LE PROFETA Danieloʼ maas tiʼ quinientos jaʼaboʼob u bin u síijil Jesús ka kuxlaji. Baʼaleʼ Jéeobaeʼ yaan baʼax tu yaʼalaj tiʼ Daniel ku yáantkoʼon k-ojéelt jach baʼax kʼiin ka tu yéeyaj Jesús u beet u Mesíasi wa u Cristoi. Tiʼ Danieleʼ tu yaʼalaj: «Kʼaʼabéet a wojéeltik yéetel a naʼatikeʼ ken jóokʼok u tʼaanil u yutskíintaʼal yéetel u kaʼa líiʼsaʼal Jerusalén, tak ken chíikpajak le Mesías, le Máax kun  nuʼuktajoʼ, yaan u máan siete semanaʼob bey xan sesentaidos semanaʼob» (Daniel 9:25, Nuevo Mundo, NM).

Utiaʼal túun k-ojéeltik jach baʼax kʼiin ka chíikpaj le Mesíasoʼ, yáaxeʼ kʼaʼabéet k-ojéeltik baʼax kʼiin ku káajal u xoʼokol le siete semanaʼob yéetel le sesentaidos semanaʼob kun máanoʼ. Daniel 9:25 ku yeʼesikeʼ ku káajal u xoʼokol ken «jóokʼok u tʼaanil u yutskíintaʼal yéetel u kaʼa líiʼsaʼal Jerusalén». ¿Baʼax túun kʼiin ka jóokʼ u tʼaanil? Nehemías, uláakʼ utúul tiʼ le máaxoʼob tsʼíibt le Bibliaoʼ, ku yaʼalikeʼ u tʼaanil u kaʼa líiʼsaʼal u tulum pakʼiloʼob Jerusaleneʼ jóokʼ tu «jaʼabil veinte» tiʼ u reinado Artajerjes (Nehemías 2: 1, 5- 8). Yaʼab máaxoʼob ku xokkoʼob baʼaxoʼob uchaʼantak úuchileʼ ku yaʼalikoʼobeʼ Artajerjeseʼ káaj u reinar tu  jaʼabil 475 táanil tiʼ u taal Cristo (t.t.C.). U veinte jaʼabil u reinado túuneʼ lúub tu jaʼabil 455 t.t.C. Beora túunaʼ tsʼoʼok k-ojéeltik baʼax kʼiin ku káajal u xoʼokol le kʼiinoʼob kun máan tak ken chíikpajak le Mesíasoʼ: ku káajal u xoʼokol tu jaʼabil 455 t.t.C.

Danieleʼ ku yeʼesik yaan u máan «siete semanaʼob bey xan sesentaidos semanaʼob» tak ken chíikpajak le Mesíasoʼ. Lelaʼ ku taal u tsʼáaj 69 semanaʼob. ¿Jach túun bukaʼaj kʼiinoʼob ku tsʼáaik le 69 semanaʼobaʼ? Yaan Bibliaʼobeʼ ku yeʼeskoʼobeʼ le semanaʼobaʼ maʼ táan u tʼaan tiʼ semanaʼob de siete kʼiinoʼobiʼ, táan u tʼaan tiʼ semanaʼob de siete jaʼaboʼob cada upʼéel. Utiaʼal le judíoʼob kaʼachoʼ ken máanak siete jaʼaboʼobeʼ bey upʼéel semana tsʼoʼok u máaneʼ. Letiʼob kaʼacheʼ cada siete jaʼabeʼ maʼatech u meyajkoʼob le luʼum ichil upʼéel jaʼaboʼ, jeʼex maʼatech u meyajoʼob cada sábadoeʼ (Éxodo 23:10, 11). Cada upʼéel túun tiʼ el 69 semanaʼob tu yaʼalaj Danieloʼ, siete jaʼaboʼob cada upʼéel; lelaʼ ku taal u tsʼáaj 483 jaʼaboʼob.

Beora túunaʼ chéen kʼaʼabéet k-jóoʼsik u cuentai. Wa ku káajal k-xokik 483 jaʼaboʼob tu jaʼabil 455 t.t.C., ku biskoʼon tak tu jaʼabil 29 tsʼoʼokok u taal Cristo (tsʼ.t.C.), jach u jaʼabil ka okjaʼanaj Jesús yéetel ka yéeyaʼab u beet u Mesíasi (Lucas 3:1, 2, 21, 22). * K-ilik túuneʼ le baʼax tu yaʼalaj Danieloʼ jach bey béeychajikoʼ.