28), ami-amin et 483 a taon. ‘Pinatey’ si Jesus nen 33 C.E. legan na koma-70 ya simba na taotaon. (Daniel 9:24, 26, paimanod leksab) Nengnengen so Imanoen so Propesiya nen Daniel! kapitulo 11, tan Insight on the Scriptures, Volume 2, pahina 899-901. Im-publish iratan na Saray Tasi nen Jehova.
