AYXA mas ja 500 jabʼil ajyi sakʼan ja aluman Daniel bʼajtanto lek oj pojkuk ja Jesús. Pe ja Jyoba yala yabʼ ja Daniel jastik junuk sbʼaja jastal oj naxuk jas ora oj chiknajuk ja Jesús jastal ja Mesías, ma Kristo. Ja Daniel alji yabʼ: «Ja weʼn tʼilani oja naʼ sok oja wabʼ stojolil masan el ja yaljel bʼa stojbʼesel sok yajel kʼeʼuk yajkʼachil ja Jerusalén man ja Mesías ja Olomali, oj ajyuk 7 semana, sok chomajkil 62 semana» (Daniel 9:25).

 La kiltik jastal oj bʼobʼ naxuk jas ora oj sjeʼ sbʼaj ja Mesiasi. Bʼajtan tʼilan oj jnatik jas jabʼilil oj kʼe kajtabʼuktik bʼa oj jnatik janekʼ tyempo ekʼi masan sjeʼa sbʼaj ja Mesiasi. Soka jas alubʼalxakani tini el ja bʼa «yaljel bʼa stojbʼesel sok yajel kʼeʼuk yajkʼachil ja Jerusalén». ¿Jas tyempoʼil alxi ja «yaljel» it? Pilan tsʼijbʼuman bʼa Biblia, sbʼiʼil Nehemías, wa xcholo ja yaljel jaw, ja mandar bʼa yajel kʼeʼuk yajkʼachil ja sbardaʼil ja Jerusalén, el «bʼa jabʼil 20 bʼa Artajerjes ja mandaranumi» (Nehemías 2:1, 5-8). Tuktukil tsʼijbʼanum juʼun wa slaja sbʼaje soka bʼa sbʼajtanil jabʼil ja smandaranel ja Artajerjesi waj bʼa jabʼil 474 bʼajtanto bʼa styempo ja Jesús (bʼ.t.J.). Sok ta kajtabʼantik 20 jabʼil ja bʼa smandaraneli, wala eltikʼot bʼa jabʼil 455 bʼ.t.J. Ja yujil, ja jas yalakan ja Daniel sbʼaja Mesías tini wa xkʼe ja bʼa mero jabʼil 455 bʼ.t.J.

Masan skʼeʼulabʼil ja jabʼil jaw ja Daniel yala janekʼ tyempo oj ekʼuk man sjeʼa sbʼaj ja «Mesías ja Olomali». Ja yeʼn yala oj ekʼuk «7 semana, sok chomajkil 62 semana», ta jtsomotik wa x-el 69 semana. ¿Janekʼ oj albʼuk ja semanaʼik it? Jastal wa xyala tuk Bibliaʼik, ja semanaʼik it mi bʼa 7 kʼakʼujuk, kʼotel semanaʼik bʼa jabʼilik. Wa xkʼan kaltik, jujune semana kʼotel 7 jabʼil. Ja Judíoʼik bʼa tyempo najate wa xyabʼye lek stojolil ja semanaʼik bʼa jabʼilik it, ma tsome 7 jabʼilik. Jastalni ja mandar yaʼa ja Jyoba, ja it jun skostumbreʼe bʼa wa xyawekan ajijluk ja luʼumi yenteroʼil jun jabʼil yajni wa x-elkʼot ja 7 jabʼili (Éxodo 23:10, 11). Ja yujil, ja 69 semana alji junxta sok ja 69 tsomeʼik bʼa 7 jabʼili, sok wa x-elkʼot 483 jabʼil.

Ja wego kechanxta oj kajtabʼuktik ja 483 jabʼili. Ta kʼe jtultik yajtabʼajel bʼa 455 bʼ.t.J., wani la eltikʼot bʼa jabʼil 29 bʼa styempo ja Jesús (t.J.), sok jaʼ mero jabʼil jaw yiʼaj jaʼ ja Jesús sok ti kʼot najuk sbʼaj Mesías (Lucas 3:1, 2, 21, 22). * ¿Anke ja jas alji sbʼaja Mesías jachni mero elkʼota?