SOUKOHP Daniel momour sounpar 500 samwa mwohn Sises eh ketin ipwidi. Ahpw Siohwa ketin kasalehiong Daniel ire kan me pahn kak kasalehda iahd me Sises pahn keidi de idihdida nin duwen Mesaia de Krais. Koht mahsanihong Daniel: “Ke anahne ese oh dehdehki me sang ni ahnsou me mahsen en onehda sapahl Serusalem wiawiher lel Mesaia Kauno, pahn mie wihk 7 oh pil wihk 62.”​—Daniel 9:25, NW.

 Pwe kitail en kak esehda iahd me Mesaia pahn pwarodo, kitail anahne wehwehki mahs iahd me erein ahnsou ehu me pahn imwikihla pwarodohn Mesaia eh tepida. Nin duwen kokohpo, e tepida “sang ni ahnsou me mahsen en onehda sapahl Serusalem wiawiher.” Eri iahd me “mahsen” wet wiawi? Nehmaia kasalehda me mahsen en onehda sapahl kehl me pidakihdi Serusalem wiawi nan “karieisek en sounpar me Ardaserksihs wiewiahki nanmwarki.” (Nehmaia 1:1; 2:1, 5-8) Soun poadopoad kan kin kadehde me pahr 474 mwohn Krais iei tepin pahr en kaundahn Ardaserksihs. Kahrehda karieisek en pahr en eh kaunda iei pahr 455 mwohn Krais. Met kitail wehwehkier me pweidahn kokohp en Daniel duwen Mesaia tepida nan pahr 455 mwohn Krais.

Daniel kasalehda ia uwen werei en erein ahnsou me pahn lel pwarodohn “Mesaia Kauno.” Kokohpo mahsanih me “pahn mie wihk isuh oh pil wihk weneisek riau,” me patpene wiahda wihk 69. Ia uwen werei en erein ahnsou wet? Ekei kawehwe kan en Paipel kin kasalehda me met kaidehn wihk en rahn isuh, ahpw wihk en pahr. Met wehwehki me ehuehu wihk kin wehwehki sounpar 7. Mehn Suhs akan en mahs kin kalapw doadoahngki koasoandi en wihk en pahr de wadawad en pahr-isuh-koaros. Karasepe, re kin idawehn koasoandi en pahr en Sapad ni sounpar isuh koaros. (Eksodus 23:10, 11) Kahrehda kokohp en wihk 69 kin wiahda sounpar 69 wad 7 de sounpar 483.

Eri ihme kitail pahn wia met iei wadek sang ahnsowo kohdo. Ma kitail wadekasang nan pahr 455 mwohn Krais, sounpar 483 mwuri pahn inenohng pahr 29. Iei pahro me Sises papidaisla oh wiahla Mesaia! * (Luk 3:1, 2, 21, 22) Met sou wia pweidahn kokohp en Paipel kapwuriamwei ehu?