TUHAA HAU
E nafea te parau tohu a Daniela e faaite atea ’i i te taeraa mai o te Mesia?
I ORA na te peropheta Daniela e 500 tiahapa matahiti hou Iesu a fanauhia ’i. Ua faaite râ Iehova ia Daniela i te tahi mau haamaramaramaraa o te faataa eaha te taime e faatavaihia ’i Iesu ei Mesia. Ua parauhia ia Daniela e: “E faaroo mai ia ite, e mai te tuuraa i taua parau i te rave faahou e te patu ia Ierusalema e te Mesia te Arii ra, e hitu ïa hebedoma, e na hebedoma hoi e ono ahuru e piti tiahapa.”—Daniela 9:25.
No te taa eaha te taime e tae mai ai te Mesia, e mea tia ia ite na mua tatou i te haamataraa o te tau e tae atu ai i te Mesia ra. Ia au i te parau tohu, “mai te tuuraa” ïa “i taua parau [e] rave faahou e [e] patu ia Ierusalema.” Inafea ra te “tuuraa[hia] . . . taua parau”? Ia au i te papai Bibilia ra o Nehemia, ua tuuhia te parau e patu faahou ia Ierusalema “i te matahiti taau o te arii ra o Aretehasaseta.” (Nehemia 2:1, 5-8) Te haapapu ra te feia tuatapapa e o te matahiti 474 hou te Mesia te matahiti taatoa matamua i haamata ’i o Aretehasaseta i te faatere. No reira, o te matahiti 455 hou te Mesia te matahiti taau, aore ra te 20raa o te matahiti, o ta ’na faatereraa. I teie nei, te vai ra ta tatou taime haamataraa o ta Daniela parau tohu Mesia, oia hoi te matahiti 455 hou te Mesia.
Te faaite ra Daniela i te maoro o te tau e tae mai ai “te Mesia te Arii.” Ia au i te parau tohu, “e hitu ïa hebedoma, e na hebedoma hoi e ono ahuru e piti tiahapa”—e 69 ïa hebedoma taatoa. Eaha te maoro o teie tau? Te tapao ra e rave rau huriraa Bibilia e e ere i te hebedoma e hitu mahana, e hebedoma matahiti râ. Oia hoi, hoê hebedoma e hitu ïa matahiti. Ua matau te mau ati Iuda i tahito ra i teie mana‘o o te hebedoma matahiti, aore ra e hitu matahiti te hebedoma taitahi. Ei hi‘oraa, i haapao na ratou i te hoê matahiti Sabati i te mau hitu matahiti atoa. (Exodo 23:10, 11) No reira, na hebedoma parau tohu e 69, e 69 ïa taime e 7 matahiti taitahi, aore ra e 483 matahiti taatoa.
E numera noa ïa tatou i teie nei. Ia numera tatou mai te matahiti 455 hou te Mesia, e te roaraa o na 483 matahiti, e afai ïa te reira ia tatou i te matahiti 29 o to tatou tau ra. Tera mau â te matahiti i bapetizohia ’i Iesu e i riro ai oia ei Mesia! * (Luka 3:1, 2, 21, 22) E ere anei i te tupuraa faahiahia teie o te parau tohu Bibilia?
^ par. 2 Mai te matahiti 455 hou te Mesia e tae atu i te matahiti 1 hou te Mesia, e 454 ïa matahiti. Mai te matahiti 1 hou te Mesia e tae atu i te matahiti 1 o to tatou tau, hoê ïa matahiti (aita e matahiti aore). E mai te matahiti 1 o to tatou tau e tae atu i te matahiti 29 o to tatou tau, e 28 ïa matahiti. Ia amuihia teie na numera e toru, e noaa mai ïa e 483 matahiti. Ua “tâpû-ê-hia” Iesu i roto i te pohe i te matahiti 33 o to tatou tau, i te 70raa o te hebedoma matahiti. (Daniela 9:24, 26) A hi‘o i te buka Prêtons attention à la prophétie de Daniel! pene 11, e te Étude perspicace des Écritures, buka 2, api 995-997, piahia e te mau Ite no Iehova.
