LIBROPA SAPAQ YACHACHIKUYNINKUNA
Mesias chayamunanmanta Diosmanta willakuq Danielpa willasqan
PICHQA pachak masnin wata ñawpaqtaraq manaraq Jesus nacechkaptinmi Diosmanta willakuq Danielqa kawsakurqa. Jehová Diosqa Danielmanmi willarqaña haykapim Mesias otaq Cristo kananpaq Jesus nombrasqa kananmanta. Danieltam nirqa: “Kay willasqaytayá entiendey sumaqta. Kamachikuy lloqsimuptinmi Jerusalen llaqta huktawan hatarichisqa kanqa. Kamachikuy lloqsimuptinmi Jerusalen llaqta mosoqmanta perqasqa kanqa. Chay tiempomanta huk Akllasqa Kamachikuq hamunankamam pasanqa qanchis semanakuna. Pasanqataqmi soqta chunka iskayniyoq semanakuna”, nispa (Daniel 9:25).
Qawarisun imaynatam yachakunman haykapim Mesias chayamunanmanta. Puntatam yachana ima watamantapacham yupakuyta qallarikurqa haykapi Mesias chayamunanmanta yachanapaq. Danielta nisqanman hinaqa yupakuytam qallarikunmam ‘Jerusalen llaqta huktawan hatarichisqa kananpaq’ chaynataq ‘mosoqmanta perqasqa kananpaq’ kamachikuy lloqsimuptin. ¿Haykapim chay ‘kamachikuy lloqsimurqa’? Diosmanta willakuq Nehemiasmi nin chay kamachikuyqa lloqsirqa “Rey Artajerjes iskay chunka watamanña gobiernachkaptinmi”, nispa (Nehemias 2:1, 5-8). Ñawpa tiempopi pasakusqankunamanta estudiaqkunapa nisqankuman hinam Rey Artajerjes kamachikuyta qallarirqa wak 475 kaq watapi manaraq Jesus hamuchkaptin (m.J.h.). Iskay chunka wata kamachikuyninqa tupan 455 kaq watawanmi (m.J.h.). Chaymi Mesias rikurimunanmanta Danielpa willakusqanqa yupakuyta qallarikurqa 455 kaq watamantapacha (m.J.h.).
Danielmi willarqaña hayka tiempomanta “Akllasqa Kamachikuq” rikurimunanmanta. Willakuymi nin ‘pasanqam qanchis semanakuna. Pasanqataqmi soqta chunka iskayniyoq semanakunapas’ nispa, llapanpiqa 69 semanakunam. ¿Haykataq cheqappuniqa chay 69 semanakunaqa kanman? Bibliakunapa nisqanman hinaqa manam qanchis punchawniyoq semanakunachu, aswanqa semanakunatam yupakurqa watakunata hina. Sapa semanam tupaq qanchis wataman. Ñawpa judiokunaqa qanchis watatam yupaqku huk semanata hina. Sapa qanchis watamantam huk watata waqaychaqku, chay watatam suticharqaku sabado wata nispa (Exodo 23:10, 11). Chay 69 semanakunaqa 7 kuti 69 semanakunam, llapanpiqa 483 watakunam.
Chaymi 455 kaq watamantapacha (m.J.h.) 483 watakunata yupaspaqa 29 kaq watamanmi chayanchik, chay watapim Jesucristo bautizakuspa Mesiaspiña rikurirurqa (Lucas 3:1, 2, 21, 22). * Qawasqanchikman hinaqa Bibliapa nisqanqa cumplikurqapunim.
^ par. 2 455 kaq watamantam (m.J.h.) 1 kaq watakama (m.J.h.) yupakun 454 watakunata. Chaymantañataq 1 kaq watamanta (m.J.h.) 1 kaq watakama yupakun huk watallata. 1 kaq watamantataq 29 kaq watakama yupakun 28 watakunata. Kimsanta yupaptinchikmi (454+1+28) yupakun 483 watakuna. Jesusqa wañuchisqam karqa 33 kaq watapi, qanchis chunka semanakuna ukupi (Daniel 9:24, 26). Yachayta astawan munaspaykiqa Jehová Diospa testigonkunapa castellanopi rurasqa Prestemos atención a las profecías de Daniel sutichasqa libropa 11 kaq capitulonta chaynataq Perspicacia para comprender las Escrituras sutichasqa librota vol. 2, págs. 1014-1017 nisqanta qawariy.
