PROFETA Daniel a biba mas ku 500 aña promé ku Hesus a nase. Sin embargo, Yehova a revelá na Daniel informashon ku lo a hasi posibel pa señalá e tempu ku lo a ungi, òf nombra, Hesus komo e Mesias òf Kristu. Un angel a bisa Daniel: “Sabi anto i komprondé ku for di e momentu ku e òrdu a wòrdu duná pa restorá i rekonstruí Yerusalèm te na e Mesias, e Prens, lo tin shete siman i sesentidos siman.”—Daniel 9:25.

 Pa determiná e tempu di e yegada di e Mesias, nos tin ku sa promé ki tempu e periodo ku ta hiba na e Mesias a kuminsá. Segun e profesia, esei ta “for di e momentu ku e òrdu a wòrdu duná pa restorá i rekonstruí Yerusalèm.” Ki tempu “e òrdu a wòrdu duná”? Segun e eskritor bíbliko Nehemias, “den e di binti aña di rei Artaherhes” a duna e òrdu pa rekonstruí e murayanan rònt di Yerusalèm. (Nehemias 2:1, 5-8) Historiadónan ta konfirmá ku aña 474 promé ku nos era (P.E.K.) tabata Artaherhes su promé aña kompletu komo gobernante. Pues anto e di 20 aña di su reinado tabata aña 455 P.E.K.  Awor nos sa ki tempu Daniel su profesia Mesiániko a kuminsá kumpli, esta, na aña 455 P.E.K.

Daniel ta indiká tambe kon largu e periodo di tempu ku a hiba na yegada di e “Mesias, e Prens” lo a dura. E profesia ta menshoná “shete siman i sesentidos siman,” un total di 69 siman. Kon largu e periodo di tempu aki ta? Vários tradukshon di Beibel ta menshoná ku e simannan aki no ta siman di shete dia, sino siman di aña. Es desir, kada siman ta representá shete aña. E hudiunan di antigwedat tabata konosí ku e konsepto aki di siman di aña, òf sekshonnan di shete aña. Por ehèmpel, kada shete aña nan a warda un aña di sabat. (Eksodo 23:10, 11) P’esei e 69 simannan profétiko ta suma 69 sekshon di shete aña kada un, òf un total di 483 aña.

Tur loke nos tin ku hasi awor ta konta. Si nos kuminsá konta for di aña 455 P.E.K., 483 aña despues ta hiba nos na aña 29 di nos era (E.K.). Esei ta presis e aña ku Hesus a batisá i bira e Mesias! * (Lukas 3:1, 2, 21, 22) Esaki no ta un kumplimentu remarkabel di profesia bíbliko?