MAKANI AAYUNGIZYIDWE
Ibusinsimi bwa Daniele Mbobusinsima Kusika kwa Mesiya
IMUSINSIMI Daniele wakali kupona imyaka yiinda ku 500 Jesu katanazyalwa. Nokuba boobo, Jehova wakayubunwida Daniele makani aakali kuyoogwasya kuzyiba ciindi Jesu naakali kuyoonanikwa amuuya uusalala naa kusalwa. Daniele wakaambilwa kuti: “Uleelede kuzyiba akumvwisya kuti, kuzwa kuciindi camulazyo wakubusya awakuyakulula Jerusalemu kusikila kuciindi cakusika kwamwami uunanikidwe, kuyooba insondo zili ciloba ansondo zili makumi aali cisambomwi azibili.”—Daniele 9:25, NW.
Ikutegwa tuzyibe ciindi Mesiya naakasika, cakusaanguna tweelede kuzyiba matalikilo aaciindi cakasololela kukuboola kwa Mesiya. Ikweelana abusinsimi, citalika “kuzwa kuciindi camulazyo wakubusya awakuyakulula Jerusalemu.” Ino “mulazyo” ooyu wakapegwa lili? Ikweelana asikulemba Bbaibbele Nehemiya, imulazyo wakuyakulula malambo aazinguluka Jerusalemu wakapegwa “mumwaka wamakumi obile wamwami Aritasasta.” (Nehemiya 2:1, 5-8) Basikwiiya makani aakaindi balasinizya kuti imwaka wa 474 B.C.E. ngowakali mwaka uukkwene wakusaanguna keendelezya Aritasasta. Aboobo imwaka wa 20 wakweendelezya kwakwe wakali 455 B.C.E. Aboobo lino twaajana aakutalikila kujatikizya businsimi bwa Daniele bujatikizya Mesiya, nkokuti mmwaka wa 455 B.C.E.
Daniele ulatondezya mbocakali kuyoolampa ciindi cakali kuyoosololela kukusika “kwamwami uunanikidwe.” Ibusinsimi bwaamba “insondo zili ciloba ansondo zili makumi aali cisambomwi azibili”—antoomwe insondo zili 69. Ino ciindi eeci ncilamfwu buti? Busanduluzi bwama Bbaibbele manji bwaamba kuti eezyi nsondo teensyi nsondo zyamazuba aali ciloba pe, pele ninsondo zyamyaka. Nkokwaamba kuti imvwiki aimwi yiiminina myaka iili ciloba. Ikubala mvwiki zyamyaka naa zibeela-beela zyamyaka iili ciloba cakali cintu cizyibidwe kapati kuba Juda bansiku. Mucikozyanyo, bakali kuba amwaka wa Sabata mumwaka waciloba woonse. (Kulonga 23:10, 11) Aboobo, insondo zyabusinsimi izili 69 zyaamba zibeela-beela zili 69 acimwi kacilampa myaka iili ciloba naa antoomwe imyaka iili 483.
Lino cilikke ncotweelede kucita nkubala. Ikuti twabala myaka iili 483 kuzwa mu 455 B.C.E., tusika mumwaka wa 29 C.E. Ooyo ngomwaka Jesu naakabbapatizyigwa akuba Mesiya! * (Luka 3:1, 2, 21, 22) Sena eeci taciyumyi lusyomo kuti businsimi oobu bwamu Bbaibbele bwakazuzikizyigwa boobu?
^ munc. 2 Kuzwa mu 455 B.C.E. kusikila mu 1 B.C.E. kuli myaka iili 454. Kuzwa mu 1 B.C.E. kusikila mu 1 C.E. kuli mwaka omwe (kwakanyina mwaka uutegwa 0 pe). Alimwi kuzwa mu 1 C.E. kusikila mu 29 C.E. kuli myaka iili 28. Ikusanganya namba eezyi zyotatwe kutupa myaka iili 483. Jesu ‘wakajaigwa’ mu 33 C.E., mumvwiki yamyaka ya 70. (Daniele 9:24, 26) Amubone bbuku lyakuti Amububikkile Maanu Businsimi bwa Daniele! cibalo 11 alimwi abbuku lya Insight on the Scriptures, Bbuku 2 apeeji 899-901. Imabbuku aaya oonse akamwaigwa a Bakamboni ba Jehova.
