DANIEL ni góc toib profeta bibany más de gaaygayoʼ íz antes de ñal Jesús. Ná scú gocni, Jehová gochbu Daniel ximod buñ labúu ñan pu dzú nabúbu a Jesús xomod Mesías, o Cristo. Jehová gochbu Daniel: «Non ganlo né guienlo que desde órni tzoʼ ni gony mandary gac copy né tzaʼ Jerusalén stoib hasta Mesías ni nac Caudillo, sioʼ 7 xomal, láaca 62 xomal» (Daniel 9:25).

 Guibiʼno ximod labúu ganno pu dzú guieed Mesías. Ni primer gonyno ngú ganno pu dzú rasaló ragab íz ni tudy hasta guieed Mesías. Profecía raslooy que íz cú rasalóni órni «tzo’ ni gony mandary gac copy Jerusalén». ¿Pu dzú góc mandary gac ndeʼ? Stoib buñguieeu ni bicaʼ la Biblia, ni góc laa Nehemías, rasetlaa que dzú góc mandary gac copy né tzaʼ muros ni nagoo gudx Jerusalén stoib, gocni «ló 20 íz de goló cayony mandary Artajerjes» (Nehemías 2:1, 5-8). Xidal buñ ni racaʼ historias noyibu de acuerdo que primer íz complet dzú buñ mandary Artajerjes gocni íz 474 antes de xtzúno  (A.X.). Órni rabeʼno xcuentni, raduidyno cuent que ló gaal íz de goló buny mandary Artajerjes gocni ló íz 455 A.X. Por ngú, profecía ni goniʼ de Mesías ni bicaʼ Daniel gosaló góc cumplirni íz cuca: 455 A.X.

Daniel raniʼ balac íz tudy desde dzú rasaló ragab íz desde guieed «Mesías el Caudillo». Profecía cú ná que gacni «7 xomal, láaca 62 xomal», órni rabeʼno xcuentni rarecaani 69 xomal. ¿Balacpa ñacla 69 xomal reʼ? Xomod rasetlaa xidal Biblia, diti nacní xomal xomod ni rimbuno, de gatz govitz, nacní xomal de íz. Labúu guigabno láani scareʼ, cada xomal nacní gatz íz. Guirá judíos ni bibany nírcu bimbutzaayibu ximod rarexa xomal de íz, o grupos de gatz íz. Layibu bunyibu xilanii toib íz sabático cada gatz íz (Éxodo 23:10, 11). Por ngú, 69 xomal ni sieed ló profecía cú nacní 69 grupos de gatz íz, né radxin racni 483 íz.

Nigoreʼ ma nosi raquiin cuéno xcuentni. Pal de goló íz 455 A.X. rasaló ragabno 483, radxinno ló íz 29 ló xtzúno (L.X.), né ízcupa goyonis Jesús né bidxin gócbu Mesías * (Lucas 3:1, 2, 21, 22). Looy xí nálo, ¿birebuʼtzay profecía xtuny la Biblia la?