გეძინელ თემეფი
მუჭო რე წინასწარ რაგადებულ დანიელიშ წიგნის მესიაშ მოულა?
წინასწარმარაგადე დანიელი იესოშ დაბადებაშახ 500-შე მეტ წანათ ადრე ცხოვრენდუ. იეჰოვაქ დანიელს უწუ, მუჭო შილებედკონ იჸიდ თიშ გაგება, მუჟამს გინირთუდ იესო ცხებულო ანუ მესიათ (ქრისტეთ). ანგელოზიქ დანიელს უწუ: „გიჩქუდას დო ქინანჭი თეს, ნამდა იერუსალიმიშ დუდშეიან სახეშ დართინაფალო დო ეიოშენებელო მეფეშ ნაზოჯა გეგშურსინ უკულ, მესიაშ, აწმანჯღვერეშ მიკორჩქინაშახ შკვით მარა დო სუმენეჩდოჟირ მარა გემკურს“ (დანიელი 9:25).
მესიაშ მოულაშ დრო დუვადგინათინ თიშო, საჭირო რე პირველ რიგის ქიგებგათ, სოვრეშე იჭყაფუ თი პერიოდი, ნამუშ ბოლოს მესიაქ ოკო გამკორჩქინდუკო. წინასწარნარაგადა ოძირანდ, ნამდა თე პერიოდი დიჭყაფუდ თიშ უკულ, მუჟამს გიშელენდ მეფეშ ნაზოჯა სიტყვა „იერუსალიმიშ დუდშეიან სახეშ დართინაფალო დო ეიოშენებელო“. მუჟამს მოხვად თექ? ნეემია ჭარუნს ბიბლიაშ ართ-ართ წიგნის, ნამდა იერუსალიმიშ კიდალეფიშ დუდშეიან სახეშ დართინაფალო მეფეშ ნაზოჯა სიტყვეფქ გიშართ „არტაქსერქსე მეფეშ მეფობაშ მაეჩა წანას“ (ნეემია 2:1, 5—8). ისტორიკოსეფიშ აზრით არტაქსერქსეშ მეფობაშ პირველ მთლიან წანა ჯვეშ წანაკოროცხუათ 474 წანა რდუ. ათეშგურშენ თიშ მეფობაშ მაეჩა წანა ჯვეშ წანაკოროცხუათ 455 წანა იჸუაფუდ. თეგვარო დანიელიშ წინასწარნარაგადას მოშინაფილ პერიოდიქ ჯვეშ წანაკოროცხუათ 455 წანაშე დიჭყუ.
დანიელი იჩიებ, მუსხი ხანს გეგრძელებუდ თი პერიოდი, ნამუშ ბოლოს „ცხებული მეფე“ ანუ მესია მიშუ. წინასწარნარაგადას მოშინაფილ რე 7 მარა დო 62 მარა, ნამუთ ართო აკოძინელო 69 მარა რე. მუსხი ხანს იგრძელებ თე პერიოდი? ბიბლიაშ ნამთინე თარგმანშე ჯგირო იძირე, ნამდა თე პერიოდიშ მარეფი შკვითდღიან ვარინ, შკვით წანიან რე. ირ მარა შკვით წანას ნიშნენს. დროშ დორთუალა შკვითწანიან პერიოდეფო ახალ ვა რდუ ჯვეშო მახორუ ებრაელეფშო. მაგალთო, ირ მაშკვითა წანა თინეფშო საბატონ წანათ ითვალუდ (გამოსვლა 23:10, 11). თაშ ნამდა, წინასწარნარაგადა 69 მარა, 7 წანიან 69 პერიოდ რე, ნამუთ ართო 483 წანა რე.
ასე შემლებნა მესიაშ მოულაშ დრო გეგნოფთვალათ. ჯვეშ წანაკოროცხუათ 455 წანაშე 483 წანას გეგნოფთვალუნთ-და, მეურთ ახალ წანაკოროცხუათ 29 წანაშა. თენა ზუსტას თი წანა რე, მუჟამს იესოქ ინათუ დო მესიათ გინირთ * (ლუკა 3:1, 2, 21, 22). დასურო სასწაულიშ მიოჭარალ ვა რენო თინა, ნამდა ბიბლიურ წინასწარნარაგადაქ თეცალ ზუსტაშე შესრულუნ?!
^ აბზ. 2 ჯვ. წ. 455 წანაშე ჯვ. წ. 1 წანაშახ 454 წანა რე. ჯვ. წ. 1 წანაშე ახ. წ. 1 წანაშახ ართ წანა რე (ნულ წანა ვა არსებენდ). ახ. წ. 1 წანაშე ახ. წ. 29 წანაშახ 28 წანა რე. თე სუმ რიცხვი ართო აკოძინელო 483 წანა რე. იესოქ ახ. წ. 33 წანას ღურ, 70 მარაშ დინახალე (დანიელი 9:24, 26). ქოძირ წიგნი „ჸუჯი ქათხი დანიელიშ წინასწარნარაგადას!“ [ქორთ.], დუდი 11 დო „წმინდა წერილეფიშ ორკვიებელი“ ტომი 2, გვერდეფი 899—901 [ინგლ.]; ქორთულო შეილებ ქოძირე ონლაინ ბიბლოთეკას. იეჰოვაშ მოწმეეფიშ გიშაშკუმალირ რე.
