HNEI Iehova hna xatua së troa atrehmekune la Mesia, matre hnei Nyidrëti hna hamën jëne la itre perofeta i Nyidrëti ekö la itre ithuemacany göne la aqane troa hnahon, me itre huliwa ne troa cainöj, me aqane troa meci hnene lo atre iamele hnei Nyidrëti hna thingehnaean. Eatre  asë la itre hna perofetan hnei Tusi Hmitrötr göi Iesu Keriso. Pëkö caa trenga thoi ngön, nge nyimu ithuemacany mina fe. Drei la ketre ceitun, tro sa ce xome la itre hnepe hna perofetan ka qaja la kola hnahon la Mesia memine lo nyidrëti a nekönatr.

Hnei perofeta Isaia hna ahnith laka, tro la Mesia a ketre matra i Davita Joxu. (Isaia 9:7) Eje hi laka, kola fetra hnei Iesu ngöne la itre xötre matra i Davita.​—Mataio 1:​1, 6-​17.

 Hna ahnithe fe hnei Mika ketre perofeta i Akötresie, ka hape, tro la nekönatre cili a mus nge troa hnaho nyën e “Betheleema-Eferata.” (Mika 5:2) Ame ngöne la ijine kola hnaho Iesu, lue traon hna hën e Isaraela ka hape, Betheleema. Caas ezin e Nazareta ngöne götrane ahuë ne la nöj, nge ame ketre, tre, ezin e Ierusalema e Iudra. Ame lai Betheleema ezin e Ierusalema, tre, hna hëne ekö ka hape, Eferata. Hna hnaho Iesu hi ngöne la traone cili, tune lo hna perofetane hë ekö!​—Mataio 2:1.

Hna perofetane fe hnei Tusi Hmitrötr, ka hape, troa hën la Hupuna i Akötresie “qa Aigupito.” Haawe, ame lo nekönatr petre kö Iesu, tre, hna kötresai nyidrë a tro Aigupito. Hna bëeke sai nyidrëti hmaca thupene la hna meci hnei Heroda, haawe, kola eatrëne hnyawa e cili lo hna perofetane hë.​—Hosea 11:1; Mataio 2:​15.

Ame ngöne la itre hna cinyihane hna eköhagen ngöne götrane 200, hetrenyi la itre xötr hna xeene amë fene la hna cinyihan ka hape, “Hna Perofetan”; kola qatreng la itre xaa ithuemacanyi göne la Mesia. Pane wange ju matre troa ixomekeune itre ej memine la itre xötr hna xeen amë fene la hna cinyihan hna hape, “Hna Eatrën.” Maine tro sa ixomekeun tune lai, tro hë së a lapaune catr kowe la nyipici hnine la Wesi Ula i Akötresie.

Ame ngöne la epuni a goeën la itre xötre celë, mekune hnyawa ju laka, ame la itre hna perofetan celë, tre, hna cinyihane hë ekö itre hadredre lao macatre qëmekene troa hnaho Iesu. Hna qaja hnei Iesu ka hape: “Ijije troa eatene la nöjei ewekë asë hna cinyihane ngöne la wathebo i Mose, me nöjei perofeta, me ite Salamo göi ni.” (Luka 24:44) Tune la hna amamane hnyawa hnene la sipu Tusi Hmitrötre i epun, eatre asë hi itre ej, nge nyimutre catr la itre hnepe ithuemacany ka co hna eatrën!