PAROFIAT ta Taniela mȧür ma sir ‘e fạu 500 mumuạ ne a‘suạgam ‘on Jisu. Ka, Jihova no‘ȧk se Taniela te aier ne la po la juj‘ạkia av het ne Jisu la nin ‘e ‘at ha‘a, ne a‘fumou‘ạkia la iạ ta Mesaie ta, ne Karisto ta. Te‘is te ne ‘ea se Taniela: “Ma te‘is ‘äe la ‘inea ma räea, ne ‘e av het ne leuofu e fäeag fas‘ạkit la a‘fo‘oua Jerusalemi ma fū‘ȧk hoi‘ạkia ka hele‘ se mariugam ‘on gagaj ‘es puret ne nạu vạhia [“Mesaie ta,” NW] ‘on roa ne av ta la gasav hif; ma ‘e laloag ne gasav onaghul ma rua.”—Taniela 9:25.

La re fiạk‘ạkia av het ne Mesaie ta la mariugam, ‘is kop la ‘inea kamatag ne av het ne leu ag‘ạkiof se Mesaie ta. La fakma se parofesại ta, iạ kamat “‘e av het ne leuofu e fäeag fas‘ạkit la a‘fo‘oua Jerusalemi.” Ma te ne ‘ea “leuofu e fäeag fas‘ạkit” sok ‘e kis? Te ne Nehemaia, le‘et ‘e iris ne fạ‘ia Puk Ha‘a ‘ea, fäeag te‘is la fu‘ȧk hoi‘ạkia pāat ne kạlua Jerusalemi rak‘ȧk ‘e “ruạghul ne fạu ‘on Sau ta Artaksesi.” (Nehemaia 2:1, NW, 5-8) Famör fȧ‘ rogrog ne ava a‘fumou‘ȧk fạu 474 M.A.K. ne iạ ta fạu ‘atakoa mumuet ne Artaksesi pure e. Ma ‘on fuạga, 455 M.A.K., iạ ta ‘on ruạghul ne fạu ne ‘on pure. Ma ‘is po vạhia kamatag ne av het ne Taniela parofesại‘ȧk la Mesaie ta la mariugam, iạ ta‘, 455 M.A.K.

Taniela foar roa ne avat ne leu ag‘ạkiof se mariugam ‘on “Mesaie Gagaj Puer ta.” Parofesại ta ‘ea “gasav hif, ma tape‘ma gasav onaghul ma rua”—ma tạunȧ‘ ma gasav 69. Tapen ‘on roa ne av hete‘? Ma ‘on Puk Ha‘ höl‘ȧk vạhia ma räe ne nampa te‘ kat ‘ạligen ra gasav terȧn hifu, ka gasav ne fạu. ‘On fuạga, gasavat iạ la hat la fạu hif. Räe het ne ‘ea gasav ne fạu, ne väeag het fạu hif, famör Jiu ‘e ‘on tạusa mamnȧk sin. La fak se, iris a‘sok ta fạu ne Sapato ‘e te‘ ne fạu hif ‘i. (Sại‘ạkiga 23:10, 11) Tä ‘on‘on, gasav 69 ne parofesại‘ạki tạunȧ‘ ma po se väeag 69, väegat fạu 7, ne la tạunȧ‘ ‘atakoa ma po se fạu 483.

Ma ‘e ‘on ‘i hete‘ ‘is la hat ma re fiạk‘ạkia. Nono ka ‘is hatam ‘e 455 M.A.K., fạu 483 ho‘am ‘is se fạu 29 A.K. Ta‘ag fạut ne Jisu papetaiso e ma hele‘uen la Mesaie ta!* (Luke 3:1, 2, 21, 22) ‘E reko parofesại te‘ sok ‘atakoa iạ a‘ne‘ne‘ pạu ‘os pilifi.

*  La kamat hatam ‘e 455 M.A.K. se 1 M.A.K. iạ la fạu 454. ‘E 1 M.A.K. se 1 A.K. iạ la fạu ‘esea het (kat ‘es fạu ‘o het ra). Ma ‘e 1 A.K. se 29 A.K. iạ, fạu 28. Tạunȧ‘ maf ne fiạk fol ‘i ma ‘is po se fạu 483. Jisu iạ “mut sio” ‘e ala ‘e 33 A.K., ‘e ‘on hifaghul ne gasav ne fạu. (Taniela 9:24, 26) ‘Io se Pay Attention to Daniel’s Prophecy! väe 11, ma Insight on the Scriptures, Volume 2, rạupeap 899-901. Jihova Uetnes ta tä fȧ‘ se puk he ruạ ‘i.

“GASAV HIFẠGHULU”

fạu 490
gasav 7 (fạu 49)		gasav 62 (fạu 434) ←M.A.K. | A.K.→	gasav 1 (fạu 7)
455 “Fäeag fas‘ạkit la a‘fo‘oua…Jerusalemi”	406 Jerusalemi fū‘ȧk hoi‘ȧk vạhia	29 Mariugam ‘on Mesaie ta	33 Mesaie ta “mut sio”	36 A‘ofiạg ne “gasav hifạghulu”

← Kel se ‘on väe ta