ALOMBOLUILO A VOKIYIWAKO
Ocitumasuku ca Daniele ca Sapuile Oku Iya Kua Mesiya
OTEMBO Daniele a kala komuenyo toke koku citiwa kua Yesu, pa pita eci ci soka 500 kanyamo. Pole, Yehova wa sapuilile Daniele eci nda ceya oku kuatisa Akristão oku limbuka otembo Yesu nda eya oku wavekiwa lespiritu sandu oco a kale Mesiya, ci lomboloka okuti Kristu. Daniele vo sapuila hati: “Kulĩha yapa, limbuka okuti tunde poku handeleka oku tumbulula loku tunga Yerusalãi toke pokuiya kua Mesiya, haeye Soma, pa kala olosemana 7 kuenda olosemana 62.”—Daniele 9:25.
Oco tu limbuke otembo yoku iya kua Mesiya, tete tu sukila oku kũlĩha apa popisa otembo yi tuala koku iya kua Mesiya. Ocitumasuku ca popia hati, otembo yaco yupisa “tunde poku handeleka oku tumbulula loku tunga [o] Yerusalãi.” Oco hẽ otembo yipi kua eciwa ‘ocihandeleko’ caco? Ndomo ca sapuiwa lusonehi Wembimbiliya Nehemiya, oku handelekiwa kuo kutunga ovimbaka vio Yerusalãi kua lingiwa “kulima wakui avali wa Soma Aretasesete.” (Nehemiya 2:1, 5-8) Asapulo a lekisa uvangi wokuti ulima 474 otembo Kristu keyile, owo muẽle wa kala ulima watete woku viala kua soma Aretasesete. Omo liaco, unyamo 455 otembo Kristu keyile, owo wa kala ulima wakũi avali woku viala kuaye. Kuenje tu pitĩla kelomboloko liokuti unyamo wo 455, owo wa kala unyamo wefetikilo lioku tẽlisiwa kuocitumasuku catiamẽla ku Mesiya ci sangiwa kelivulu lia Daniele.
Daniele wa lekisa otembo nda ya pita toke koku iya kua “Mesiya, haeye Soma.” Ocitumasuku ci tukula “olosemana 7 kuenda olosemana 62.” Oku ci kongela ca soka 69 kolosemana. Otembo yaco hẽ ya soka anyamo añami? Ambimbiliya alua a lekisa okuti olosemana viaco, halosemanako viepanduvali koloneke. Pole, olosemana vianyamo. Osemana losemana ya soka epanduvali kanyamo. Ocisimĩlo eci colosemana vianyamo, ca kũlĩhĩwile ciwa la va Yudea kosimbu, eci vunyamo wepanduvali va enda oku ivaluka Esambata lianyamo, una va tukowaile hati unyamo Wesambata. (Etundilo 23:10, 11) Omo liaco, 69 kolosemana via tukuiwa vocitumasuku, oku vi tenda olonjanja 7 kanyamo vi soka 483 kanyamo.
Cilo tu sukila oku linga olokonda. Nda tua tenda oku upisa kunyamo 455 otembo Kristu keyile, 483 kanyamo a tu tuala toke kunyamo 29 kotembo ya Kristu. Owu owo unyamo Yesu a papatisiwa kuenje wa linga Mesiya! a (Luka 3:1, 2, 21, 22) Oku tẽlisiwa kuocitumasuku eci ka ku komohisa?
a Okupisa kunyamo 455 toke kunyamo 1 otembo Kristu keyile, pa pita 454 kanyamo. Okupisa kunyamo 1 otembo Kristu keyile toke kunyamo 1 kotembo ya Kristu, pa pita unyamo umosi (momo ka kua kaile unyamo wo zero). Okupisa kunyamo 1 kotembo ya Kristu toke kunyamo 29, pa pita 28 kanyamo. Oku ci kongela ci tẽla 483 kanyamo. Yesu wa “tepiwako” vosemana yakũi epanduvali kanyamo, eci a fa kunyamo 33. (Daniele 9:24, 26) Tala velivulu Preste Atenção a Profecia de Daniel! kocipama 11, kuenda elivulu Estudo Perspicaz, Volume 3, kemẽla 582-585. Alivulu aco a sandekiwa Lolombangi via Yehova.
